ប្រជាពលរដ្ឋក្រីក្រ១២គ្រួសារ រស់នៅលើដីវត្តអារញ្ញសាគរ ស្ថិតក្នុងភូមិអារញ្ញ សង្កាត់សៀមរាប ក្រុងខេត្តសៀមរាប ទទួលបានដីសាងសង់លំនៅដ្ឋាន ក្នុងមួយគ្រួសារមួយឡូតិ៍ ពីព្រះគ្រូចៅអធិការ និងគណៈកម្មាការវត្តអារញ្ញសាគរ។
ព្រះគ្រូវិសារទោ ហ៊ាក់ គឹមហ៊ត់ ព្រះគ្រូចៅអធិការវត្ត មានថេរដីកាឱ្យដឹងថា ប្រជាពលរដ្ឋក្រីក្រទាំង១២គ្រួសារនេះ បានមករស់នៅលើដីវត្តអារញ្ញសាគរតាំងតែពីឆ្នាំ១៩៧៩មកម្លេះ ហើយកាលពីឆ្នាំ២០០៦ ព្រះគ្រូចៅអធិការមុន លោកបានឲ្យប្រជាពលរដ្ឋទាំងអស់នេះធ្វើកិច្ចសន្យាថា បើវត្តត្រូវការដីនៅថ្ងៃណា ពួកគាត់នឹងរុះរើចេញពីដីវត្តនេះដោយគ្មានលក្ខខណ្ឌ និងគ្មានការតវ៉ា ហើយពួកគាត់ក៏បានផ្តិតមេដៃយល់ព្រមផងដែរ។ បន្ទាប់មក កាលពីថ្ងៃទី២៨ ខែសីហា ឆ្នាំ២០១៩នេះ ព្រះអង្គបានកោះហៅពលរដ្ឋទាំង១២គ្រួសារ ដែលមានការចូលរួមពីអាជ្ញាធរភូមិឃុំនិងសង្កាត់ ព្រមទាំង ព្រះសង្ឃ គណៈកម្មការអាចារ្យវត្ត សុំឲ្យពលរដ្ឋចាកចេញពីដីវត្ត តែដោយព្រះទ័យសណ្តោសប្រណី និងយល់ឃើញថា បើអោយពួកគាត់ចាកចេញទៅ មិនដឹងទៅរស់នៅឯណា បើក្ររកតែបាយហូបស្ទើតែមិនបានផង ទើប ព្រះគ្រូចៅអធិការ និងគណៈកម្មាការវត្តអារញ្ញសាគរ បរិច្ចាគទានជាដីសង់លំនៅដ្ឋាន មានទទឹងប្រវែង ៧ម៉ែត្រ និងបណ្តោយ ១២ម៉ែត្រ ដែលជាដីរបស់វត្តអារញ្ញសាគរបានបង់រំលោះនៅឆ្នាំ២០១៥។
ព្រះគ្រូចៅអធិការមានថេរដីកាបញ្ជាក់ថា៖ បន្ទាប់ពីគ្រួសារទាំង១២ ចាកចេញទៅរស់នៅលើទីតាំងថ្មីហើយ ទីតាំងដីចាស់នេះ នឹងពង្រីកផ្លូវចាស់ដែលមានសភាពតូចចង្អៀត ដើម្បីបង្កភាពងាយស្រួលដល់សិស្សានុសិស្ស ដែលមកសិក្សានៅ វិទ្យាល័យអារញ្ញសាគរ ស៊ីអេហ្វស៊ី ដែលមានចាប់ពីកម្រិតបឋមសិក្សា អនុវិទ្យាល័យ និងវិទ្យាល័យ មួយវិញទៀតវត្តអារញ្ញសាគរ ក៏ជាគោលដៅទេសចរណ៍វត្តគំរូ ក្នុងចំណោម៩វត្ត ក្នុងក្រុងសៀមរាបផងដែរ។
លោក ម៉ៃ សាមេត ចៅសង្កាត់សៀមរាប ក៏បានទទួលស្គាល់ថា ប្រជាពលរដ្ឋទាំង១២គ្រួសារនេះ ពិតជាក្រីក្រ និងបានមករស់នៅលើដីវត្តតាំងពីយូរមកពិតប្រាកដមែន។
សូមបញ្ចាក់បន្ថែមថា កិច្ចសន្យារុះរើ និងទទួលដីថ្មីនេះ មានរយៈពេល១២ខែ គិតចាប់ពីថ្ងៃទី២៨ ខែសីហា ឆ្នាំ២០១៩ រហូតដល់ថ្ងៃទី២៨ ខែសីហា ឆ្នាំ២០២០ក្នុងនោះ ព្រះចៅអធិការ ព្រះអង្គសន្យាថា នឹងចាក់ដីធ្វើផ្លូវគ្រួសក្រហម ហើយដីប្រជាពលរដ្ឋទាំង១២គ្រួសារនេះ នឹងនៅទល់មុខផ្លូវគ្រួសក្រហមក្រោយវត្តនេះតែម្ដង៕
អត្ថបទ និង រូបភាព : លោក យូ វង្ស
កែសម្រួលអត្ថបទ : លោក សេង ផល្លី
