ក្នុងឱកាសបំពេញបេសកកម្មនៅប្រទេសថៃ នៅថ្ងៃទី១៨ ខែសីហា ឆ្នាំ២០១៩នេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានឆ្លៀតអញ្ជើញទៅសួរសុខទុក្ខមន្ត្រីនគរបាលខេត្ត ម្នាក់ឈ្មោះ ហួត មុនីពិសាខ ដែលបានរងរបួសក្នុងឧបទ្ទេវហេតុផ្ទុះហ្គាស កាលពីថ្ងៃទី១៤ ខែសីហា ឆ្នាំ២០១៩ នៅក្នុងក្រុងសៀមរាប ខណៈបច្ចុប្បន្នកំពុងសម្រាកព្យាបាលជំងឺនៅមន្ទីរពេទ្យអ៊ូប៊ុន ក្នុងប្រទេសថៃ ។
ក្នុងឱកាសនោះដែរ ឯកឧត្តម ទៀ សីហា បានសម្ដែងនូវការសោកស្តាយជាខ្លាំងណាស់ចំពោះព្រឹត្តិហេតុគួរខ្លាចនេះ ដែលវាកើតចេញពីការធ្វេសប្រហែស មិនមានការគ្រប់គ្រងបច្ចេកទេសឲ្យបានល្អ ដូចអ្វីដែលសមត្ថកិច្ចជំនាញបានដាក់ចេញនូវវិធានការអនុវត្តចំពោះមុខរបរដែលមានហានីភ័យខ្ពស់ ដូចជាស្ថានីយប្រេងឥន្ទនៈ និងស្ថានីយលក់ហ្គាសនេះជាដើម ព្រោះថាសម្រាប់មុខរបរដែលមានហានីភ័យខ្ពស់នេះ វាមិនត្រឹមតែបង្កវិនាសកម្មបំផ្លាញខ្លួនឯងប៉ុណ្ណោះ ទេ នៅពេលដែលខ្វះការប្រុងប្រយ័ត្ន តែវាបានបង្កឲ្យមានគ្រោះថ្នាក់សម្រាប់អ្នកដទៃផងដែរ ។
ឯកឧត្តម ទៀ សីហា ក៏បានជូនពរ សូមឲ្យអ្នកជំងឺទាំងអស់ ទាំងជនជាតិខ្មែរ និង ជនជាតិបរទេស បានឆាប់ជាសះស្បើយ ដើម្បីវិលត្រឡប់ទៅជួបជុំក្រុមគ្រួសារវិញ ។
គួរំលឹកថា កាលពីវេលាម៉ោង១:១៥នាទីរសៀល កាលពីថ្ងៃទី១៤ ខែសីហា ឆ្នាំ២០១៩ កន្លងទៅនេះ មានករណីផ្ទុះហ្គាសឆេះហាងបញ្ចូលហ្គាសរថយន្តមួយកន្លែង ស្ថិតនៅតាមផ្លូវលោកតាណឺយ ក្នុងភូមិបន្ទាយចាស់ សង្កាត់ស្លក្រាម ក្នុងក្រុងសៀមរាប ដែលជារបស់ឈ្មោះ ឈុក ឈុនលី ភេទប្រុស អាយុ៤៨ឆ្នាំ មុខរបរលក់ហ្គាស មានទីលំនៅបច្ចុប្បន្ន នៅភូមិគោកស្រុក ឃុំពួក ស្រុកពួក ខេត្តសៀមរាប បណ្ដាលឲ្យមានអ្នករងរបួសចំនួន១៣នាក់ ក្នុងនោះស្រីចំនួន០៣នាក់ របួសធ្ងន់ចំនួន០៦ នាក់ ហើយក្នុងចំណោមអ្នករងរបួសចំនួន១៣នាក់នេះ មានជនជាតិបរទេស ចំនួន០២នាក់ ហើយក្រោយពីកើតហេតុ ដោយមានការសម្របសម្រួលពីឯកឧត្តម ទៀ សីហា អភិបាលខេត្តសៀមរាប ដែលជាជំហានដំបូង ជនរងគ្រោះទាំងអស់ត្រូវបានបញ្ជូនទៅព្យាបាលជំងឺទាំងនៅមន្ទីរពេទ្យរដ្ឋ និង ពេទ្យឯកជន រួចបានបញ្ជូនបន្តទៅព្យាបាលនៅប្រទេសថៃ ចំនួន០៧នាក់ ក្នុងនោះជនជាតិបរទេសចំនួន០១នាក់ , បញ្ជូនទៅព្យាបាលនៅរាជធានីភ្នំពេញ ចំនួន០១នាក់ ជាជនជាតិបរទេស , នៅសម្រាកព្យាបាលជំងឺនៅមន្ទីរពេទ្យរដ្ឋ និង ពេទ្យឯកជនក្នុងខេត្ត ចំនួន០៤នាក់ និងសុំចេញទៅសម្រាកព្យាបាលជំងឺនៅផ្ទះចំនួន០១នាក់ ។
ក្រៅពីបង្កឲ្យមានមនុស្សរងរបួស ករណីផ្ទុះហ្គាសឆេះនេះ ក៏បានបណ្តាលឲ្យខូចខាតហាងបញ្ចូលហ្គាស មានជញ្ជាំងស័ង្កសី ប្រក់ស័ង្កសី ប្រវែង៨ម៉ែត្រគុណនឹង១២ម៉ែត្រ , ឆេះម៉ូតូខូចទាំងស្រុងចំនួន២គ្រឿង , ឡានបញ្ចូលហ្គាសចំនួន ០១គ្រឿង និង ឡាន០១គ្រឿងទៀតបែកកញ្ចក់ ។
បន្ទាប់ពីមានឧបទ្ទេវហេតុផ្ទុះហ្គាសកើតឡើង នៅព្រឹកថ្ងៃទី១៥ ខែសីហា ឆ្នាំ២០១៩ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង ឯកឧត្តម ទៀ សីហា និងលោកជំទាវ ទាង អេង ទៀ សីហា ក្នុងនាមប្រធានប្រតិភូអាជ្ញាធរខេត្ត បានដឹកនាំប្រតិភូជាមន្ត្រីរាជការនៃរដ្ឋបាលខេត្ត និង ប្រតិភូសាខាកាកបាទក្រហមកម្ពុជាខេត្តសៀមរាប ចុះសាកសួរសុខទុក្ខ និង នាំយកអំណោយមនុស្សធ៌ម ជូនដល់អ្នកជំងឺ ដែលជាជនរងគ្រោះក្នុងព្រឹត្តិហេតុនោះ ៕
អត្ថបទ : លោក លីវ សាន្ត
រូបថត ៖ រដ្ឋបាលខេត្តសៀមរាប
