នៅវេលាម៉ោង៧ព្រឹក ថ្ងៃទី១៩ ខែសីហា ឆ្នាំ២០១៩នេះ ការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០១៨-២០១៩ នៅខេត្តសៀមរាប បានចាប់ដំណើរការជាផ្លូវការហើយ ដែលការប្រឡងនេះ មានរយៈពេល២ថ្ងៃ គឺនៅថ្ងៃទី១៩ និងថ្ងៃទី២០ ខែសីហា ឆ្នាំ២០១៩ ។
ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩នេះ នៅខេត្តសៀមរាប មានបេក្ខជនសរុបចំនួន ៨.៤២៨នាក់ ក្នុងនោះស្រីចំនួន៤.៦៨៩នាក់ មាន១៣ មណ្ឌល ស្មើនឹង៣៨៤ បន្ទប់ កើនឡើងចំនួនមួយមណ្ឌល បើប្រៀបធៀបទៅឆ្នាំ២០១៨ ដែលមានតែ១២មណ្ឌល ដោយចែកចេញជា២ ផ្នែក គឺ ៖ ទី១. ផ្នែកវិទ្យាសាស្ត្រពិត មាន៤មណ្ឌល ស្មើនឹង ១១៨បន្ទប់ មានបេក្ខជនចំនួន ២.៩៤៤ នាក់ ក្នុងនោះស្រីមានចំនួន ១.៧០៧នាក់ និង ទី២. ផ្នែកវិទ្យាសាស្ត្រសង្គម មាន០៩មណ្ឌល ស្មើនឹង១៣០ បន្ទប់ មានបេក្ខជនចំនួន៥.៧៧០នាក់ ។
មណ្ឌលប្រឡងទាំង១៣ ក្នុងខេត្តសៀមរាប រួមមាន ៖ នៅវិទ្យាល័យ ១០ មករា ១៩៧៩ មាន០២មណ្ឌល , វិទ្យាល័យសម្ដេចឪ មាន០២មណ្ឌល , វិទ្យាល័យសម្ដេចតេជោ ហ៊ុន សែន គ្រួស មាន០១មណ្ឌល , សាលាបឋមសិក្សាមុខនាគ មាន០១មណ្ឌល , សាលាគរុកោសល្យ និង វិក្រឹតការខេត្ត មាន០១មណ្ឌល , វិទ្យាល័យហ៊ុន សែន សៀមរាប មាន០១ មណ្ឌល , វិទ្យាល័យអង្គរ មាន០២មណ្ឌល , វិទ្យាល័យហ៊ុន សែន វត្តស្វាយ មាន០២មណ្ឌល និង សាលាបឋមសិក្សាវត្តស្វាយ មាន០១មណ្ឌល ។
ព័ត៌មានជាតិ ថ្មីៗ
ក្នុងឱកាសអញ្ជើញជាអធិបតីក្នុងពិធីបើកវិញ្ញាសាប្រឡងនៅវិទ្យាល័យ ១០មករា១៩៧៩ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប មានប្រសាសន៍ថា សូមឲ្យប្អូនៗទាំងអស់គ្នា គោរពទៅតាមបទប្បញ្ញត្ដិរបស់ក្រសួង និង ជូនពរសូមឲ្យប្អូនៗ ប្រឡងជាប់គ្រប់ៗគ្នា ។
គួររំលឹកផងដែរថា ក្នុងពិធីចែករង្វាន់សិស្សសិស្សឆ្នើម នៃវិទ្យាល័យអង្គរ ខេត្តសៀមរាប កាលព្រឹកថ្ងៃទី៣១ ខែកក្កដា ឆ្នាំ២០១៩កន្លងទៅនេះ ឯកឧត្តម ទៀ សីហា អភិបាលនៃគណៈអភិបាលខេត្ត បានប្រកាសជាសាធារណៈថា សិស្សានុសិស្សប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៨-២០១៩នៅក្នុងទូទាំងខេត្ត ដែលជាប់និទ្ទេស A , B និង C នឹងទទួលបានរង្វាន់លើកទឹកចិត្តពីអាជ្ញាធរខេត្តសៀមរាប ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៧-២០១៨ នៅទូទាំងខេត្តសៀមរាបមានបេក្ខជនដែលបានប្រឡងជាប់ជាស្ថាពរ ចំនួន ៥.៩៧០នាក់ ក្នុងនោះស្រីចំនួន៣.៣៨០នាក់ ហើយបេក្ខជនជាប់និទ្ទេស A មានចំនួន ៣១នាក់ ក្នុងនោះស្រីចំនួន១៨នាក់ , ជាប់និទ្ទេស B មានចំនួន១៤៧នាក់ ក្នុងនោះស្រីចំនួន៧៧នាក់ , ជាប់និទ្ទេស C មានចំនួន៤៧៧នាក់ ក្នុងនោះស្រីចំនួន២៨០នាក់ , ជាប់និទ្ទេស D មានចំនួន១.៥៣៣នាក់ ក្នុងនោះស្រីចំនួន ៩១៦នាក់ និង ជាប់និទ្ទេស E មានចំនួន ៣.៧៨២នាក់ ក្នុងនោះស្រីចំនួន ២.០៨៩នាក់ ហើយសិស្សដែលទទួលបាននិទ្ទេស A ចំនួន ៣១រូប ក្នុងនោះស្រីចំនួន១៨រូប ត្រូវទទួលបានរង្វាន់ម៉ូតូម្នាក់មួយគ្រឿង ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប ៕
អត្ថបទ ៖ លោក លីវ សាន្ត
រូបថត : សហការី
