លទ្ធផលនៃកិច្ចប្រជុំ រដ្ឋមន្ត្រីសុខាភិបាលអាស៊ានបូកបី ( ចិន ជប៉ុន កូរ៉េ ) លើកទី៨ ដែលជាកិច្ចប្រជុំពាក់ព័ន្ធមួយ នៅក្នុងកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៤ បានអះអាងសារជាថ្មី អំពីការប្តេជ្ញាចិត្តចំពោះគោលដៅអភិវឌ្ឍន៍ប្រកបដោយចីរភាព របស់អង្គកាសហប្រជាជាតិ ដើម្បីសម្រេចបាន ការគ្របដណ្តប់សុខភាពជាសកលនៅឆ្នាំ២០៣០។
រដ្ឋមន្ត្រីសុខាភិបាលនៃប្រទេសអាស៊ាន រដ្ឋមន្ត្រីក្រសួងសុខាភិបាល ចិន ជប៉ុន និងកូរ៉េខាងងត្បូង នៅក្នុងកិច្ចប្រជុំអាស៊ានបូក៣ បើកទី៨ ជាផ្នែកមួយនៃកិច្ចប្រជុំពាក់ព័ន្ធនៅក្នុងកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៤ ដែលបានប្រព្រឹត្តទៅនៅថ្ងៃទី ៣០ ខែសីហា ឆ្នាំ២០១៩ នៅក្រុងសៀមរាប នៃព្រះរាជាណាចក្រកម្ពុជា បានកត់សម្គាល់នៅក្នុងសេចក្តីថ្លែងការរួមរបស់ខ្លួន នាថ្ងៃទី៣០ ខែសីហា ឆ្នាំ២០១៩ នៅក្រុងសៀមរាប ដោយបញ្ជាក់ថា ៖ កិច្ចសហការក្នុងការអភិវឌ្ឍន៍វិស័យសុខាភិបាល ត្រូវបានតម្រៀបតម្រង់ជាមួយរបៀបវារៈនៃការអភិវឌ្ឍន៍សុខាភិបាលអាស៊ានក្រោយឆ្នាំ២០១៥ ដោយផ្តោតការយកចិត្តទុកដាក់រួមទៅលើសុខភាពល្អ និងសកម្មក្នុងវ័យចំណាស់ បញ្ចប់រាល់ទំរង់នៃកង្វះអាហារូបត្ថម្ភ ឆ្លើយតបនឹងការគំរាមកំហែងនៃជំងឺឆ្លង និងជំងឺឆ្លងលេចឡើងថ្មី ភាពស៊ាំនៃឱសថប្រឆាំងមេរោគ ការគ្របដណ្តប់សុខភាពជាសកល ធនធានមនុស្សក្នុងវិស័យសុខាភិបាល វេជ្ជសាស្ត្របុរាណ សុខភាពមាតានិងទារក ការឆ្លើយតបឆាប់រហ័សចំពោះបញ្ហានិងវិបត្តិសុវត្ថិភាពចំណីអាហារ ការតាមដានរកមើល និងផែនការ ដើម្បីធានាសុវត្តិភាពចំណីអាហារ និងកសាងសមត្ថភាពអង្កេតស្រាវជ្រាវជំងឺរាតត្បាត ដែលបង្ករដោយចំណីអាហារ ។
សេចក្តីថ្លែងការរួមនោះបញ្ជាក់ថា សុខភាពប្រជាជនមានសារៈសំខាន់ណាស់ ដោយមិនគិតអំពីស្ថានភាពភូមិសាស្ត្រ ភូមិសាស្ត្រនយោបាយ និងសេដ្ឋកិច្ចឡើយ ហើយក៏បានអះអាងសារជាថ្មី អំពីការប្តេជ្ញាចិត្តចំពោះគោលដៅអភិវឌ្ឍន៍ប្រកបដោយចីរភាព របស់អង្គកាសហប្រជាជាតិ ដើម្បីសម្រេចបានការត្របដណ្តប់សុខភាពជាសកលនៅឆ្នាំ២០៣០ រួមមាន ការបង្ការហានិភ័យហិរញ្ញវត្ថុ លទ្ធភាពទទួលបានសេវាថែទាំសុខភាពជាសារវ័ន្តប្រកបដោយគុណភាព ទទួលបានឱសថសារវ័ន្ត និងវ៉ាក់សាំងមានសុវត្ថិភាព ប្រសិទ្ធិភាព គុណភាព នៅក្នុងតម្លៃសមស្របទាំងអស់គ្នា ៕
សេចក្តីថ្លែងការណ៍រួម ស្តីពីកិច្ចប្រជុំ រដ្ឋមន្ត្រីសុខាភិបាលអាស៊ានបូកបី ( ចិន ជប៉ុន កូរ៉េ ) លើកទី៨ បានបង្ហាញនូវការប្តេជ្ញាចិត្ត បន្តការខិតខំប្រឹងប្រែង ក្នុងការអនុវត្តន៍ច្បាប់សុខភាពអន្តរជាតិ ( IHR 2015 ) តាមរយៈ យុទ្ធសាស្ត្រអាស៊ីប៉ាស៊ីហ្វិកដើម្បីបង្ការ និងទប់ស្កាត់ជំងឆ្លងថ្មីៗនឹងគ្រោះអាសន្នសុខភាពសាធារណៈ ( APSED III ) ដើម្បីលើកកម្ពស់សមត្ថភាពប្រទេសជាសមាជិកអាស៊ាន និងបូក៣ ក្នុងការបង្ការ ស្រាវជ្រាវរក និងឆ្លើយតបទៅនឹងការគំរាមកំហែងសុខភាពសាធារណៈ ។
ដើម្បីរក្សាវឌ្ឍនភាពដែលសម្រេចបាន សេចក្តីថ្លែងការរួមនោះ ចង្អុលបង្ហាញអំពីប្រការចាំបាច់មួយចំនួន ដូចជាត្រូវពង្រឹងការប្រយុទ្ធនឹងភាពស៊ាំឱសថប្រឆាំងមេរោគ សុវត្តិភាពចំណីអាហារ និងគ្រប់គ្រងជំងឺឆ្លងពីសត្វ ការពង្រឹងទំនាក់ទំនងអន្តរវិស័យ និងការចែករំលែកព័ត៌មាន ដោយរាប់បញ្ចូលទាំងការចែករំលែកទៀងទាត់របាយការណ៍ អង្កេត-ស្រាវជ្រាវជំងឺរាតត្បាត រវាងវិស័យសុខាភិបាលនិងវិស័យពាក់ព័ន្ធ ពង្រឹងយន្តការអន្តរវិស័យដែលមានស្រាប់ ពង្រឹងកិច្ចខិតខំប្រឹងប្រែងរួមគ្នា ក្នុងការតស៊ូមតិ សំរបសំរួល និង អនុវត្តអន្តរាគមន៍ក្នុងផ្នែកសង្គមកិច្ចនិងសេដ្ឋកិច្ចដែលពាក់ព័ន្ធ ដើម្បីដោះស្រាយជំងឺមិនឆ្លង និងកត្តាហានិភ័យនានា ក្នុងនោះមានជាអាទិ៍ ការប្រើប្រាស់ផលិតផលថ្នាំជក់ គ្រឿងស្រវឹងប្រកបដោយគ្រោះថ្នាក់ របបអាហារប៉ះពាល់សុខភាព និងរបៀបរស់នៅកង្វះកាយវប្បកម្ម ៕
អត្ថបទ និង រូបភាព ៖ លោក ងិន គឹមឡេង
