ព្រះសទ្ឋម្មប្បកាសនីតាត មហាទី ឧត្តមទីប្រឹក្សាផ្ទាល់សម្តេចព្រះអគ្គមហាសង្ឃរាជាធិបតី គិត្តិឧទ្ទេសបណ្ឌិត និងជាព្រះចៅអធិការវត្តព្រះឥន្ទកោសាខេត្តសៀមរាប បានមានថរដិកាថា ធម្មជាតិ និងព្រៃឈើទាំងឡាយអាចរស់នៅលើភពផែនដីយើងនេះបានដោយ មិនចាំបាច់មានមនុស្ស តែមនុស្ស សត្វទាំងឡាយ មិនអាចរស់នៅដោយខ្វះព្រៃឈើនិងធម្មជាតិបានទេ។ការដាំកូនឈើគឺផ្តល់អត្ថប្រយោជន៍ធំធេងណាស់ដល់បរិស្ថាន និងជីវិតមនុស្សសត្វ និងទទួលបានអានិសង្ឃទាំងយប់ទាំងថ្ងៃដូចការកសាងផ្លូវ ជីកអណ្តូង កសាងកុដិសាលាជាដើម ដែរ។
ព្រះសទ្ឋម្មប្បកាសនីតាត មហាទីមានថេរដិកាបន្ថថា ឈើនិងព្រៃឈើជាធម្មជាតិរស់នៅជុំវិញយើងប្រៀបដូចជាកូនចៅសាច់ញាតិ បងប្អូនរបស់យើងទាំងអស់គ្នាដែលតែងតែឃុំគ្រងនិងជួយគ្នាទៅវិញទៅមកចៀសពីភ័យន្តរាយផ្សេងៗ ឈើផ្តល់ប្រយោជន៍ដល់មនុស្សនិងសព្វសត្វផងទាំងពួងអាស្រ័យផល វាផ្តល់ឱ្យយើងនូវសម្ភារៈប្រើប្រាស់រាប់មិនអស់ ពិសេសជាងនេះឈើនិងព្រៃឈើជួយទប់ស្កាត់ការប្រែប្រួលធាតុអាកាស ជួយទាញទឹកធ្លៀង និងជួយការពារខ្យល់ និង នាំឱ្យរដូវកាលមានភាពប្រក្រតី ទៀតផងប្រសិនបើយើងបន្តដាំនិងរក្សាព្រៃឈើឱ្យបានគង់វង្ស ហេតុនេះគប្បីយើងត្រូវចេះស្រឡាញ់ព្រៃឈើនិងចូលរួមថែរក្សាព្រៃឈើទាំងអស់គ្នា គួរឈប់ កុំនាំគ្នាកាប់បំផ្លាញព្រៃឈើ ដើម្បីតែប្រយោជន៍គ្រួសារនិងក្រុមបក្សពួកខ្លួន។
លោក នឹម សុវណ្ណ អភិបាលរង ស្រុកប្រាសាទបាគង ក៏បានចាត់ទុកការដាំដើមឈើរួមគ្នានាពេលនេះ បង្ហាញពីស្មារតីសាមគ្គីភាព ស្រឡាញ់សម្បត្តិធម្មជាតិពីសំនាក់ព្រះសង្ឃនិងញាតិមិត្តព្រមទាំងបងប្អូនប្រជាពលរដ្ឋក្នុងមូលដ្ឋានទាំងអស់ផងដែរ។
លោកអភិបាលរងស្រុក ក៏បានជម្រុញនិងសំណូមពរ ប្រជាពលរដ្ឋ ព្រះសង្ឃ លោកគ្រូអ្នកគ្រូ សិស្សានុសិស្ស ចូលរួមដាំដើមឈើនៅតាមគេហដ្ឋាន តាមទីសាធារណៈ វត្តអារាម សាលារៀនឱ្យបានច្រើនដើម ជាពិសេសជម្រុញដល់ ដល់ប្រជាពលរដ្ឋឱ្យមានការចូលរួមថែទាំកូនឈើដែលកំពុងដាំឱ្យបានគង់វង្សនិងបញ្ឈប់ការកាប់បំផ្លាញព្រៃឈើតទៅទៀត។
សូមបញ្ជាក់ថា កូនឈើដែលបានដាំនៅពេលនេះមានចំនួន១២០០ដើម ហើយកម្មវិធីនេះ ប្រព្រឹត្តិទៅ កាលពីថ្ងៃទី១៨ ខែសីហា ឆ្នាំ២០១៩ នៅក្នុងភូមិរកាកំបុត ឃុំត្រពាំងធំ ស្រុកប្រាសាទបាគង ខេត្តសៀមរាប ដោយមានការអញញជើញចូលរួមពីសំណាក់ ព្រះសទ្ឋម្មប្បកាសនីតាត មហាទី ឧត្តមទីប្រឹក្សាផ្ទាល់សម្តេចព្រះអគ្គមហាសង្ឃរាជាធិបតី គិត្តិឧទ្ទេសបណ្ឌិត ជាអ្នកទទួលបន្ទុកជួយការងារសាសនាជាតិ អន្តរជាតិ និងជាព្រះចៅអធិការវត្តព្រះឥន្ទកោសាខេត្តសៀមរាប លោក នឹម សុវណ្ណ អភិបាលរង ស្រុកប្រាសាទបាគង មន្ត្រីសង្សក្នុងក្រុងសៀមរាប និងប្រជាពលរដ្ឋជាច្រើននាក់ផងដែរ ៕
អត្តបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
