កូនឈើគគីរមួយដើម ត្រូវបានអភិសេក បន្តវេនដើមគគីរទំហំជាង៥ឱបមនុស្ស និងគម្រប់ខួប១០២ឆ្នាំ នៃការកកើតវត្តសុវណ្ណព្រឹក្សាគគីរ ស្ថិតក្នុងឃុំកន្ទ្រាំង ស្រុកប្រាសាទបាគង ខេត្តសៀមរាប នេះបើតាមថេរដីកា ព្រះតេជគុណ ជុត សំអូន ព្រះគ្រូចៅអធិការវត្តសុវណ្ណព្រឹក្សាគគីរ កាលពីថ្ងៃទី៣១ ខែសីហា ឆ្នាំ២០១៩។
មានវត្តមានក្នុងពិធីបំបួស និងអភិសេកកូនគគីរឱ្យទៅជាសុវណ្ណព្រឹក្សាគគីរទេវរាជ តាមបែបលទ្ឋិព្រះពុទ្ឋសាសនានិងព្រហ្មញ្ញសាសនា នៅវត្តសុវណ្ណព្រឹក្សាគគីរនាពេលនោះ លោក កាកាន តារាភាពយន្តបូលីវូត ឥណ្ឌា និងជាអគ្គរាជទូតសុឆន្ទៈដើម្បីសន្តិភាពពិភពលោក បាននិយាយថា ថ្វីត្បិតតែលោកកើតនៅក្នុងគ្រួសារគោរពលទ្ឋិព្រហ្មញ្ញសាសនា តែលោកបានងាកមកគោរព និងជឿជាក់លើព្រះពុទ្ឋសាសនាអស់រយៈពេល៥ឆ្នាំមកហើយ ក្រោយពីលោក បានក្លាយទៅជាតារាភាពបូលីវូដរបស់ប្រទេសឥណ្ឌា ក្នុងពេលដែលលោកបានសម្តែងជាតួអង្គព្រះសម្មាសម្ពុទ្ឋនៃរឿងប្រវត្តិព្រះពុទ្ឋ។
លោកយល់ថា ព្រះពុទ្ឋសាសនានិងព្រហ្មញ្ញសាសនាជាបុត្រសម្ព័ន្ឋប្រៀបបីដូចជាបងប្អូននឹងគ្នា បន្ថែមពីនេះសាសនាណាក៍ដោយ សាសនាទាំងអស់សុទ្ឋតែមានតួនាទីសំខាន់ជួយអប់រំមនុស្សគ្រប់កាលៈទេសៈនៅក្នុងសង្គមមនុស្សជាតិ។
លោក ផ្ញើសារផ្តាំផ្ញើដល់ប្រជាពុទ្ឋបរិស័ទ ក៍ដូចជាអ្នកគោរពសាសនាផ្សេងៗក្តីថា៖ព្រះពុទ្ឋបានទ្រង់សម្តែងថា៖ សន្តិភាពកើតមាននៅក្នុងចិត្តយើង ហេតុនេះសូមប្រជាពុទ្ឋបរិស័ទទាំងអស់ក្នុងពិភពលោក រក្សាភាពស្ងប់ក្នុងចិត្តតាមរយៈការបដិបត្តិតាមលំអានព្រះពុទ្ឋសាសនា គឺមេត្តា ករុណា មុទិតា និងឧបេក្ខា។ លោក ក៏បានសន្យាថា នឹងមកកម្ពុជានៅលើកក្រោយៗទៀត ហើយនឹងនាំយកដូនជី តាជី និងព្រះសង្ឃមួយចំនួន ព្រមទាំងកុមារាកុមារីមួយចំនួនផងដែរ នៅទី នេះ បានទៅឃើញទឹកដីឥណ្ឌា ដើម្បីធ្វើទស្សនកិច្ចសិក្សាស្វែងយល់ពីវប្បធម៌ ប្រពៃណី ទំនៀមទំលាប់នៅប្រទេសឥណ្ឌា។
អ្នកអង្គម្ចាស់ក្សត្រីយ៍ ស៊ីសុវត្ថិ សោមា អគ្គរាជទូតសុឆន្ទៈដើម្បីស្ត្រីពីសហគមន៍អឺរ៉ុប មានបន្ទូលថា ពិធីបំបួសនិងអភសេកកូនគគីរនៅពេលនេះ ជាសក្ខីភាពនៃជំនឿនិងការគោរពដ៍ជ្រាលជ្រៅរបស់បងប្អូនខ្មែរយើងទាំងទៅលើលទ្ឋិ ព្រះពុទ្ឋសាសនានិងលទ្ឋិព្រហ្មញ្ញសាសនា ហេតុននេះក្នុងនាមយើងជាកូនខ្មែរត្រូវគោរព និងរក្សាឱ្យបានខ្ជាប់ខ្ជួននូវវប្បធម៌ ប្រពៃណីទំនៀមទំលាប់ ជាមរតកដូនតាយើងបានបន្សល់ទុកឱ្យៗស្ថិតស្ថេរគង់វង្ស និងរីកចម្រើនទុកសម្រាប់កូនចៅជំនាន់ក្រោយរបស់យើងតទៅទៀត។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
