បន្ទាប់ពីមានការរិះគន់ពីប្រជាពលរដ្ឋពេលបណ្ដាញសារព័ត៌មាន និងបណ្ដាញសង្គមហ្វេសប៊ុកមួយចំនួន លើករណីផ្លូវមួយចំនួនក្នុងក្រុងសៀមរាប បានខូចហើយមិនជួសជុល ដែលធ្វើឲ្យប៉ះពាល់ដល់ទីក្រុងទេសចរណ៍មួយនេះ ជាពិសេសផ្លូវក្រវ៉ាត់ក្រុងសៀមរាប ខណៈដែលលោកទើបចូលកាន់តំណែងជាប្រធានមន្ទីរនៅដើមខែសីហាកន្លងមកនេះ នៅព្រឹកថ្ងៃទី០៧ ខែកញ្ញា ឆ្នាំ២០១៩នេះ លោក គី វីរិន្ទ ប្រធានមន្ទីរសាធារណការ និងដឹកជញ្ជូនខេត្ដសៀមរាប មានប្រសាសន៍ថា ផ្លូវនៅក្នុងតំបន់ទេសចរណ៍អង្គរ មានគម្រោងអភិវឌ្ឍន៍ និងជួសជុលច្រើនកន្លែង មានទាំងគម្រោងរបស់សាលាខេត្ដ និងគម្រោងរបស់មន្ទីសាធារណការនិងដឹកជញ្ជូនខេត្ដ ដូចជានៅផ្លូវក្រវាត់ក្រុងប្រវែងជាង២គីឡូម៉ែត្រ និងផ្លូវខ្នារចាស់ប្រវែងជាង៤ពាន់មែត្រ និងផ្លូវមួយចំនួនទៀតនៅក្នុងក្រុងសៀមរាប ខណៈផ្លូវដែលរងការខូចខាតទាំងពីរនោះ បានបើករដ្ឋានជួសជុលរួចហើយ ប៉ុន្ដែមិនទាន់បានធ្វើជួសជុលនៅឡើយ ដោយសារចំពេលរដូវភ្លៀងធ្លាក់ និងស្របពេលខ្វះថវិកាផង ទើបបណ្ដាលការជុសជុលមានការយឺតយ៉ាវ។
លោក គី វីរិន្ទ មានប្រសាសន៍បន្ថែមថា ក្នុងរយៈពេលដែលលោកចាប់ផ្ដើមទទួលការងារកន្លែងថ្មី លោកបានធ្វើការងារច្រើន ដូចជាជួបជាមួយអាជ្ញាធរជាតិអប្សរា ដែលជាអ្នកដៃគូរអភិវឌ្ឍន៍ផ្លូវថ្នល់ ម្ចាស់សណ្ឋាគារជាដើម ដើម្បីដោះស្រាយលើបញ្ហាមួយចំនួននៅខាងមុខសណ្ឋាគារនិងមន្ទីរពេទ្យ ពិសេសធ្វើយុទ្ធនាការលុបផ្លូវសំបុកមាន់លើកំណត់ផ្លូវសំខាន់ៗ ពិនិត្យផ្លូវសាងសង់ក្នុងក្រុងសៀមរាប ផ្សព្វផ្សាយពីផ្លូវច្បាប់ចរាចរណ៍ និង ពាក់មួកសុវត្ថិភាពដែលពាក់ព័ន្ធនឹងការងារគ្រប់គ្រងរបស់មន្ទីរ។
ទោះជាយ៉ាងនេះក្ដី លោក គី វីរិន្ទ បានសុំការអធ្យាស្រ័យចំពោះពលរដ្ឋក្នុងការយឺតយ៉ាវជួសជុលផ្លូវក្នុងក្រុងទេសចរណ៍នោះផងដែរ ជាពិសេសការបើករដ្ឋានជួសជុលហើយមិនទាន់ដំណើរការ ព្រោះវាមានភ្លៀងធ្លាក់ខ្លាំងដែលបណ្ដាលឲ្យពលរដ្ឋពិបាកក្នុងធ្វើដំណើរ។
សូមបញ្ជាក់ថា កាលពីដើមខែសីហា ឆ្នាំ២០១៩នេះ ក្រសួងសាធារណការ និងដឹកជញ្ជូន រួមជាមួយអាជ្ញាធរខេត្ដសៀមរាប បានបើកការដ្ឋានជួសជុលផ្លូវពីរខ្សែមានផ្លូវក្រវ៉ាត់ក្រុងប្រវែងជាង២.០០០ម៉ែត្រ និងផ្លូវមួយខ្សែទៀតប្រវែងជាង៤ពាន់មែត្រ ស្ថិតនៅសង្កាត់ជ្រាវ ប៉ុន្ដែមកដល់ពេលនេះមិនទាន់បានធ្វើនៅឡើយ ដែលមន្ទីរលើកឡើងថា ដោយសារភ្លៀងធ្លាក់ច្រើនដែលធ្វើឲ្យប៉ះពាល់ដល់ការធ្វើការដ្ឋាន៕
អត្ថបទ និង រូបថត ៖ លោក ជា ស្រស់ និង លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
