សមត្ថកិច្ចនគរបាលខេត្តសៀមរាប បានឲ្យដឹងថា កាលពីវេលាម៉ោងប្រហែល ២១ៈ២០នាទី ថ្ងៃទី១៩ ខែសីហា ឆ្នាំ២០១៩ នេះ មានករណីហិង្សាមួយបានកើតឡើង នៅចំនុចមុខហាងលក់បបរស សុខសាន្ត ស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ដែលបង្កឡើងដោយជនបរទេសម្នាក់ឈ្មោះ MILLIN MARK WILLIAM ភេទប្រុស កើតថ្ងៃទី១៩-០៣-១៩៦៥ ជនជាតិញូសឺឡែន មិនមានលិខិតឆ្លងដែនជាប់ខ្លួន មុខរបរចូលនិវត្តន៍ ស្នាក់នៅបន្ទប់ជួលក្នុងភូមិវាល សង្កាត់គោកចក ក្រុងសៀមរាប បានធ្វើ សកម្មភាពវាយទៅលើផ្ទៃមុខជនរងគ្រោះឈ្មោះ ម៉ម ដារ៉ា ភេទប្រុស អាយុ៤១ឆ្នាំ ជនជាតិខ្មែរ ជាច្រើនដៃ ហើយត្រូវបានសមត្ថកិច្ចនាំខ្លួនមកសាកសួរនៅស្នងការដ្ឋាននគរបាលខេត្តសៀមរាប ។
សមត្ថកិច្ចបានឲ្យដឹងបន្ថែមថា ហេតុការណ៍នេះបានកេីតឡីង ដោយសារមានបញ្ហាគ្រោះថ្នាក់ចរាចរណ៍បន្តិចបន្តួច គឺជនសង្ស័យជិះម៉ូតូបុករថយន្តជនរងគ្រោះបណ្តាលឲ្យដួលខ្លួនឯង ហើយបច្ចុប្បន្នជនបរទេសរូបនេះ ត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សម្រេចឲ្យឃាត់ខ្លូនបណ្តោះអាសន្ននៅការិយាល័យស៊ើបអង្កេតនិងអនុវត្តនីតិវិធី ដើម្បីរៀបចំកសាងសំណុំរឿងបញ្ជូនទៅសាលាដំបូងខេត្តសៀមរាបចាត់ការបន្តតាមនីតិវិធី ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ដ
