ប្រធានាធិបតីអាមេរិក លោក ដូណាល់ ត្រាម បាននិយាយនៅថ្ងៃព្រហស្បតិ៍ សប្ដាហ៍នេះថា ចំនួនកងទ័ពសហរដ្ឋអាមេរិក នៅក្នុងប្រទេសអាហ្វហ្គានីស្ថាន នឹងត្រូវកាត់បន្ថយ ឲ្យនៅសល់តែ៨.៦០០ប៉ុណ្ណោះ ប៉ុន្តែថា កងកម្លាំងអាមេរិក នឹងនៅតែមានវត្តមាន នៅក្នុងប្រទេសនោះ បើទោះជាទីក្រុងវ៉ាស៊ីនតោន បានធ្វើកិច្ចព្រមព្រៀងគ្នាមួយ ជាមួយពួកតាលីបង់ ដើម្បីបញ្ចប់សង្គ្រាម អូសបន្លាយ១៨ឆ្នាំនេះក៏ដោយ។
នៅក្នុងបទសម្ភាសន៍មួយ លោក ត្រាំ បានមានប្រសាសន៍យ៉ាងដូច្នេះថា “បាទ អ្នកត្រូវតែរក្សាវត្តមាន យើងនឹងរក្សាវត្តមាននៅទីនោះ។ យើងកំពុងតែកាត់បន្ថយ វត្តមាននោះយ៉ាងច្រើន តែយើងតែងតែមានវត្តមាន គឺយើងនឹងមាន ការស៊ើបការណ៍សម្ងាត់ខ្ពស់”។
គួរបញ្ជាក់ថា តាមសេចក្តីរាយការណ៍ ពីទីភ្នាកងាក់សារព័ត៌មាន Yahoo News ចេញផ្សាយនៅថ្ងៃទី៣០ ខែសីហា ឆ្នាំ២០១៩ បានឲ្យដឹងថា នាពេលបច្ចុប្បន្ននេះ បុគ្គលិកយោធាសហរដ្ឋអាមេរិក ប្រមាណ១៤.០០០នាក់ នៅក្នុងប្រទេសអាហ្វហ្គានីស្ថាន ដែលក្នុងចំណោមនោះ ប្រមាណ៥.០០០នាក់ គឺត្រូវបានគេឧទ្ទិស្សនាម ឲ្យធ្វើប្រតិបត្តិការ ប្រឆាំងការប៉ះបោរ៕
ប្រភព ៖ដើមអំពិល
ប្រែសម្រួល៖ប៉ាង កុង
