អង្គការកម្ពុជាអភិវឌ្ឍន៍នៃក្ដីសង្ឃឹម ដែលបានបង្កើតឡើងនៅឆ្នាំ២០១០ កំពុងជួបបញ្ហាខ្វះម្ចាស់ជំនួយ ខណៈអង្គការមួយនេះ កំពុងចិញ្ចឹមកុមារកំព្រា កុមារក្រីក្រ និងងាយរងគ្រោះចំនួន៤៦នាក់ មកពីស្រុកចំនួន៥ក្នុងខេត្តសៀមរាប។
ក្នុងឱកាសចុះសួរសុខទុក្ខកុមារកំព្រា កុមារក្រីក្រ និងងាយរងគ្រោះ ចំនួន១០០នាក់ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប ដឹកនាំដោយ អ្នកអង្គម្ចាស់ ស៊ីសុវត្ថិ អក្ខរមេសួគ៌ វេជ្ជបណ្ឌិតមកពីប្រទេសអាល្លឺម៉ង់ ម្ចាស់ក្សត្រីយ៍ ស៊ីសុវត្ថិ សោមា អគ្គរាជទូតសុឆន្ទៈដើម្បីស្ត្រីមកពីសហគមន៍អឺរ៉ុប តារាភាពយន្តឥណ្ឌា លោក កាកាន អគ្គរាជទូតសុឆន្ទៈដើម្បីសន្តិភាពពិភពលោក និង លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណ:កម្មការពិគ្រោះយោបល់កិច្ចការស្ត្រី និងកុមារខេត្តសៀមរាប ប្រធានអង្គការកម្ពុជាអភិវឌ្ឍន៍នៃក្ដីសង្ឃឹម អ្នកស្រី ឈឹម សុភ័ណ្ឌ បានធ្វើសេចក្តីរាយការណ៍ថា រយៈពេលជិត១០ឆ្នាំនៃការបង្កើតអង្គការនេះ មានគោលបំណងជួយលើកកម្ពស់ដល់ជីវភាពប្រជាពលរដ្ឋ ជាពិសេសកុមារកំព្រា កុមារងាយរងគ្រោះ និងកុមារទីទ័លក្រ ដើម្បីឲ្យកុមារទាំងអស់នោះ ទទួលបាននូវគុណតម្លៃខ្ពស់ ដែលសង្គមមនុស្សទូទៅទទួលស្គាល់និង ធ្វើយ៉ាងណាឲ្យពួកគេ មានការហូបចុកគ្រប់គ្រាន់ បានចូលរៀន រៀននូវជំនាញបំណិនជីវិត និងជំនាញផ្សេងៗ ទៅតាមចំណង់ចំណូលចិត្តរបស់ពួកគាត់ ជាពិសេសទទួលបានសិទ្ធិសេរីភាពទាំង៥យ៉ាងរបស់ពួកគាត់។
តារាភាពយន្តឥណ្ឌា លោក កាកាន អគ្គរាជទូតសុឆន្ទៈ ដើម្បីសន្តិភាពពិភពលោក បានលើកឡើងថា នេះជាលើកទី១ដែលលោកបានមកដល់ប្រទេសកម្ពុជា ចំពោះដំណើរទស្សនកិច្ចមកកម្ពុជានៅពេលក្រោយលោក នឹងរៀបចំកម្មវិធីដឹកនាំកុមារពីប្រទេសឥណ្ឌាមកជាមួយ ជាពិសេសទីនេះតែម្តង ដើម្បីឱ្យពួកគាត់បានស្វែងយល់ពីវប្បធម៌ ប្រពៃណីទំនៀមទំលាប់ការរស់នៅរបស់កុមារកម្ពុជា ហើយក៏នឹងនាំយកកុមារនៅក្នុងអង្គការកម្ពុជាអភិវឌ្ឍន៍នៃក្ដីសង្ឃឹមនេះជាបន្តបន្ទាប់ ដោយក្នុងមួយលើកៗ ប្រមាណជាចំនួន១០នាក់ឱ្យទៅទស្សនកិច្ចសិក្សានៅឥណ្ឌាវិញផងដែរ។
ចូលរួមក្នុងឱកាសនោះដែរ អ្នកអង្គម្ចាស់ក្សត្រីយ៍ ស៊ីសុវត្ថិ សោមា បានមានរាជបន្ទូលថា នេះជាលើកទី២ ដែលអ្នកអង្គម្ចាស់ក្សត្រីយ៍ បានអ្នកដឹកនាំសប្បុរសជនជាតិនិងអន្តរជាតិនាំយកសំភារៈសិក្សា ជួយឧបត្ថម្ភគាំទ្រដល់កុមារនៅទីនេះទៅតាមលទ្ឋភាពដែលអាចធ្វើបាន ប៉ុន្តែសំខាន់ សូមឲ្យកូនៗ ក្មួយៗទាំងអស់ ត្រូវខិតខំសិក្សារៀនសូត្រ ស្តាប់បង្គាប់ការអប់រំទូន្មានពីលោកឱពុកអ្នកម្តាយ លោកគ្រូអ្នកគ្រូ ចាស់ព្រឹទ្ឋាចារ្យ ជាពិសេសត្រូវគោរពដឹងគុណចំពោះប្រមុខថ្នាក់ដឹកនាំរាជរដ្ឋាភិបាលកម្ពុជា ដែលបានខិតខំពុះពារគ្រប់ឧបសគ្គ ក្នុងការរំដោះ និងស្តារអភិវឌ្ឍន៍ប្រទេសជាតិឱ្យទទួលបានសុខសន្តិភាព និងរីកចម្រើនលើគ្រប់វិស័យ។
លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណ:កម្មការពិគ្រោះយោបល់កិច្ចការស្ត្រី និងកុមារខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះអង្គការកម្ពុជាអភិវឌ្ឍន៍នៃក្ដីសង្ឃឹម និងសប្បុរសជនទាំងក្នុងនិងក្រៅប្រទេសទាំងអស់ ដែលតែងតែចូលរួមឧបត្ថម្ភគាំទ្រដល់កុមារនៅទីនេះ និងចាត់ទុកសកម្មភាពនេះថា ជាការរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍន៍ធនធានមនុស្ស ដែលបានស្វះស្វែងរកការជួយគាំទ្រពីសប្បុរសជនជាតិនិងអន្តរជាតិ ក្នុងការឧបត្ថម្ភលើកទឹកចិត្តដល់កុមារសិស្សានុសិស្ស ឱ្យខិតខំរៀនសូត្រ ។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
