លោក ណាង ចំណាន មន្ត្រីសាលាខេត្តសៀមរាប ដែលកំពុងដឹកនាំការជួសជុលភ្លើងស្តុបក្នុងក្រុងសៀមរាប បានឲ្យដឹងថា ចាប់តាំងពីថ្ងៃទី៣១ ខែសីហា ឆ្នាំ២០១៩ ក្រុមការងារបច្ចេកទេសរបស់រដ្ឋបាលខេត្តសៀមរាប និង ក្រុមអ្នកបច្ចេកទេសមកពីប្រទេសវៀតណាម បាននឹងកំពុងសម្រុកធ្វើការជួសជុលភ្លើងស្តុប ឬហៅថា ភ្លើងបញ្ជាចរាចរណ៍ឡើងវិញនៅក្នុងក្រុងសៀមរាប ចំនួន០៦កន្លែង ក្នុងចំណោមភ្លើងស្តុបទាំងអស់ចំនួន១១កន្លែង ដែលបានខូចខាតក្នុងរយៈពេលកន្លងមក ដើម្បីឱ្យមានដំណើរការជាប្រក្រតីឡើងវិញ ក្នុងនោះមាន ៖
១. ភ្លើងស្តុបនៅភូមិចុងកៅស៊ូ
២. ភ្លើងស្តុបកោះកេរ
៣. ភ្លើងស្តុបនៅក្បែរសណ្ឋាគារសុខាអង្គរ
៤. ភ្លើងស្តុបផ្លូវផ្សារញ៉ែរ ក្បែរភោជនីយដ្ឋានទន្លេសាប
៥. ភ្លើងស្តុបនៅផ្សារកណ្ដាល
៦. ភ្លើងស្តុបនៅសារមន្ទីរជាតិអង្គរ ។
លោក ណាង ចំណាន បានឲ្យដឹងបន្ថែមថា ក្នុងចំណោមភ្លើងស្តុបចំនួន០៦កន្លែង ដែលនឹងត្រូវធ្វើការជួសជុលឡើងវិញនោះ មានភ្លើងស្តុបនៅសារមន្ទីរេជាតិអង្គរ បានធ្វើការផ្លាស់ប្ដូរប្រអប់បញ្ជាចាស់ទាំងស្រុង ដោយដាក់ប្រអប់បញ្ជាប្រើប្រាស់ភ្លើងប្រភេទ DC ខណៈពេលមុនបានប្រើភ្លើងប្រភេទ AC ហើយភ្លើងស្តុបនៅ០៥កន្លែងទៀត យើងធ្វើការជួសជុលឡើងវិញ ប៉ុន្តែចំពោះឧបករណ៍ណាដែលអាចជួសជុលបាន យើងជួសជុល ហើយចំពោះឧបករណ៍ណាដែលមិនអាចជួសជុលបាន យើងបានផ្លាស់ប្ដូរឧបករណ៍ថ្មី ដោយប្រើភ្លើងប្រភេទ AC ដដែល ។
លោក ណាង ចំណាន បានឲ្យដឹងបន្ថែមថា សម្ភារបច្ចេកទេសដែលបាននឹងកំពុងបំពាក់នៅតាមភ្លើងស្តុបដែលបានជួសជុលនេះ គឺមានគុណភាពល្អប្រសើរជាងមុន ហើយការជួសជុលភ្លើងស្តុបទាំង០៦កន្លែងនេះ នឹងរួចរាល់នៅវេលាថ្ងៃត្រង់ថ្ងៃទី០២ ខែកញ្ញា ឆ្នាំ២០១៩ ព្រោះក្រុមការងារ កំបុងសម្រុកធ្វើការទាំងយប់ទាំងថ្ងៃ ។
