ថ្លែងក្នុងសន្និសីទសារព័ត៌មានមួយ កាលពីព្រឹកថ្ងៃទី១៩ ខែកញ្ញា ឆ្នាំ២០១៨ព្រឹកមិញនេះ លោក សៀន សុវណ្ណា អគ្គនាយកសាលាអន្តរជាតិ ភូឆឺរប្រាយ និងជាសាកលវិទ្យាធិការ នៃសាកលវិទ្យាល័យ សៅស៍អីសថ៍អេយសៀ ខេត្តសៀមរាប មានប្រសាសន៍ថា កត្តាសំខាន់ៗ ដែលនាំមកនូវលទ្ធផលនៃការសិក្សារបស់សិស្សបានល្អ គឺផ្តើមចេញពីការព្យាយាមសិក្សារៀនសូត្ររបស់សិស្ស ដោយផ្អែកលើគុណភាពអប់រំរបស់សាលា ការខិតខំប្រឹងប្រែងប្រកបដោយទេពកោសល្យក្នុងការផ្ទេរចំណេះវិជ្ជារបស់គ្រូបង្រៀន ដែលក្នុងនោះ មានការសិក្សាស្រាវជ្រាវកម្មវិធីសិក្សា , មានកិច្ចសហប្រតិបត្តិការជាមួយដៃគូក្រៅប្រទេស , រក្សាឲ្យបានលទ្ធផលទទួលស្គាល់គុណភាពអប់រំ , ជ្រើសរើសគ្រូល្អមកបង្រៀន ថ្នាក់ដឹកនាំ បុគ្គលិក មានការគ្រប់គ្រងល្អ សាលាមានវិន័យច្បាស់លាស់ឲ្យសិស្សអនុវត្ត ជំរុញការកាត់បន្ថយអត្រាត្រួតថ្នាក់របស់សិស្ស ជាដើម ។ល។
លោក សៀន សុវណ្ណា បានបញ្ជាក់ទៀតថា គោលដៅនៃជីវិតសិក្សារបស់សិស្ស គឺសាលាដែលមានការទទួលស្គាល់គុណភាពអប់រំ ទាំងកម្រិតថ្នាក់ជាតិ ថ្នាក់តំបន់ និងថ្នាក់អន្តរជាតិ ដើម្បីបានការសិក្សារបស់សិស្ស ទទួលបាននូវចំណេះវិជ្ជា ដែលឆ្លើយតបបានទៅនឹងទីផ្សារការងារ ទាំងក្នុងប្រទេសនិងក្រៅប្រទេស ដូច្នេះហើយបានជា សិស្សដែលបានរៀននៅក្នុងសាលានេះ បានប្រឡងជាប់សញ្ញាបត្រមធ្យមសិក្សាបឋមភូមិ ១០០ភាគរយ ក្នុងរយៈពេល ៦ឆ្នាំជាប់ៗគ្នា និងប្រឡងជាប់សញ្ញាបត្រមធ្យមសិក្សាទុតិយភូមិ ១០០ភាគរយ ក្នុងរយៈពេល ៤ឆ្នាំ ជាប់ៗគ្នា ។
លោក សៀន សុវណ្ណា បានបញ្ជាក់បន្ថែមទៀតថា ជាក់ស្ដែង សម្រាប់ឆ្នាំសិក្សា ២០១៧-២០១៨នេះ សាលាអន្តរជាតិភូឆឺរប្រាយ មានសិស្សចូលប្រឡងសញ្ញាបត្រមធ្យមសិក្សាទុតិយភូមិ ចំនួន៨៩នាក់ ក្នុងនោះស្រីចំនួន៤៧នាក់ ជាលទ្ធផល សិស្សទទួលបាននិទ្ទេស A ចំនួន៤នាក់ ជាសិស្សស្រីទាំងអស់ , សិស្សទទួលបាននិទ្ទេស B ចំនួន១២នាក់ ក្នុងនោះស្រីចំនួន៦នាក់ , សិស្សទទួលបាននិទ្ទេស C ចំនួន២៥នាក់ ក្នុងនោះស្រីចំនួន១៣នាក់ , សិស្សទទួលបាននិទ្ទេស D ចំនួន៣០នាក់ ក្នុងនោះស្រីចំនួន១៧នាក់ និង សិស្សទទួលបាននិទ្ទេស E ចំនួន១៨នាក់ ក្នុងនោះស្រីចំនួន៧នាក់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
