លោក ឈុន មករា ប្រធាននាយកដ្ឋានគ្រប់គ្រងទីភ្នាក់ងារទេសចរណ៍ ដឹកជញ្ជូន និងមគ្គទ្ទេសក៍ទេសចរណ៍នៃក្រសួងទេសចរណ៍ បានលើកឡើងថា បច្ចុប្បន្ននេះយើងឃើញថា ភ្ញៀវទេសមកកម្សាន្តនៅខេត្តសៀមរាបមានការថយចុះជាងមុន ជាពិសេសទេសចរជនជាតិកូរ៉េ ដូច្នេះគ្រប់ស្ថាប័នពាក់ព័ន្ធទាំងអស់គួរតែរួមគ្នាបង្កើតផលិតផលទេចរណ៍ថ្មីនិងរៀបចំអ្វីដែលជាត្រូវការនិងការចូលចិត្តរបស់អ្នកទេសចរជាពិសេសអ្នកទេសចិននិងកូរ៉េដែលជាទីផ្សារទេសចរណ៍ធំៗនៅក្នុងតំបន់ ដូច្នេះ តាមរយៈនេះ សុំឱ្យអាជ្ញាធរខេត្តសៀមរាប គួររៀបចំការតុបតែងលម្អ តាមរយៈការដាំផ្កាលម្អតាមដងផ្លូវសំខាន់ៗនៅក្នុងក្រុងសៀមរាប ពិសេសផ្លូវចេញពីអាកាសយានដ្ឋានមកទីក្រុងសៀមរាប ពីអាកាសយានដ្ឋានមកតំបន់អង្គរ ក៏ដូចជាផ្លូវនៅក្នុងទីក្រុងសៀមរាបទាំងមូល ដើម្បីរួមចំណែកទាក់ទាញភ្ញៀវទេសចរឱ្យទស្សនាគោលដៅទេសចរណ៍នេះកាន់តែច្រើន ព្រោះអ្នកទេសចរជនជាតិកូរ៉េ តាមការអង្គេតមើលភាគច្រើន គឺចូលចិត្តតំបន់ទេសចរណ៍ដែលមានតុបតែងផ្កាស្អាតៗ។
លោក ឈុន មករា បានលើកឡើងបន្ថែមថា ជាមួយគ្នានេះ យើងក៏ត្រូវរៀបចំកន្លែងកម្សាន្តនាពេលរាត្រីឱ្យបានសម្បូរបែប និងកន្លែងលក់ផលិតផលប្រណីតៗសម្រាប់ទេសចរចិន ពីព្រោះភ្ញៀវទេសចរចិនភាគច្រើនចូលចិត្តកន្លែងស៊ីវិល័យ ខណៈនៅខេត្តសៀមរាប មិនទាន់មានកន្លែងទាំងនេះច្រើននៅឡើយ ។
លោក ឈុន មករា បានលើកយ៉ាងនេះ នៅក្នុងកិច្ចប្រជុំពង្រឹងការគ្រប់គ្រង និងអភិវឌ្ឍន៍គោលដៅទេសចរណ៍សៀមរាប-អង្គរ នៅសាលាខេត្តសៀមរាប នាព្រឹកថ្ងៃទី១៦ ខែសីហាឆ្នាំ២០១៩នេះ ក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ , ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង លោក ពៅ ពិសិដ្ឋ អភិបាលរងខេត្តសៀមរាប ដោយមានការចូលរួមពីសំណាក់ឯកឧត្ដម លោកជំទាវ លោក លោកស្រី ជាប្រតិភូអមដំណើរឯកឧត្តមរដ្ឋមន្ត្រីក្រសួងទេសចរណ៍ , ថ្នាក់ដឹកនាំមន្ទីរ អង្គភាពនានាក្នុងខេត្ត និង អ្នកពាក់ព័ន្ធជាច្រើនរូបទៀត ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ពេលនេះគឺចាំបាច់បំផុត គឺត្រូវបង្កើនផលិតផលទេសចរណ៍ថ្មីៗឱ្យបានច្រើន ហើយរាជរដ្ឋាភិបាលក៏បាននឹងកំពុងតែសិក្សា ពីគម្រោងរៀបចំផែនការមេអភិវឌ្ឍន៍វិស័យទេសចរណ៍នៅខេត្តសៀមរាប ក្នុងនោះគេបានសម្លឹងឃើញពីសក្ដានុពលផលិតផលទេសចរណ៍ថ្មីៗ ដូចជា តំបន់ភ្នំគូលែន , តំបន់ជុំវិញតំបន់អង្គរ និងតំបន់បឹងទន្លេសាប។
ឯកឧត្តម ថោង ខុន មានប្រសាសន៍បន្ថែមថា ជាមួយគ្នានេះក៏ត្រូវបញ្ឈប់រាល់ការលក់វត្ថុអនុស្សាវរីយ៍ដែលមានគុណភាពអន់ ឬក្លែងក្លាយជូនភ្ញៀវទេសចរ ដែលនាំទៅដល់អាប់ឱនកិត្តិយសជាតិ និងបាត់បង់គោលដៅទីផ្សារទេសចរ ហើយក៏ត្រូវពង្រឹងសេវាអនាម័យម្ហូបអាហារនៅតាមអាហារដ្ឋាន ភោជនីយដ្ឋានក្នុងខេត្ត និងទីក្រុងសៀមរាប ពិសេសត្រូវរៀបចំនូវវិថីម្ហូបអាហារ «Food Street» នៅក្រុងសៀមរាបឱ្យបានឆាប់រហ័ស។
នៅក្នុងឱកាសនោះដែរ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប បានណែនាំបន្ថែមដល់មន្ត្រីអនុវត្តកិច្ចការតាមផ្នែកទាំងអស់ ត្រូវអនុវត្តដំណោះស្រាយទាំងឡាយប្រកបដោយប្រសិទ្ធភាព ពីព្រោះបញ្ហាមួយចំនួន ដូចជាបញ្ហាសំរាម ការតុបតែងលម្អ ការលក់វត្ថុអនុស្សាវរីយ៍គុណភាពអន់ជូនភ្ញៀវទេសចរនេះ ព្រោះឯកឧត្តមនៅតែឮជាដដែលៗ ពោលមិនអាចឱ្យបញ្ហាដដែលៗនេះ កើតឡើងអូសបន្លាយយូរបានឡើយ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
