ក្រុមបាល់ទាត់ Angkor Tiger នៅថ្ងៃអាទិត្យ ទី២៣ ខែ កញ្ញា ចុងសប្តាហ៍នេះ វេលាម៉ោង០៣៖៣០នាទី និងមានភារកិច្ចដ៏ធំ ទទួលក្រុមភ្ញៀវ អតីតម្ចាស់ជើងឯកលីគកំពូលកម្ពុជា៣សម័យ បឹងកេត ហ្វេស៊ី នៅពហុកីឡាដ្ឋានស្វាយធំ ដែលជាជំនួបដ៏ជក់ចិត្តសម្រាប់អ្នកគាំទ្រវិស័យកីឡាក្នុងខេត្តសៀមរាប ។
ក្នុងជំនួបហ្វឹកហាត់ ដើម្បីត្រៀមការប្រកួតក្នុងសប្តាហ៍ទី២១ ពានរង្វាន់ Metfone Cambodia League ២០១៨ អតីកីឡាករជម្រើសជាតិកម្ពុជា និងជាខ្សែប្រយុទ្ធដ៏ស្រួចរបស់ក្រុមបាល់ទាត់ Angkor Tiger កីឡាករ តាំង សុភ័ត្រ រំពឹងថា ក្រុមរបស់ខ្លួន និងធ្វើបានល្អ ជាពិសេសរូបគេផ្ទាល់ និងព្យាយាមរកគ្រាប់ បាល់បន្ថែម ជាការដូសម្រាប់អ្នកគាំទ្រ ។
ក្លឹបបាល់ទាត់ Angkor Tiger ក្នុងប៉ុន្មានប្រកួតកន្លងមកនេះ បានបង្ហាញទម្រង់លេងយ៉ាងល្អដោយ យកឈ្នះ ក្រុមវេស្ទើនភ្នំពេញ៣ទល់១ និង០ស្មើជាមួយអាស៊ីអឺរ៉ុបយូណាយធិត រួមទាំងក្រសោបបានលទ្ធផលយ៉ាងល្អក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន ដោយឡើងទៅដល់វគ្គ៤ក្រុមចុងក្រោយ។
ជាមួយគ្នានេះ លោក Oriol Mohedano គ្រូបង្វឹកក្រុមបាល់ទាត់ Angkor Tiger បានឱ្យដឹងដែរថា ក្រុមបឹងកេតជាក្រុមដែលខ្លាំង នឹងមានបទពិសោធន៍ច្រើនទាំងក្នុងប្រទេស នឹងក្រៅប្រទេស ប៉ុន្តែមិនមែនជា ឧបស័គ្គធំសម្រាប់ក្រុម Angkor Tiger ឡើយ ព្រោះការប្រកួតនេះ ធ្វើនៅទឹកដីខេត្តសៀមរាប ហើយយើង មានអ្នកគាំទ្រជាច្រើនដែលប្រៀបបាន និងកីឡាករទី១២ ក្នុងទីលាន ។
ពាន់រង្វាន់ Metfone Cambodia league ២០១៨ ឈានមកដល់សប្តាហ៍ទី២១នេះ ក្រុមនីមួយៗ នៅសល់តែពីរប្រកួតទៀតតែប៉ុណ្ណោះ ដែលបច្ចុប្បន្ន ក្រុមណាហ្គាវើលឈរនៅកំពូលតារាងមាន ៥០ពិន្ទុ បឹងកេត ហ្វេស៊ី មាន ៤៨ពិន្ទុ ឈនៅលេខរៀងទី ២ ឯ Angkor Tiger ឈនៅលេខរៀងទី ៧ មាន26ពិន្ទុ ៕
អត្ថបទដោយ : ប៊ុង ឆវ័ន្ត
រូបភាពដោយ : វ៉ាន់ លីហួង
