កុមារា កុមារី មកពីសាលាអន្តរជាតិ វេសហ្គេត ប្រមាណ១០០នាក់ បានដង្ហែរក្បួនធ្វើការផ្សព្វផ្សាយអំពី គ្រោះថ្នាក់ដល់អាយុជីវិតមនុស្ស បង្កដោយជំងឺគ្រុនឈាម និងបញ្ជ្រាបការយល់ដឹងអំពីវិធីសាស្ត្រទប់ស្កាត់ និងប្រយុទ្ធប្រឆាំងការចម្លងជំងឺគ្រុនឈាម ក្នុងក្រុងសៀមរាប កាលពីថ្ងៃទី៣១ ខែសីហា ឆ្នាំ២០១៩។
ក្នុងនាមគណៈគ្រប់គ្រងសាលាវេសហ្គេត លោក រ័ត្ន រស្មី បាន ហៅជំងឺគ្រុនឈាមថាជាជំងឺមួយ ចោទជាបញ្ហា និងជាក្តីកង្វល់របស់អាណាព្យាបាល ក៍ដូចជាអាជ្ញាធរមូលដ្ឋាន និងរាជរដ្ឋាភិបាលយើងផងដែរ ហេតុនេះ ដើម្បីការពារនិងបញ្ចៀសបានពីបញ្ហាឆ្លងជំងឺ និងស្លាប់ដោយសារជំងឺគ្រុនឈាម។ ដូច្នេះ ការដង្ហែរក្បួនផ្សព្វផ្សាយរបស់សិស្សានុសិស្សរបស់វេសហ្គេតនាពេលនេះ ដើម្បីពញ្ញាក់ស្មារតីរបស់អាណាព្យាបាល ក៏ដូចជាប្រជាពលរដ្ឋទូទៅ រួមគ្នាបំបាត់ជំរកមូស ដោយការធ្វើអនាម័យបរិស្ថានជុំវិញលំនៅដ្ឋាន សាលារៀន លុបបំបាត់ទឹកដក់ក្នុងសំបកកំប៉ុង ក្នុងកង់ឡានចាស់ៗ និងសំអាតអនាម័យផ្ទាល់ខ្លួនឱ្យបានជាប្រចាំ។ ទន្ទឹមនោះ ត្រូវសម្រានតែក្នុងមុង និងជាពិសេសត្រូវប្រយ័ត្នចំពោះកុមារតូចៗ កុំឱ្យគាត់ងូតទឹកលេង និងដើរលេងក្បែរគុម្ពោតព្រៃផ្តេសផ្តាសជាដើម ប្រយ័ត្នពេលពួកគាត់គេងនៅពេលថ្ងៃ ត្រូវដាក់មុង។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
