តាមការចុះផ្សាយរបស់ទីភ្នាក់ងារចិនស៊ិនហួ ចេញផ្សាយនៅថ្ងៃអង្គារ ទី២៧ ខែសីហានេះ បានឲ្យដឹងថា យានអវកាស Soyuz របស់រុស្ស៊ី ដែលធ្វើដំណើរជាមួយ នឹងរ៉ូបូតរូបរាងជាមនុស្ស បានចូលចតដោយជោគជ័យ ជាមួយស្ថានីយ៍អវកាសអន្តរជាតិ (ISS) កាលពីថ្ងៃអង្គារ បន្ទាប់ពីការប៉ុនប៉ង បរាជ័យម្តងរួចមក។
យោងតាមទីភ្នាក់ងារ អវកាសរដ្ឋរុស្ស៊ី Roscosmos បានឱ្យដឹងថា ការចុះចតជោគជ័យ នៃរ៉ូបូតដែលមានរូបរាង ជាមនុស្សមានឈ្មោះថា Skybot F-850 និងមានឈ្មោះហៅក្រៅថា Fedor មានន័យថា ជាការចាប់ផ្តើមតេស្តសមត្ថភាព ដើម្បីបំពេញភារកិច្ច ដែលមានគ្រោះថ្នាក់នៅលើយានអវកាស ISS នឹងស្ថិតនៅក្នុងគន្លងគោចរ ហើយបេសកកម្មនេះ នឹងបន្តធ្វើរហូតដល់ដើមខែកញ្ញា។
ក្នុងអំឡុងពេល នៃការប៉ុនប៉ងចូលចតជាលើកដំបូង កាលពីថ្ងៃសៅរ៍កំហុសមួយ បានកើតឡើង នៅក្នុងឧបករណ៍របស់ ISS ដែលទទួលខុសត្រូវ ចំពោះវិធីសាស្ត្រសុវត្ថិភាពនិងការរាំងស្ទះ ដែលធ្វើឱ្យមជ្ឈមណ្ឌលត្រួតពិនិត្យ បេសកកម្មសម្រេចចិត្តពាន្យាពេលយានអវកាស ទៅក្នុងចម្ងាយសុវត្ថិភាព ដើម្បីធានាសុវត្ថិភាពរបស់នាវិក និងស្ថានីយ៍ជាបណ្តោះអាសន្ន៕
ប្រភព ៖ដើមអំពិល
ប្រែសម្រួល:ស៊ុនលី
