កំណាត់ផ្លូវពីរខ្សែមានប្រវែងសរុប៦.៨៣០ម៉ែត្រ ស្ថិតក្នុងក្រុងសៀមរាប ត្រូវបានបើកការដ្ឋានជួសជុលដោយក្រាលកៅស៊ូឡើងវិញហើយ

កំណាត់ផ្លូវមួយខ្សែមានប្រវែង២.២៣០ម៉ែត្រ ផ្លូវក្រវ៉ាត់ក្រុង (2SR3) ចាប់ពីចំណុចផ្លូវជាតិលេខ៦ឆ្ពោះទៅត្បូង ក្នុងក្រុងសៀមរាប និងកំណាត់ផ្លូវមួយខ្សែទៀត ផ្លូវខ្នារចាស់ ចាប់ពីចំណុចផ្លូវក្រវ៉ាត់ក្រុង ឆ្ពោះទៅផ្លូវលេខ២៦៥S ស្ថិតក្នុងសង្កាត់ជ្រាវ ក្រុងសៀមរាប ទៅទល់គ្នានឹងផ្លូវស្វាយធំ ឃុំកណ្តែក ស្រុកប្រាសាទបាគងមានប្រវែង ៤.៦០០ ម៉ែត្រ ដែលផ្លូវទាំងពីរខ្សែនេះ នឹងពង្រីកទទឹងតួផ្លូវពី ១៤ទៅ១៥ម៉ែត្រ ក្រាលកៅស៊ូជាប្រភេទDBST សាងសង់បណ្តាញលូ ដាក់លូកាត់ទទឹងផ្លូវ ត្រូវបានប្រកាសបើកការដ្ឋានជួសជុលឡើងវិញ កាលពីព្រឹកថ្ងៃទី១៥ ខែសីហា ឆ្នាំ២០១៩ម្សិលមិញនេះ ក្រោមអធិបតីភាពឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន , ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង ឯកឧត្តម ទៀ សីហា អភិបាលខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាប្រតិភូអមដំណើរឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន , ប្រធានមន្ទីរ-អង្គភាពនានាក្នុងខេត្ត កម្លាំងប្រដាប់អាវុធ អាជ្ញាធរមូលដ្ឋាន និង ប្រជាពលរដ្ឋជាច្រើនរូបទៀត។

មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានសូមការអធ្យាស្រ័យ និងយោគយល់ពីសាធារណជនប្រើប្រាស់ផ្លូវទាំងនេះ ព្រោះអាចមានការកកស្ទះចរាចរបន្តិចបន្តួចនៅពេលដំណើរការជួសជុល ហើយការបើកការរដ្ឋានជួលជុលផ្លូវទាំងពីរខ្សែនាពេលនេះ គឺជាការអភិវឌ្ឍបន្ថែមទៀតសម្រាប់ក្រុងសៀមរាប ក៏ដូចជាខេត្តសៀមរាបទាំងមូល លើការអភិវឌ្ឍវិស័យហេដ្ឋារចនាផ្លូវថ្នល់ ដែលសមិទ្ធផលទាំងនេះ នឹងចូលរួមកាត់បន្ថយការលំបាករបស់ប្រជាពលរដ្ឋ មិនត្រឹមតែជួយសម្រួលដល់ការធ្វើដំណើរ និងការដឹកជញ្ជូនផ្សេងៗបានងាយស្រួល និងឆាប់រហ័សប៉ុណ្ណោះទេ ថែមទាំងបានដើរតួយ៉ាងសំខាន់ក្នុងវិស័យសេដ្ឋកិច្ចសង្គម សន្តិសុខ សណ្តាប់ធ្នាប់សាធារណៈ សុវត្ថិភាពសង្គម និងសុខុមាលភាពទៀតផង ដែលកត្តានេះ នឹងរួមចំណែកលើកកម្ពស់ជីវភាពរស់នៅ ជូនប្រជាពលរដ្ឋបានមួយកម្រិតថែមទៀត។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនក្រសួងសាធារណការ មានប្រសាសន៍ថា ៖ ជាមួយនឹងការបើកការដ្ឋានជួសជុលកំណាត់ផ្លូវពីរខ្សែឡើងវិញ ក្រសួងកំពុងសិក្សាធ្វើផ្លូវក្រវ៉ាត់ក្រុង ទី២ ខេត្តសៀមរាបបន្តទៀត ក្នុងបំណងបញ្ជៀសចរាចរណ៍ឡានធំៗមិនឱ្យចូលក្រុងសៀមរាប ស្របពេលដែលចរាចរណ៍កាន់តែចង្អៀតនិងមមាញឹកជាលំដាប់ក្នុងខេត្តទេសចរណ៍មួយនេះ រួមទាំងផែនការមេសំខាន់ៗក្នុងការអភិវឌ្ឍខេត្តសៀមរាបដែរ ដែលក្នុងនោះរួមមាន ការគម្រោងគ្រប់គ្រងប្រព័ន្ធទឹកកខ្វក់ , គម្រោងរំដោះជំនន់ទឹកភ្លៀង , ការរៀបចំប្រព័ន្ធរំដោះទឹកជំនន់ និងផែនការស្ដារស្ទឹងសៀមរាបជាដើម ៕