នៅព្រឹកថ្ងៃទី៣១ ខែសីហា ឆ្នាំ២០១៩នេះ កូនឈើចម្រុះជាង ១ម៉ឺន៧ពាន់ដើម ត្រូវបានយកទៅដាំនៅក្នុងឧទ្យានជាតិព្រះបាទជ័យវរ្ម័ន នរោត្តម ភ្នំគូលែន ស្ថិតនៅក្នុងភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប ក្រោមអធិបតីភាព សម្ដេចពិជ័សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពាជាតិ និងលោកជំទាវ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងលោកជំទាវ ដោយមានការចូលរួមពីមន្ត្រីជាន់ខ្ពស់ ក្រសួងការពារជាតិ និងក្រសួងបរិស្ថាន ព្រមទាំងមន្ទីរអង្គភាពទូទាំងខេត្ត និងកងកម្លាំងប្រដាប់អាវុធទាំង៣ប្រភេទផងដែរ។
សម្ដេចពិជ័យសេនា ទៀ បាញ់ មានប្រសាសន៍ក្នុងឱកាសនោះថា ការចូលរួមដាំកូនឈើនាពេលនេះ គឺជាសារមួយជូនដល់ប្រជាពលរដ្ឋកម្ពុជាទូទាំងប្រទេស ឲ្យមានស្មារតីភ្ញាក់រលឹក ក្នុងការចូលរួមការពារ និងអភិរក្សធនធានធម្មជាតិ ប្រសិនបើ យើងមិនបានជួយដាំ ថែរក្សា ការពារនោះទេ សូមកុំមករុករាន មកបំផ្លាញនៅទីនេះ ក៏ដូចជាតំបន់អភិរក្សដទៃទៀតក្នុងប្រទេសកម្ពុជា។
សម្ដេចពិជ័យសេនា បានបន្ថែមទៀតថា សកម្មភាពការដាំកូនឈើចម្រុះក្នុងតំបន់ព្រៃរិចរិល លើខ្នងភ្នំគូលែនក្នុងថ្ងៃនេះដែរ វាបានបង្ហាញពីស្មារតីទទួលខុសត្រូវរបស់រាជរដ្ឋាភិបាល រួមនិងប្រជាពលរដ្ឋ ដើម្បីរក្សាបាននូវលំនឹងបរិស្ថានធម្មជាតិ និង ធ្វើឲ្យធម្មជាតិនៅក្នុងខេត្តមួយនេះកាន់ស្រស់បំព្រង និងពោរពេញដោយពណ៌បៃតង។ ដែលព្រៃឈើទាំងអស់នេះ នាពេលអនាគតវានឹងក្លាយជាជម្រកជីវចម្រុះសំបូរបែប រីឯសហគមន៍នៅទីនេះ នឹងអាចទាក់ទាញផលប្រយោជន៍បានពីធម្មជាតិ និងមនុស្ស តាមរយៈការបង្កើតតំបន់ទេសចរណ៍ និងវប្បធម៌ជាដើម។
ព័ត៌មានជាតិ ថ្មីៗ
សូមជម្រាបថា ពិធីដាំដើមឈើក្នុងឱកាសនេះ មានគោលបំណងចូលរួមស្តារស្ថានភាពព្រៃឈើ ដែលមានភាពរិចរិលក្នុងប្រទេសកម្ពុជាឡើងវិញ ក៏ដូចជាលើកកម្ពស់ប្រព័ន្ធអេកូឡូស៊ី និងគម្របព្រៃបៃតង នៅក្នុងឧទ្យានជាតិព្រះបាទជ័យវរ្ម័ន នរោត្តម ភ្នំគូលែននេះបានល្អប្រសើរ ។ ទន្ទឹមនោះដែរ តំបន់ភ្នំគូលែន គឺរាជធានីចាស់ការពីសម័យបុរាណ ដែលសំបូរទៅដោយ ទីតាំងប្រវត្តិសាស្ត្រ ទីសក្ការៈបូជា រមណីយដ្ឋានធម្មជាតិ និងជាតំបន់ទេសចរណ៍ដ៏សំខាន់មួយក្នុងខេត្តសៀមរាប។
អត្ថបទ និង រូបថត ៖ លោក សេង ផល្លី និងលោកខេង ឧត្តម