លោក សុខ ថុល នាយករដ្ឋបាលសាលាខេត្តសៀមរាប បានមានប្រសាសន៍ថា ដោយមានការណែនាំពីឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប បានសម្រេចធ្វើការជួសជុលភ្លើងស្តុបក្នុងក្រុងសៀមរាប ដែលបានខូចខាតមិនដំណើរការរយៈកាលកន្លងមក ឱ្យមានដំណើរការជាប្រក្រតីឡើងវិញ ដើម្បីជួយសម្រួលដល់ការធ្វើដំណើរ របស់បងប្អូនប្រជាពលរដ្ឋទាំងនៅក្នុងខេត្ត ក្នុងប្រទេស និង ភ្ញៀវទេសចរអន្តរជាតិ ដែលបានកំពុងធ្វើដំណើរកំសាន្តនៅក្នុងខេត្តសៀមរាប ។
លោក សុខ ថុល បានមានប្រសាសន៍បន្ថែមថា ក្នុងនាមអាជ្ញាធរខេត្តសៀមរាប សូមធ្វើការអធ្យាស្រ័យពីបងប្អូនប្រជាពលរដ្ឋក្នុងខេត្ត ក៏ដូចជាភ្ញៀវទេសចរជាតិ និង អន្តរជាតិទាំងអស់ដែលបានឆ្លងកាត់ នៅក្នុងអំឡុងពេលកំពុងធ្វើការជួសជុលភ្លើងស្តុបទាំង០៦កន្លែងនេះ ហើយនៅពេលដែលភ្លើងស្តុបទាំងអស់បានដំណើរការជាប្រក្រតីហើយនោះ សូមបងប្អូនទាំងអស់ដែលកំពុងបើកបរ គោរពភ្លើងសញ្ញាចរាចរណ៍ឲ្យបានគ្រប់ៗគ្នា ដើម្បីចៀសវាង និង បង្ការនូវគ្រោះថ្នាក់ចរាចរណ៍ ដែលបានកើតឡើងដោយសារការធ្វសប្រហែស ឬដោយប្រការណាមួយ ជាពិសេសត្រូវចេះយោគយល់ និង អធ្យាស្រ័យឲ្យគ្នាទៅវិញទៅមក និង សូមគោរពឲ្យខ្ជាប់ខ្ជួននូវអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍ ។
សូមបញ្ជាក់ថា នៅក្នុងក្រុងសៀមរាប មានភ្លើងស្តុបទាំងអស់ចំនួន ១១ កន្លែង គឺ ៖
១. ភ្លើងស្តុបនៅភូមិចុងកៅស៊ូ
២. ភ្លើងស្តុបនៅក្បែរសណ្ឋាគារស្មាយលីង កែងផ្លូវ៦០ម៉ែត្រ
៣.ភ្លើងស្តុបកែងផ្លូវលោកតាណឺយ ខាងលិចផ្សារលើធំថ្មី
៤. ភ្លើងស្តុបកោះកេរ , ៥. ភ្លើងស្តុបនៅក្បែរសណ្ឋាគារសុខាអង្គរ
៦. ភ្លើងស្តុបផ្លូវផ្សារញ៉ែរ ក្បែរភោជនីយដ្ឋានទន្លេសាប
៧. ភ្លើងស្តុបនៅផ្សារកណ្ដាល
, ៨. ភ្លើងស្តុបនៅក្បែរសាលារៀនគ្រួស
៩. ភ្លើងស្តុបនៅរង្វង់មូលរូបសំណាកព្រះបាទជ័យវរ្ម័នទី៧ កែងផ្លូវទៅព្រលានយន្តហោះអន្តរជាតិសៀមរាប
១០. ភ្លើងស្តុបនៅសារមន្ទីរជាតិអង្គរ
១១. ភ្លើងស្តុបនៅមន្ទីរពេទ្យកុមារជ័យវរ្ម័នទី៧ ឬមន្ទីរពេទ្យកុមារគន្ធបុប្ផាខេត្តសៀមរាប ៕
អត្ថបទ ៖ លោក លីវ សាន្ត
រូបថត ៖ លោក ខេង ឧត្ដម
