នៅព្រឹកថ្ងៃទី០២ ខែកញ្ញា ឆ្នាំ២០១៩នេះ ក្រុមការងារចម្រុះរបស់រដ្ឋបាលខេត្តសៀមរាប បានអនុវត្តន៍វិធានការក្ដៅ ទៅលើក្រុមហ៊ុនដឹកអ្នកដំណើរគ្រប់ប្រភេទ សរុបចំនួន២៤ ក្នុងខេត្តសៀមរាប ឲ្យគោរពតាមសេចក្ដីណែនាំពាក់ព័ន្ធនឹងការចូលចំណត ដែលរដ្ឋបាលខេត្តបានកំណត់ ដើម្បីរក្សាសណ្ដាប់ធ្នាប់សាធារណក្នុងក្រុងសៀមរាប។
បន្ទាប់ពីបាន ជូនដំណឹង ក៏ដូចជាណែនាំដល់ក្រុមហ៊ុន និងរថយន្តឈ្នួលគ្រប់ប្រភេទឲ្យចូលចតក្នុងចំណតទាំងពីរកន្លែងជាច្រើនដងរួចមក។ ក្រុមហ៊ុនមួយចំនួន រួមនឹងអ្នកប្រកបរបររត់តាក់ស៊ីភាគច្រើន មិនគោរពតាមសេចក្ដីជូនដំណឹងនោះ លោក ពិន ប្រាកដ អភិបាលរងខេត្តសៀមរាបបានមានប្រសាសន៍ធ្ងន់ៗថា នេះគឺជាចំណាត់ក្ដៅមួយ ដែលអាជ្ញាធរចាំបាច់ត្រូវលុបបំបាត់ឱ្យបាន នូវការចតរថយន្តគ្មានសណ្តាប់ធ្នាប់ ការឈរចាប់ម៉ូយរញ៉ែរញ៉ៃនៅតាមដងផ្លូវរបស់អ្នកក្រុមអ្នករត់ស៊ី និងក្រុមហ៊ុនរថយន្តក្រុងមួយចំនួន។ លោកអភិបាលរងខេត្ត បានបញ្ជាក់ នៅថ្ងៃទី០២ខែកញ្ញានេះ មានក្រុមហ៊ុនរថយន្តចំនួន២៣ហើយ បានចូលមកចតនៅក្នុងចំណតបុរី សៀង ណាំ នៅតែមួយក្រុមហ៊ុនប៉ុណ្ណោះដែលមិនចូលចំណត ប៉ុន្តែលោកថា ក្រុមហ៊ុនមួយនោះ នឹងចូលនៅថ្ងៃស្អែកនេះ។
ដោយឡែកការលើកឡើងរបស់ក្រុមអ្នករត់តាក់ស៊ី នៅក្រៅចំណតបាននិយាយថា នៅក្នុងចំណតរថយន្ត ក្នុងបុរី សៀង ណាំ មិនមានការរៀបចំត្រឹមត្រូវ ខ្វះអនាម័យ ខ្វះបន្ទប់ទឹក និងមិនមានកន្លែងអង្គុយរង់ចាំសមរម្យសម្រាប់អ្នកដំណើរ។
លោកឧកញ៉ា ទូច សៀ អ្នកវិនិយោគចំណតរថយន្តនៅក្នុងសៀមរាបនេះ ក៏បានទទួលស្គាល់ថា ពិតជាមានចំណុចខ្វះខាតទាំងនេះមែន លោកបានសន្យាថា លោកនឹងធ្វើការកែលម្អចំណតរថយន្តនៅក្នុងបុរី សៀង ណាំនេះ ឱ្យបានស្អាតឡើងវិញ ទៅតាមការណែនាំរបស់អាជ្ញាធរខេត្ត។ ទោះជាយ៉ាងណា លោកឧកញ៉ា ទូច សៀ បញ្ជាក់ថា ការងាររៀបចំចំណតនេះ លោកមិនអាចធ្វើម្តងបានទាំងអស់ទេ តែលោកនឹងធ្វើតាមការណែនាំរបស់អាជ្ញាធរខេត្ត។
សូមបញ្ជាក់ថា ដើម្បីធ្វើឱ្យក្រុងសៀមរាប ដែលជាតំបន់ទេសចរណ៍ដ៏សំខាន់មួយរបស់កម្ពុជាមាន សណ្តាប់ធ្នាប់ អនាម័យ បរិស្ថាន និងសោភណ្ឌភាពស្អាតនៅតាមផ្លូវសាធារណ អាជ្ញាធរខេត្តសៀមរាប បានរៀបចំឱ្យមានចំណតរថយន្តដឹកអ្នកដំណើរចំនួនពីរកន្លែង គឺនៅផ្នែកខាងកើត មានទីតាំងនៅក្នុងបុរី សៀង ណាំ ស្ថិតនៅសង្កាត់ស្លក្រាម ក្រុងសៀមរាប និង ផ្នែកខាងលិចនៅសង្កាត់ក្រង៉ែជិតបុរី សៀង ណាំ ទីពីរ ដែលអាចឱ្យរថយន្តដឹកទំនិញ និងរថយន្តដឹកអ្នកដំណើរគ្រប់ប្រភេទចូលបានយ៉ាងងាយស្រួល៕
អត្ថបទ និង រូបភាព ៖ លោក ជា ស្រស់
កែសម្រួលអត្ថបទ៖ លោក សេង ផល្លី
