នៅថ្ងៃទី០១ ខែកញ្ញា ឆ្នាំ២០១៩ វត្តចន្ទបុប្ផារាម ហៅវត្តថ្មី បានរៀបចំវិធីកាត់ខ្សែបូរដាក់ឱ្យប្រើប្រាស់ជាផ្លូវការ នូវសមិទ្ធិផលនានានៅក្នុងវត្ត ក្រោមអធិបតីភាព ឯកឧត្តម ឧកញ៉ា សៀង ណាំ សមាជិកសភា និងជាតំណាងរាស្ត្រមណ្ឌលសៀមរាប និងវត្តមាន សមាជិកសមាជិកាក្រុមការងារចុះជួយស្រុកជីក្រែង អាជ្ញាធរមូលដ្ឋាន ដូនជី តាជី និងប្រជាពលរដ្ឋក្នុងមូលដ្ឋានយ៉ាងច្រើនកុះករ។
មានប្រសាសន៍នាឱកាសនោះ ឯកឧត្តមឧកញ៉ា សៀង ណាំ ក៏បានរំលឹកឡើងដែរពីសម័យកាលដែលប្រទេសកម្ពុជា ធ្លាក់ចូលទៅក្នុងរបប្រល័យពូជជសាសន៏ ៣ឆ្នាំ ៨ខែ ២០ថ្ងៃ បណ្តាឱ្យហេដ្ឋារចនាសម្ព័ន្ធសង្គមជាតិ វត្តអារាមសាលារៀន ទ្រព្យសម្បត្តិសាធារណៈរបស់រដ្ឋ ត្រូវទទួលរងនូវការបំផ្លិចបំផ្លាញស្ទើរតែសូន្យ សូម្បីតែព្រះសង្ឃ វត្តអារាម និងសាសនាផ្សេងៗទៀត ក៏ត្រូវទទួលរងនូវការកាប់សំលាប់ និងបំផ្លិចបំផ្លាញស្ទើរតែផុតពូជដែរ។ ប៉ុន្តែ អាស្រ័យដោយមានជ័យជំនៈ ៧ មករា ឆ្នាំ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៏ និងទទួលបានសិទ្ធិសេរីភាព រួមគ្នាកសាងសង្គមជាតិឡើងវិញរហូតមានការរីកចំរើនជាលំដាប់ទាំងពុទ្ធចក្រ និងអាណាចក្រដូចឃើញជាក់ស្តែងក្នុងបច្ចុប្បន្ន។
ឯកឧត្តម មានប្រសាសន៍ទៀតថា សមិទ្ធិផលថ្មីៗដែលបានសម្ពោធឆ្លងនាពេលទាំងនេះ គឺជាផ្នែកមួយដ៏សំខាន់រួមចំណែកក្នុងការរីកចំរើននៃវិស័យពុទ្ធចក្រ ដែលត្រូវបានកំណត់ដោយរដ្ឋធម្មនុញ្ញនៃព្រះរាជាណាចក្រកម្ពុជាយើង ហើយព្រះពុទ្ឋសាសនាជាសាសនារបស់រដ្ឋ។ទន្ទឹមនឹងនេះ វិស័យពុទ្ឋចក្រនិងវិស័យអាណាចក្របានដើរទន្ទឹមគ្នាពុំអាចខ្វះមួយណាបានឡើយ ចូលរួមជួយស្តារនិងអភិវឌ្ឍន័សង្គមជាតិឱ្យបានរីកចំរើន។
ក្នុងនោះដែរឯកឧត្តម ក៏បានថ្លែងនូវការកោតសរសើរចំពោះព្រះចៅអធិការ ព្រះសង្ឃ គណៈកម្មការ អាចារ្យវត្ត អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធនធ្វើឲ្យការកសាងសមិទ្ឋផលទាំងនេះបានសម្រេចរួចរាល់ជាស្ថាពរ។ ហើយឯកឧត្តម ក៏សូម ផ្តាំផ្ញើរដល់ប្រជាពុទ្ឋបរិស័ទ រួមគ្នាថែរក្សាឱ្យបានគង់វង្សនិងថែរក្សាសំអាត និងទីវត្តអារាមទាំងមូលឱ្យបានជាប្រចាំ ព្រោះថាអ្នកប្រព្រឹត្តិអំពើល្អ រមែងនូវទទួលបាននូវផលល្អ សូមចៀសវាងនូវការចង់បានទ្រព្យសម្បត្តិ និងគរុភ័ណ្ឌវត្តធ្វើជាកម្មសិទ្ឋផ្ទាល់ខ្លួនព្រោះវាជាអំពើបាប។
បើតាមថេរដីការបស់ ព្រះគ្រូរតនវិសុទ្ឋិរង្សី ធម្មស្សី សោម ពេជ្រ ព្រះគ្រូចៅអធិការវត្តចន្ទបុប្ផារាម ( ហៅវត្តថ្មី) បានឲ្យដឹងថា វត្តចន្ទបុប្ផារាម ស្ថិតនៅភូមិត្នោត ឃុំជីក្រែង ស្រុកជីក្រែងខេត្តសៀមរាប ហើយសមិទ្ឋផលដែលសម្ពោធនាពេលនេះ រួមមាន ហោត្រៃមួយ សាងសង់ខ្លោងទ្វារបង្ហើយ បន្តពីមុនមកទាំងពីរ សាលាធម្មសភា មួយខ្នង ឧបដ្ឋានសាលាឆាន់ មួយខ្នង ចាក់ដីបំពេញទីធ្លាវត្ត រៀបចំសួនច្បាដាំដើមឈើចាក់ផ្លូវបេតុងមុខហោត្រៃ រូបសំណាកសម្តេចព្រះសង្ឃរាជ ជួនណាត ជាដើម សមិទ្ធិផលដែលត្រូវសម្ពោធឆ្លងនាថ្ងៃនេះគឺអស់ថវិកាសរុបចំនួន១៤៥.៦៤៣
(ដប់បួនម៉ឺនប្រាំពាន់ប្រាំមួយរយសែសិបបីដុល្លារ) ។
ព្រះអង្គមានថេរដីកាទៀតថា ចំពោះសមិទ្ឋផលដែរសម្រេចបានទាំងនេះ គឺបានសហការជួយឧបត្ថម្ភពីបណ្ដាពុទ្ធបរិស័ទចំណុះជើងវត្តទាំងអស់សប្បុរសជននៅក្នុងស្រុក ខេត្ត ទូទាំងប្រទេស និងក្រៅប្រទេសផងដែរ ប៉ុន្តែរហូតដល់ពេលនេះវត្តនៅជំពាក់ថ្លៃសម្ភារៈចំនួន ១៥,៣៩២$ (មួយម៉ឺនប្រាំពាន់បីរយកៅសិបពីរដុល្លារទៀតពុំទាន់សងរួច) ៕
អត្ថបទ និង រូបភាព ៖យូ វង្ស
កែសម្រួល៖ អ៊ុន ណារាជ្យ
