តាមការឲ្យដឹងពីយោធាកូរ៉េខាងត្បូង បានឲ្យដឹងថា កូរ៉េខាងជើង បានបាញ់មីស៊ីលដែលមិនស្គាល់ អត្តសញ្ញាណចំនួន ២គ្រាប់ ចូលទៅក្នុងសមុទ្រខាងកើត នៅព្រឹកថ្ងៃសុក្រនេះ ដែលជាការបាញ់ លើកទី៦ ក្នុងរយៈពេលប្រហែល ៣សប្តាហ៍ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន យុនហាប់ នៅថ្ងៃទី១៦ ខែសីហា ឆ្នាំ២០១៩។
យោងតាមអគ្គសេនាធិការចំរុះ (JCS) បានឱ្យដឹងថា គ្រាប់មីស៊ីលទាំងនេះត្រូវបានគេបាញ់ចេញ ពីតំបន់ឆ្នេរភាគខាងកើត របស់ខ្លួន នៅតុងឆុន ក្នុងខេត្តកាងវ៉ុន នៅព្រឹកថ្ងៃដដែលនេះ។
មិនមានព័ត៌មានលំអិតណាមួយឡើយ ដែលត្រូវបានគេដឹងភ្លាមៗនោះទេ រួមមានប្រភេទរបស់មីស៊ីល ជួរហោះហើរ និងរយៈកម្ពស់ អតិបរមារបស់វា។
JCS បានឲ្យដឹងនៅក្នុងសេចក្តីសង្ខេបមួយ ថា “យោធារបស់យើងកំពុង តាមដានស្ថានការណ៍ ក្នុងករណីមានការ បាញ់បង្ហោះបន្ថែម ខណៈពេលដែលរក្សា ឥរិយាបថត្រៀមខ្លួន”៕
ដោយ៖ ឈូក បូរ៉ា
