កាលពីព្រឹកថ្ងៃទី ២០ ខែ កញ្ញា ឆ្នាំ២០១៨នេះ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី បានអញ្ជើញជាអធិបតីក្នុងការប្រគល់ផ្ទះមនុស្សធម៌ចំនួន២ខ្នង គឺផ្ទះមនុស្សធម៌ទី៥៨ និង ផ្ទះមនុស្សធម៌ទី៥៩ ដែលមួយខ្នងៗ មានទំហំ ៥ម៉ែត្រគុណនឹង៦ម៉ែត្រ ធ្វើអំពីឈើ ប្រក់ស័ង្កសីភ្លីធំ ក្រាលក្ដារ ជញ្ជាំងក្ដារ តម្កល់លើជើងតាង កម្ពស់១,៨០ម៉ែត្រ។
ដែលជាអំណោយរបស់លោកជំទាវឧកញ៉ា សៀង ចាន់ហេង អគ្គនាយិការក្រុម ហ៊ុនហេងអភិវឌ្ឍន៍ និង សប្បុរសជនចិន ឈ្មោះ LEE KIN LING បានផ្តល់តាមរយៈសាខាកាកបាទក្រហមកម្ពុជាខេត្តសៀមរាប ត្រូវបានប្រគល់ជូនគ្រួសារទីទ័លក្រ គ្មានទីពឹង ចំនួន២គ្រួសារ ដែលមួយគ្រួសារនៅភូមិ ប្រិយ៍ ឃុំពពេល និង មួយគ្រួសារទៀត នៅភូមិអង្គុញ ឃុំសំរោង ស្រុកសូទ្រនិគម រួមទាំងអំណោយមនុស្សធម៌បន្ថែមដែលក្នុងមួយគ្រួសារ ទទួលបានអង្ករចំនួន ៥០គីឡូក្រាម , មីចំនួន១កេស , កន្ទេលចំនួន១ , ត្រីខចំនួន១យួរ , ទឹកស៊ីអ៊ីវចំនួន១យួរ , ឃីតចំនួន ១កញ្ចប់ , សម្ភារផ្ទះបាយចំនួន១៧មុខ និងថវិកាចំនួន២០ម៉ឺនរៀល ។
សូមបញ្ជាក់ថា ផ្ទះមនុស្សធម៌ទី៥៨ ត្រូវបានប្រគល់ជូនគ្រួសារលោកយាយឈ្មោះ ចែម អូយ អាយុ៧៥ឆ្នាំ ជាគ្រួសារទីទ័លក្រ រស់នៅភូមិប្រិយ៍ ឃុំពពេល បច្ចុប្បន្នដើរស៊ីឈ្នួលដកស្ទួង និង ដកដំឡូង ដើម្បីទ្រទ្រង់ជីវភាពប្រចាំថ្ងៃ ដោយមានចៅតូចៗ២នាក់នៅក្នុងបន្ទុក និង ផ្ទះមនុស្សធម៌ទី៥៩ ត្រូវបានប្រគល់ជូនគ្រួសារឈ្មោះ យ៉ាវ រស់ អាយុ៥៤ឆ្នាំ ជាជនពិការភ្នែកស្តាំ ដែលជាអតីតសេនាជន ហើយបានទទួលរងរបួសនៅក្នុងសមរភូមិវត្តគ្រៀល ឃុំពពេល មានប្រពន្ធឈ្មោះ ឃួន ឃន់ អាយុ៤៦ឆ្នាំ ដើរស៊ីឈ្មួលដកស្ទូង និង ឃ្វាលគោឲ្យអ្នកភូមិ រស់នៅភូមិអង្គុញ ឃុំសំរោង ស្រុកសូទ្រនិគម ខេត្តសៀមរាប ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
