ឪពុកម្តាយ និងអាណាព្យាបាលសិស្ស ដែលជាបេក្ខជនកំពុងប្រលងសញ្ញាប័ត្រទុតិយភូមិ ឆ្នាំ២០១៩នេះ បានបង្ហាញអារម្មណ៍សប្បាយរីករាយ ចំពោះកូនៗពួកគាត់ ដែលពួកគេបានខិតខំតស៊ូរៀន អស់ពេល១២ឆ្នាំកន្លងមក។
អង្គុយមុខវិទ្យាល័យអង្គរ ទីដែលប្អូនស្រីរបស់ខ្លួនប្រលងនៅទីនោះ អ្នកស្រី ប្រាក់ រដ្ឋា ដែលមកពីស្រុកជីក្រែង បានរៀបរាប់ទាំងទឹកមុខស្រស់ស្រាយថា អ្នកស្រីមានទឹកចិត្តសប្បាយរីករាយ ដែលប្អូនរបស់គាត់ បានតស៊ូខិតខំរៀន តាំងពីថ្នាក់អស់ពេល១២ឆ្នាំកន្លងមក គាត់មិនសូវមានការព្រួយបារម្ភទេ ព្រោះប្អូនស្រីអ្នកស្រី បានប្រាប់ថា គេមានទំនុកចិត្តខ្ពស់សម្រាប់ការប្រលងនេះ។
ចំណែកប្រជាពលរដ្ឋម្នាក់ទៀតមកពីស្រុកជីក្រែងដែរ គឺអ្នកស្រី ហ៊ុន ភឿន បាននិយាយថា គាត់មានការសប្បាយចិត្តណាស់ដែលកូនបានមកប្រលង។ ព្រោះឆ្លងកាត់ជីវភាពក្រីក្រ កូនរបស់គាត់បានតស៊ូខិតខំរៀនរហូតមកដល់មានថ្ងៃនេះ។
ចំណែកឪពុកម្តាយ និងអាណាព្យាបាលជាច្រើននាក់ផ្សេងទៀត ដែលបានសម្ភាសន៍ ក៏បញ្ចេញមតិស្រដៀងគ្នាដែរ។ ពួកគាត់ទាំងនោះសុទ្ធតែមានមោទកភាពចំពោះកូនៗ ហើយពួកគាត់ក៏មិនសូវយកចិត្តទុកដាក់ចំពោះលទ្ធផល ជាប់ឬធ្លាក់នោះដែរ ។
សូមបញ្ជាក់ថា ការប្រឡងកម្ពុជាសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០១៨-២០១៩ បានចាប់ដំណើរការជាផ្លូវការហើយ ដែលការប្រឡងនេះ មានរយៈពេល២ថ្ងៃ គឺនៅថ្ងៃទី១៩ និងថ្ងៃទី២០ ខែសីហា ឆ្នាំ២០១៩ហើយសម្រាប់នៅខេត្តសៀមរាប ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩នេះ នៅខេត្តសៀមរាប មានបេក្ខជនសរុបចំនួន ៨.៤២៨នាក់ ក្នុងនោះស្រីចំនួន៤.៦៨៩នាក់ មាន១៣ មណ្ឌល ស្មើនឹង៣៨៤ បន្ទប់ កើនឡើងចំនួនមួយមណ្ឌល បើប្រៀបធៀបទៅឆ្នាំ២០១៨ ដែលមានតែ១២មណ្ឌល ដោយចែកចេញជា២ ផ្នែក គឺ ៖ ទី១. ផ្នែកវិទ្យាសាស្ត្រពិត មាន៤មណ្ឌល ស្មើនឹង ១១៨បន្ទប់ មានបេក្ខជនចំនួន ២.៩៤៤ នាក់ ក្នុងនោះស្រីមានចំនួន ១.៧០៧នាក់ និង ទី២. ផ្នែកវិទ្យាសាស្ត្រសង្គម មាន០៩មណ្ឌល ស្មើនឹង១៣០ បន្ទប់ មានបេក្ខជនចំនួន៥.៧៧០នាក់ ។
មណ្ឌលប្រឡងទាំង១៣ ក្នុងខេត្តសៀមរាប រួមមាន ៖ នៅវិទ្យាល័យ ១០ មករា ១៩៧៩ មាន០២មណ្ឌល , វិទ្យាល័យសម្ដេចឪ មាន០២មណ្ឌល , វិទ្យាល័យសម្ដេចតេជោ ហ៊ុន សែន គ្រួស មាន០១មណ្ឌល , សាលាបឋមសិក្សាមុខនាគ មាន០១មណ្ឌល , សាលាគរុកោសល្យ និង វិក្រឹតការខេត្ត មាន០១មណ្ឌល , វិទ្យាល័យហ៊ុន សែន សៀមរាប មាន០១ មណ្ឌល , វិទ្យាល័យអង្គរ មាន០២មណ្ឌល , វិទ្យាល័យហ៊ុន សែន វត្តស្វាយ មាន០២មណ្ឌល និង សាលាបឋមសិក្សាវត្តស្វាយ មាន០១មណ្ឌល ៕
អត្ថបទ៖ ជា ស្រស់, រូបភាព ៖ខេង ឧត្តម
