នាព្រឹកថ្ងៃទី១៦ ខែសីហា ឆ្នាំ២០១៩នេះ សិស្សក្រីក្រចំនួន៦០នាក់ ដែលកំពុងរស់នៅក្នុងមណ្ឌលអង្គការកម្ពុជាអភិវឌ្ឍនៃក្តីសង្ឃឹម ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប បានទទួលសម្ភារសិក្សាពីសប្បុរសជន ដឹកនាំដោយអ្នកអង្គម្ចាស់ក្សត្រីយ៍ ស៊ីសុវត្ថិ សោមា អគ្គរាជទូតសុឆន្ទៈដើម្បីស្ត្រីពីសហគមន៍អឺរ៉ុប ។
ក្នុងឱកាសនោះ លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណ:កម្មការពិគ្រោះយោបល់កិច្ចការស្ត្រី និងកុមារខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះអង្គការកម្ពុជាអភិវឌ្ឍន៍នៃក្ដីសង្ឃឹម និងសប្បុរសជនទាំងក្នុងនិងក្រៅប្រទេសទាំងអស់ ដែលតែងតែចូលរួមឧបត្ថម្ភគាំទ្រដល់កុមារនៅទីនេះ និងចាត់ទុកសកម្មភាពនេះថា ជាការរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍន៍ធនធានមនុស្ស ដែលបានស្វះស្វែងរកការជួយគាំទ្រពីសប្បុរសជនជាតិនិងអន្តរជាតិ ក្នុងការឧបត្ថម្ភលើកទឹកចិត្តដល់កុមារសិស្សានុសិស្ស ឱ្យខិតខំរៀនសូត្រ ។
លោក ជំទាវ ស៊ិន ណម មានប្រសាសន៍បន្ថែមថា ដើម្បីឆ្លើយតបទៅនឹងសកម្មភាពសប្បុរសធម៌ និងដើម្បីឆ្លើយតបទៅនឹងសេចក្តីប្រាថ្នា របស់អាណាព្យាបាល លោកគ្រូអ្នកគ្រូ និងសប្បុរសជនជិតឆ្ងាយ សូមចៅៗ ត្រូវខិតខំសិក្សារៀនសូត្រ យកចិត្តទុកដាក់ស្តាប់ការពន្យល់ពីលោកគ្រូអ្នកគ្រូ មករៀនឱ្យបានទៀងទាត់ ត្រូវចេះស្រឡាញ់ និងជួយទុក្ខធុរៈមិត្តភក្ដិ ចៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗដែលសង្គមស្អប់ខ្ពើម ។
អ្នកអង្គម្ចាស់ក្សត្រីយ៍ ស៊ីសុវត្ថិ សោមា បានមានព្រះសុវណ្ណីថា ក្នុងនាមជាស្ត្រីខ្មែរមួយរូប ទោះបីសម្ភារនិងការជួយឧបត្ថម្ភដល់អង្គការនេះមានចំនួនតិចតួចក្តី តែពិតជាមានក្តីសោមនស្សរីករាយ ដែលបានចូលរួមចំណែកជាមួយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃនិងប៉ិនប្រសព្វរបស់សម្តេចតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំដ៏ឆ្នើម ហើយក៏ដើម្បីឆ្លើយតបទៅនឹងសេចក្តីស្រឡាញ់ និងការយកចិត្តទុកដាក់ពីសំណាក់រាជរដ្ឋាភិបាល ចាស់ព្រឹទ្ឋាចារ្យ មាតាបិតាអានាព្យាបាលលោកគ្រូអ្នកគ្រូ ដែលតែងតែខិតខំចង់ឱ្យពួកកូនៗ មានចំណេះដឹងសម្រាប់អភិវឌ្ឍន៍អនាគតខ្លួនឯង និងរួមចំណែកអភិវឌ្ឍន៍ប្រទេសជាតិយើងឱ្យកាន់តែជឿនលឿនទៅមុខទៀត ។
