ក្នុងឱកាសជួបពិភាក្សាជាមួយលោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប កាលពីថ្ងៃទី១៩ ខែ សីហា ឆ្នាំ២០១៩នេះ ឯកឧត្ដម Marek Libricky ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណ រដ្ឋឆែក បានមានប្រសាសន៍ថា ក្នុងដំណើរបំពេញបេសកកម្មនៅខេត្តសៀមរាបនេះ មានគោលបំណងដើម្បីធ្វើការពង្រឹងកិច្ចសហប្រតិបត្តិការនៃប្រទេសទាំងពីរ កម្ពុជា-ឆែក ក្នុងនោះការហោះហើររបស់អាកាសចរណ៍ឆែក វិស័យកសិកម្ម ការគ្រប់គ្រងកាកសំណល់ រាវ និង ធ្វើប្រព្រឹត្តិកម្មទឹកកខ្វក់មុននឹងបង្ហូរចូលស្ទឹង ទន្លេ ព្រមទាំងសិក្សាពីគម្រោងថាមពលដើរដោយពន្លឺព្រះអាទិត្យទៀតផង ។
ឯកឧត្ដម Marek Libricky មានប្រសាសន៍បន្ថែមថា សក្តានុពលរបស់ខេត្តសៀមរាប គឺសម្បូរទៅដោយសម្បត្តិវប្បធម៌ប្រវត្តិសាស្ត្រ រួមនឹងការងារកសិកម្ម ដូច្នេះឯកឧត្ដមចង់ឲ្យវិស័យកសិកម្មនៅកម្ពុជាមានលក្ខណៈទំនើប ពិសេសត្រូវមានរោងចក្រក្នុងការផលិតកសិផលដែលប្រជាកសិករផលិតបាន និង មានទីផ្សារលក់នូវកសិផលទាំងនោះ ។
ឯកឧត្ដម Marek Libricky មានប្រសាសន៍បន្ថែមទៀតថា បច្ចុប្បន្ននេះ ទីភ្នាក់ងារសម្រាប់ការអភិឌ្ឍឆែក បាននឹងកំពុងធ្វើការពិនិត្យ និង វាយតម្លៃទៅលើគម្រោងទឹកកខ្វក់នៅខេត្តសៀមរាប តាមគម្រោងផែនការរបស់រដ្ឋបាលខេត្ត ព្រោះថា ខេត្តសៀមរាប ជាខេត្តទេសចរណ៍ ដូច្នេះបញ្ហាទឹកកខ្វក់នេះ ក៏ជារឿងសំខាន់មួយដែរ ចំពោះសោភ័ណភាពរបស់ក្រុងសៀមរាប និង ជាផ្នែកមួយនៃការទាក់ទាញទឹកចិត្តរបស់ភ្ញៀវទេសចរ ។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្តសៀមរាប បានរំពឹងទុកថា តាមរយៈកិច្ចសហប្រតិបត្តិការនៃប្រទេសទាំងពីរ នឹងធ្វើឲ្យប្រទេសយើងទាំងពីរ កម្ពុជា-ឆែក កាន់តែមានការអភិវឌ្ឍថ្មីៗបន្ថែមទៀត សំដៅកាត់បន្ថយភាពក្រីក្ររបស់ប្រជាពលរដ្ឋ ទាំងនៅទីក្រុង និង នៅតាមជនបទ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
