លោកវរសេនីយ៍ឯក ជា ហេង នាយការិយាល័យនគរបាលប្រឆាំងការជួញដូរមនុស្ស និងការពារអនីតិជនខេត្ត នៃស្នងការដ្ឋាននគរបាលខេត្តសៀមរាប មានប្រសាសន៍ថា តុលាការខេត្តសៀមរាប បានសម្រេចឃុំខ្លួនថៅកែម៉ាស្សាប្រុសស្រី ៣នាក់ ដាក់ពន្ធនាគារខេត្តហើយបន្ទាប់ពីកម្លាំងនគរបាលការិយាល័យប្រឆាំងការជួញដូរមនុស្សនិងការពារអនីតិជន បានធ្វើការបង្ក្រាបទីតាំងម៉ាស្សា២កន្លែងផ្សេងគ្នាក្នុងថ្ងៃតែមួយ ដែលបង្កប់សេវាផ្លូវភេទ កាលពីយប់ថ្ងៃទី១៧ ខែកញ្ញា ឆ្នាំ២០១៨នេះ តាមបណ្តោយផ្លូវក្រវ៉ាត់ក្រុងស្ថិតក្នុងភូមិត្រៀក សង្កាត់សៀមរាប ក្រុងសៀមរាប ។
ដោយរំដោះបាននារីបំរើការនៅក្នុងហាងចំនួន៥នាក់ ដែលសុទ្ធសឹងជាអនីតិជន(អាយុក្រោម១៥ឆ្នាំ) ត្រូវបានធ្វើការប្រគល់ឱ្យទៅមន្ទីរសង្គមកិច្ចខេត្ត ដើម្បីអប់រំកែប្រែនិងផ្តល់ជំនាញផ្សេងៗ ដល់ពួកគាត់ ដែលពួកគាត់អាចទទួលយកបាន ព្រមទាំងបានបិទទីតាំងនោះជាបណ្តោះអាសន្ន ហើយបានរៀបចំកសាងសំណុំរឿងបញ្ជូនទៅតុលាការខេត្ត ។
លោក ជា ហេង មានប្រសាសន៍ទៀតថា ទីតាំងទី១. ឃាត់ខ្លួនបានថៅកែម៉ាស្សា២នាក់ ប្តីប្រពន្ធ គឺ ឈ្មោះ ថៃ នី ភេទស្រី អាយុ៣០ឆ្នាំ ត្រូវជាប្រពន្ធ មានស្រុកកំណើតភូមិផ្កាដូង ឃុំក្រូចឆ្មា ស្រុកត្បូងឃ្មុំ ខេត្តកំពង់ចាម និង ឈ្មោះ គឹម គន្ធា អាយុ៣៥ឆ្នាំ ត្រូវជាប្ដី បច្ចុប្បន្នស្នាក់នៅផ្ទះជួល បើកហាងម៉ាស្សា យីហោ ៧៧៧៧ តាមបណ្តោយផ្លូវក្រវ៉ាត់ក្រុងក្នុងភូមិត្រៀក សង្កាត់សៀមរាប និង ទីតាំងទី២. ឈ្មោះ ទុយ ស្រីមុំ ភេទស្រី អាយុ៣៧ឆ្នាំ ស្រុកកំណើតភូមិចុងឃ្នៀស សង្កាត់ចុងឃ្នៀស ក្រុងសៀមរាប ដែលមានយីហោ 999 បច្ចុប្បន្នស្នាក់នៅភូមិត្រៀក សង្កាត់សៀមរាប ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
