បើតាមសេចក្តីប្រកាសព័ត៌មាន របស់ក្រសួងអប់រំ យុវជន និង កីឡា ចុះថ្ងៃទី០៩ ខែកញ្ញា ឆ្នាំ២០១៩នេះ បានឲ្យដឹងថា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩ សម័យប្រឡង ថ្ងៃទី១៩ ខែសីហា ឆ្នាំ២០១៩ នៅខេត្តសៀមរាប មានបេក្ខជនដែលទទួលបាននិទ្ទេស A ចំនួន ៣៨ នាក់ នៅពីក្រោយរាជធានីភ្នំពេញ ដែលមានចំនួន១៤១ នាក់ , ខេត្តបាត់ដំបង ចំនួន ៣២ នាក់ , តាកែវ ចំនួន ២៩ នាក់ , កំពង់ចាម ចំនួន ២៧ នាក់ , ព្រៃវែង ចំនួន ២៧ នាក់ , បន្ទាយមានជ័យ ចំនួន ២៥ នាក់ , កណ្តាល ចំនួន ២៣ នាក់ , កំពតចំនួន ២៣ នាក់ , ត្បូងឃ្មុំ ចំនួន ១៥ នាក់ , កំពង់ធំ ចំនួន ១៨ នាក់ , ព្រះសីហនុ ចំនួន ១៣ នាក់ , ស្វាយរៀង ចំនួន ៨ នាក់ , ពោធិ៍សាត់ ចំនួន ៧ នាក់ , កំពង់ឆ្នាំង ចំនួន ៦ នាក់ , កំពង់ស្ពឺ ចំនួន ៦ នាក់ , ក្រចេះចំនួន ៨ នាក់ , រតនគិរី ចំនួន ២ នាក់ , កោះកុង ចំនួន ១ នាក់ , មណ្ឌលគីរី ចំនួន ១ នាក់ និង ខេត្តឧត្តរមានជ័យ ចំនួន ១ នាក់ ។
សេចក្តីប្រកាសព័ត៌មាន បានបញ្ជាក់បន្ថែមថា បេក្ខជនប្រឡងជាប់មានចំនួន ៧៥.០៥២នាក់ ត្រូវជា ៦៨,៦២ភាគរយ បើប្រៀបធៀបនឹងឆ្នាំ២០១៨ មានចំនួន ៦៧,០៧ភាគរយ ក្នុងនោះបេក្ខជនដែលទទួលបាននិទ្ទេស A មានចំនួន ៤៤៣ នាក់ ខណៈឆ្នាំ២០១៨ ចំនួន ៤០៨ នាក់ , និទ្ទេស B មាន ចំនួន ២.៤៣០ នាក់ ខណៈឆ្នាំ២០១៨ ចំនួន ២.២២២ នាក់ , និទ្ទេស C មានចំនួន ៥.៨៤៧ នាក់ ខណៈឆ្នាំ២០១៨ ចំនួន ៦.០៤១ នាក់ , និទ្ទេស D មានចំនួន ១៤.១០០ នាក់ ខណៈឆ្នាំ២០១៨ ចំនួន ១៥.១៨០ នាក់ , និងនិទ្ទេស E មានចំនួន ៥៦.២៣២ នាក់ ខណៈឆ្នាំ២០១៨ ចំនួន ៥២.១៨៣ នាក់ ៕
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិកាលពីឆ្នាំសិក្សា ២០១៧-២០១៨ បេក្ខជនដែលបានប្រឡងដែលបានប្រឡងសញ្ញាបត្រមធ្យមសិក្សាទុតិយភូមិ នៅទូទាំងខេត្តសៀមរាបមាន ចំនួន ៨៧១៤ នាក់ ហើយបេក្ខជនដែលបានប្រឡងជាប់ជាស្ថាពរ មានចំនួន ៥.៩៧០នាក់ ស្រីចំនួន៣.៣៨០នាក់ ក្នុងនោះបេក្ខជនជាប់និទ្ទេស A មានចំនួន ៣១នាក់ ក្នុងនោះស្រី១៨នាក់ ហើយសម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៨-២០១៩ នៅទូទាំងខេត្តសៀមរាបមានបេក្ខជនដែលបានប្រឡង មានចំនួន៨.៧១៤ នាក់ ក្នុងនោះស្រីមានចំនួន ៤.៨២៩នាក់ ហើយសម្រាប់សិស្សដែលទទួលបាននិទ្ទេស A ក្នុងឆ្នាំនេះមានចំនួន ៣៨ នាក់ នៅពីក្រោយរាជធានីភ្នំពេញ ដែលមានចំនួន ១៤១ នាក់ ។
ប្រភព៖ក្រសួងអប់រំយុវជន និងកីឡា
