នៅព្រឹកថ្ងៃទី២២ ខែកញ្ញា ឆ្នាំ២០១៨ ព្រឹកមិញនេះ ឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជាខេត្ត និង ជាអភិបាលខេត្តសៀមរាប រួមនឹងសហការី បានអញ្ជើញចុះចែកអំណោយមនុស្សធម៌ ជូនដល់គ្រួសារក្រីក្រខ្វះខាតស្បៀង ចំនួន៩៥គ្រួសារ នៅក្នុងស្រុកពួក ក្នុងនោះនៅឃុំសសរស្ដម្ភ មាន៥ភូមិ ស្មើនឹង១៦គ្រួសារ , ឃុំមុខប៉ែន មាន៥ភូមិ ស្មើនឹង២៣គ្រួសារ , ឃុំយាង មាន៥ភូមិ ស្មើនឹង២៥គ្រួសារ , ឃុំក្ដីរុន មាន៦ភូមិ ស្មើនឹង១៦គ្រួសារ និង ឃុំព្រៃជ្រូក មាន១ភូមិ ស្មើនឹង១៥គ្រួសារ ដែលក្នុងមួយគ្រួសារទទួលបាន មានឃីត១កញ្ចប់ រួមមានមុង ភួយ សារុង ក្រមា , ប្រេងឆា ១ដប , មី ១កេស , អង្ករ ២៥គីឡូក្រាម ,ទឹកស៊ីអ៊ីវ ១យួ និង ថវិកាចំនួន២ម៉ឺនរៀល ដែលពិធីនេះ បានប្រារព្ធធ្វើឡើងនៅវត្តសសរស្ដម្ភ ស្ថិតក្នុងឃុំសសរស្ដម្ភ ។
មានប្រសាសន៍ក្នុងឱកាសនោះ ឯកឧត្តមបណ្ឌិត ឃឹម ប៊ុនសុង បានពាំនាំប្រសាសន៍ផ្ដាំផ្ញើសួរសុខទុក្ខ ពីសំណាក់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចជាកាលសម្ដេចទាំងពីរ តែងតែគិតគូរដល់សុខទុក្ខប្រជាពលរដ្ឋពេលកំពុងទទួលនូវការលំបាក គឺមិនទុកឲ្យបងប្អូនណាម្នាក់ស្លាប់ដោយសារដាច់ស្បៀងឡើយ ទីណាមានការលំបាក ទីនោះមានកាកបាទក្រហមកម្ពុជាជានិច្ច ហើយកាកបាទក្រហមកម្ពុជា តែងតែផ្ដល់ស្បៀងអាហារជាក់ស្ដែងដល់បងប្អូនដែលជួបការលំបាកគ្រប់កាលវេលា និងគ្រប់ទីកន្លែង ដោយមិនរើសអើង ប្រកាន់និន្នាការ និង ពណ៌សម្បុរឡើយ ។
ឯកឧត្តមបណ្ឌិត ឃឹម ប៊ុនសុង មានប្រសាសន៍ទៀតថា នេះគឺជាកំណត់ត្រាឆន្ទៈ នៃសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលត្រូវបានបញ្ជ្រាបចូលទៅក្នុងឆន្ទៈនៃប្រតិបត្តិករការងារមនុស្សធម៌ ដើម្បីបញ្ចេញសកម្មភាពលើគ្រប់ផ្នែក ទាំងការអំពាវនាវស្វែងរកមូលនិធិសប្បុរសធម៌តាមគ្រប់រូបភាព តាមរយៈនៃការបំផុលចលនា វប្បធម៌ចែករំលែក និងការដឹកជញ្ជូនអំណោយទៅកាន់គោលដៅនៃការជួយសង្គ្រោះ ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
