ផ្លូវលំមួយខ្សែ ប្រវែង៥០០ម៉ែត្រ ទទឹង៨ម៉ែត្រ ស្ថិតនៅក្នុងភូមិវាល សង្កាត់សំបួរ ក្រុងសៀមរាប ដែលរងការខូចខាតខ្លាំង និង បង្កការលំបាកដល់ការធ្វើដំណើររបស់ប្រជាពលរដ្ឋក្នុងរយៈកាលកន្លងមកនេះ ត្រូវបានលោក អែល អំរ៉ុង បានចំណាយថវិកាផ្ទាល់ខ្លួន ជួយជួសជុលផ្លូវនេះឡើងវិញនៅថ្ងៃទី២៤ ខែកញ្ញា ឆ្នាំ២០១៨នេះ ដោយក្រាលគ្រួសក្រហម ដើម្បីឱ្យប្រជាពលរដ្ឋនៅតំបន់នេះធ្វើដំណើរមានភាពងាយស្រួលជាងមុន ។
លោក អែល អំរ៉ុង មានប្រសាសន៍ថា ការសុខចិត្តចំណាយថវិកាផ្ទាល់ខ្លួនជួសជុលផ្លូវថ្នល់នេះឡើងវិញនោះ ដោយយល់ឃើញថា ផ្លូវគឺជាសរសៃឈាមនៃសេដ្ឋកិច្ចជាតិ និងសេដ្ឋកិច្ចគ្រួសារមានផ្លូវមានក្តីសង្ឃឹម ហើយបើទោះបីវាមិនបានស្អាតដូចផ្លូវធ្វើថ្មី ឬដូចផ្លូវចាក់កៅស៊ូក៏ពិតមែន ប៉ុន្តែបានជួយធ្វើឱ្យប្រជាពលរដ្ឋអ្នកធ្វើដំណើរឆ្លងកាត់ ផ្លូវនេះរាល់ថ្ងៃ មានភាពងាយស្រួលជាងមុន ជាពិសេសក្មេងៗសិក្សានុសិស្សដែលធ្វើដំណើរទៅរៀនរាល់ថ្ងៃ ។
នាឱកាសនោះដែរលោក ឈ្លឿន ឡា ចៅសង្កាត់សំបួរ បានសម្ដែងនូវអំណរគុណយ៉ាងជ្រាលជ្រៅ ចំពោះសន្តានចិត្ត សប្បុរសរបស់លោក អែល អំរ៉ុង ដែលបានបរិច្ចាគថវិកាដើម្បីធ្វើការជួសជុលផ្លូវគ្រួសក្រហមមួយខ្សែនេះ ហើយតាមរយៈនេះ សូមអំពាវនាវដល់បងប្អូនប្រជាពលរដ្ឋនៅក្នុងភូមិ និងសាធារណជនទាំងអស់ ដែលបានប្រើប្រាស់ផ្លូវមួយខ្សែនេះ សូមចូលរួមថែរក្សា ការពារ និង គោរពតាមគោលការណ៍នានានៃច្បាប់ចរាចរណ៍ របស់ព្រះរាជាណាចក្រកម្ពុជា ដើម្បីសុវត្ថិភាព និង កំណើនសេដ្ឋកិច្ចគ្រួសារ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
