នៅថ្ងៃទី២០ ខែកញ្ញា ឆ្នាំ២០១៨ ម្សិលមិញនេះ សប្បុរសជនអតីតសិស្សសាលាបឋមសិក្សាវត្តរាជបូព៌ សប្បុរសជនជប៉ុន និងសប្បុរសជននៅទីក្រុងភ្នំពេញ បាននាំយកអំណោយ ចែកជូន ដល់ប្រជាពលរដ្ឋក្រីក្រ ជួបគ្រោះទឹកជំនន់ ចំនួន២៣៩គ្រួសារ រស់នៅក្នុងភូមិចុងឃ្នាស សង្កាត់សៀមរាប ក្រុងសៀមរាប ខេត្តសៀមរាប។
លោក ឈាវ ហ៊ា នាយកសាលាវិចិត្រសិល្បៈតូច នៅក្នុងក្រុងសៀមរាប បានឲ្យដឹងថា ដំបូងឡើយ លោកស្រី តូម៉ូកុ កាសាហារ៉ា ជាម្ចាស់សាលា វិចិត្រសិល្បៈតូច មានបំណងចង់ចែករំលែកទុក្ខលំបាករបស់ប្រជាពលរដ្ឋក្នុងភូមិចុងឃ្នាសនេះ ទៅតាមលទ្ធភាពរបស់លោកស្រីប៉ុណ្ណោះ ប៉ុន្ដែដោយបានមើលឃើញពី ចំនួនប្រជាជនទទួលរងនូវផលប៉ះពាល់គ្រោះទឹកជំនន់មានចំនួនច្រើន លោក ឈាវ ហ៊ា បានអំពាវនាវដល់អតីតសិស្សរួមជំនាន់នៃសាលាបឋមសិក្សាវត្តរាជបូព៌ និងមិត្តភក្តិដទៃទៀត ទើបធ្វើឲ្យមានការជួយគាំទ្រនូវគម្រោងនេះ ដោយជួយឧបត្ថម្ភអង្ករ ជាហូរហែរ ធ្វើឲ្យសកម្មភាពសប្បុរសធម៌នេះ មានលទ្ធភាពនាំយកអង្ករទាំងនេះ ចែកជូនដល់ប្រជាពលរដ្ឋរហូតដល់ទៅ ២៣៩គ្រួសារ។
លោកចៅសង្កាត់សៀមរាប បានមានប្រសាសន៍ថា ដោយសារកម្ពស់ទឹកទឹកទន្លេ មានការកើនឡើងជាបន្តបន្ទាប់ ធ្វើឲ្យលំនៅដ្ឋានរបស់ប្រជាពលរដ្ឋក្នុងចំណុចភូមិសាស្ត្រនេះ ត្រូវបានលិច ប្រជាពលរដ្ឋមួយចំនួន បាននាំគ្នាបន្លាស់ទី មកសាងសង់ខ្ទមតូចៗ នៅលើទីទួលសុវត្ថិភាព ដោយពុំបានទៅនេសាទត្រី ដើម្បីរកចំណូលសម្រាប់ជួយគ្រួសារឡើយ។
ព័ត៌មានជាតិ ថ្មីៗ
ក្នុងនាមជាអាជ្ញាធរមូលដ្ឋាន លោកសូមថ្លែងអំណរគុណ ចំពោះសប្បុរសជនជិតឆ្ងាយទាំងអស់ ដែលបានជួយដល់ប្រជាពលរដ្ឋក្នុងមូលដ្ឋានរបស់យើងខ្ញុំ ដែលកំពុងតែជួបការលំបាក ខ្វះខាតដោយសារទឹកជំនន់លិចលង់លំនៅដ្ឋាន និងសូមអំពាវនាវដល់បងប្អូនប្រជាពលរដ្ឋ ទាំងអស់មានការ ប្រុងប្រយ័ត្នចំពោះមនុស្សចាស់ ក្មេងៗ និងទ្រព្យសម្បត្តិទាំងឡាយ កុំឲ្យមានការបាត់បងក្នុងរដូវទឹកជំនន់នេះ ជាពិសេស ពិសារអាហារមានអនាម័យ សម្រាន្តក្នុងមុង ចៀសវាងកើតជំងឺតាមមកពីទឹកជំនន់នេះ។
អំណោយសប្បុរសធម៌ ដែលបានចែកជូនដោយ សប្បុរសជនជាតិ និងអន្តរជាតិ ព្រមទាំងអាជ្ញាធរមូលដ្ឋាននាពេលនោះ មានអង្ករទំងន់សរុប ២៣៩០គីឡូក្រាម ដោយក្នុងមួយគ្រួសារទទួលបានអង្ករ១០ គីឡូក្រាម។
អត្ថបទ និង រូបថត ៖ សហការី
កែសម្រួលអត្ថបទ ៖ លោក សេង ផល្លី
