នៅព្រឹកថ្ងៃទី ២១ ខែកញ្ញា ឆ្នាំ២០១៨ ព្រឹកមិញនេះ ឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខកាកបាទក្រហមកម្ពុជាខេត្ត និង ជាអភិបាលខេត្តសៀមរាប បានអញ្ជើញចុះចែកអំណោយសង្គ្រោះបន្ទាន់ ដល់ពលរដ្ឋរងគ្រោះដោយជំនន់ទឹកបឹងទន្លេសាប ចំនួន១៣១គ្រួសារ ក្នុងឃុំអន្លង់សំណរ ស្រុកជីក្រែង ដែលបានមកស្នាក់ទីទួសុវត្ថិភាពនទំនប់៧៨ ស្ថិតក្នុងភូមិស្តៅ ដែលក្នុងមួយគ្រួសារទទួលបាន មានមុង១ , ក្រមានិងខោអាវ១កញ្ចប់ , ត្រីខ ១យួរ , មី ១កេស , អង្ករ ២៥គីឡូក្រាម ,ទឹកសុទ្ធ ២យួរ , តង់១ និង ថវិកាចំនួន៥ម៉ឺនរៀល ។
មានប្រសាសន៍ក្នុងឱកាសនោះ ឯកឧត្តមបណ្ឌិត ឃឹម ប៊ុនសុង បានពាំនាំប្រសាសន៍ផ្ដាំផ្ញើសួរសុខទុក្ខ ពីសំណាក់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចជាកាលសម្ដេចទាំងពីរ តែងតែគិតគូរដល់សុខទុក្ខប្រជាពលរដ្ឋពេលកំពុងទទួលនូវការលំបាក គឺមិនទុកឲ្យបងប្អូនណាម្នាក់ស្លាប់ និងគ្មានទីជម្រកនោះឡើយ ទីណាមានការលំបាកទីនោះមានកាកបាទក្រហមកម្ពុជាជានិច្ច ហើយកាកបាទក្រហមកម្ពុជា តែងតែផ្ដល់ស្បៀងអាហារជាក់ស្ដែងដល់បងប្អូនដែលជួបការលំបាកគ្រប់កាលវេលាជួបការលំបាក និងគ្រប់ទីកន្លែង ដោយមិនរើសអើង ប្រកាន់និន្នាការ ពណ៌សម្បុរឡើយ ។
លោក ពៅ ប៊ុនធឿន អភិបាលស្រុកជីក្រែង បានបញ្ជាក់ថា ចាប់ពីថ្ងៃទី១៣ដល់ទី១៩ កន្លងមកនេះ នៅភូមិសាស្ត្រស្រុកជីក្រែង បានទទួលរងឥទ្ធិពលទឹកភ្លៀង ខ្យល់កន្ទ្រាក់ បាតុភូតផ្គររន្ទះ ព្រមទាំងធ្វើឲ្យមានជំនន់ទឹកភ្លៀងបានលិចផ្ទះសម្បែង និង ដំណាំស្រូវរបស់ប្រជាពលរដ្ឋ ក្នុងនោះរួមមាន ៖ រន្ទះបាញ់រងរបួសកុមារ៣នាក់ , លំនៅដ្ឋានលិចទឹកដោយជំនន់ទឹកភ្លៀង និង ទឹកបឹងទន្លេសាប សរុបចំនួន៨៤១ខ្នង , លំនៅដ្ឋានលិចធ្ងន់ធ្ងរ ចំនួន២០៧គ្រួសារ , លិចដំណាំស្រូវចំនួន ៧៣៩ហិកតា , ខូចចខាតនូវហេដ្ឋារចនាសម្ព័ន្ឋក្នុងមូលដ្ឋានឃុំអន្លង់សំណរ ដោយសារទឹកហូរកាត់ផ្លូវចំនួន១០កំណាត់ ប្រវែងសរុប៨.៦៤៥ម៉ែត្រ ទឹកលិចនិងហូរកាត់ដាច់ប្រឡាយប្រវែង២២០ម៉ែត្ រនៅឃុំគោកធ្លកក្រោម ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