អ្នកអង្គម្ចាស់ក្សត្រីយ៍ ស៊ីសុវត្ថិ សោមា បានមានព្រះសុវណ្ណីបន្ថែមថា អ្នកអង្គម្ចាស់ នឹងបន្តជួយឧបត្ថម្ភគាំទ្រដល់កុមារនៅទីនេះទៅតាមលទ្ឋភាពដែលអាចធ្វើបាន ប៉ុន្តែសំខាន់ សូមឲ្យកូនៗ ក្មួយៗ ត្រូវខិតខំសិក្សារៀនសូត្រ ស្តាប់បង្គាប់ការអប់រំទូន្មានពីលោកឱពុកអ្នកម្តាយ លោកគ្រូអ្នកគ្រូ ចាស់ព្រឹទ្ឋាចា្យផងទាំងពួង ជាពិសេសត្រូវគោរពដឹងគុណចំពោះប្រមុខថ្នាក់ដឹកនាំរាជរដ្ឋាភិបាលកម្ពុជា ដែលបានខិតខំពុះពារគ្រប់ឧបសគ្គ ក្នុងការរំដោះ និងស្តារអភិវឌ្ឍន៍ប្រទេសជាតិឱ្យទទួលបានសុខសន្តិភាព និងរីកចម្រើនលើគ្រប់វិស័យ។
អ្នកស្រី ឈឹម សុភ័ណ្ឌ ប្រធានអង្គការអង្គការកម្ពុជាអភិវឌ្ឍន៍នៃក្ដីសង្ឃឹម បានឲ្យដឹងថា អង្គការនេះ បានបង្កើតឡើងនៅឆ្នាំ២០១០ ក្នុងគោលបំណងជួយលើកកម្ពស់ជីវភាពក្រីក្រ របស់ប្រជាពលរដ្ឋជា ពិសេសកុមារកំព្រា កុមារងាយរងគ្រោះ និងកុមារទីទ័លក្រ ដើម្បីឲ្យកុមារទាំងអស់ ទទួលបាននូវគុណតម្លៃខ្ពស់ ដែលសង្គមមនុស្សទូទៅទទួលស្គាល់និង ធ្វើយ៉ាងណាឲ្យកុមារ មានកាហូបចុកគ្រប់គ្រាន់បានចូលរៀនគ្រប់គ្នាបានរៀននៅជំនាញបំណិនជីវិត និងជំនាញផ្សេងៗនៅតាមចំណង់ចំណូលចិត្តរបស់ពួកគាត់ ជាពិសេសទទួលបានសិទ្ធិសេរីភាពទាំង៥យ៉ាងរបស់ពួកគាត់។
អ្នកស្រី ឈឹម សុភ័ណ្ឌ បានឱ្យដឹងទៀតថា ចាប់ពីខែមករា ឆ្នាំ ២០១៦ មក អង្គការនេះ បានបង្កើតមណ្ឌលដើម្បីចិញ្ចឹមកុមារកំព្រា និងកុមារងាយរងគ្រោះទាំងនោះមកពីស្រុកចំនួន៥ ក្នុងខេត្តសៀមរាប មានកុមារសរុបចំនួន៤៦នាក់ ក្នុងនោះស្រីចំនួន១៨នាក់ ដែលបច្ចុប្បន្ន នៅក្នុងមណ្ឌលមានចំនួន ២៥នាក់ ក្នុងនោះស្រី១១នាក់ ដោយបានផ្តល់ជាជំរកស្នាក់នៅក្នុងមណ្ឌល , ផ្តល់អាហារមួយថ្ងៃបីពេល , ផ្តល់ឲ្យទៅរៀននៅសាលារដ្ឋតាមកំរិតថ្នាក់របស់ពួកគាត់ , ផ្តល់ការអប់ផ្លូវចិត្ត សីលធម៌ ទំនៀមទម្លាប់ប្រពៃណីខ្មែរ គុណធម៌ មេត្តាធម៌ , រៀនភាសាអង់គ្លេស ជប៉ុន កុំព្យូទ័រ គូរគំនូរ , រៀនរបាំបុរាណ និង ប្រពៃណីខ្មែរ និង រៀនដាំបន្លែផ្សេងៗ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
