នាព្រឹកថ្ងៃទី ១០ ខែ កញ្ញា ឆ្នាំ២០១៩នេះ ក្រសួងកិច្ចការនារី សហការជាមួយ ក្រសួងសេដ្ឋកិច្ចនិងហិរញ្ញវត្ថុ បានរៀបចំ អង្គសិក្ខាសាលាផ្សព្វផ្សាយយុទ្ធសាស្ត្រ នៃការកែទម្រង់ប្រព័ន្ធថវិកា ឆ្នាំ២០១៨ .២០២៥ និង ការរៀបចំសូចនាករ ដែលមានរយៈពេល២ថ្ងៃ ក្រោមអធិបតីភាពរបស់លោកជំទាវ ខេង សំវ៉ាដា រដ្ឋលេខា ធិការប្រចាំការ នៃក្រសួងកិច្ចការនារី ដោយមានការអញ្ជើញចូលរួមពីសំណាក់ លោកជំទាវ ឯកឧត្តម លោកស្រីអស់លោក ជារដ្ឋលេខាធិការ អនុរដ្ឋលេខាធិការ និង ថ្នាក់អគ្គនាយក នាយកដ្ឋាន ក្រុមការងារ និង គ្រូឧទេ្ទស ព្រមទាំងប្រធាន និងមន្ត្រីជំនាញនៃមន្ទីរកិច្ចការនារី រាជធានីភ្នំពេញ និងខេត្តកណ្តាល ប្រមាណជាង១០០នាក់ ។
មានប្រសាសន៍ក្នុងពិធីបើកអង្គសិក្ខាសាលាផ្សព្វផ្សាយនាពេលនោះ លោកជំទាវ ខេង សំវ៉ាដា បានធ្វើការបញ្ជាក់ថា យុទ្ធសាស្ត្រ នៃការកែទម្រង់ប្រព័ន្ធថវិកា ឆ្នាំ២០១៨ .២០២៥ ដែលជាស្នូល នៃកម្មវិធីកែទម្រង់ការគ្រប់គ្រងហិរញ្ញវត្ថុ ដែលត្រូវបានគណៈរដ្ឋមន្ត្រីអនុតម័កន្លងមក ។ កម្មវិធីកែទម្រង់ការគ្រប់គ្រងថវិកា ត្រូវបានប្រកាសដាក់ឲ្យអនុវត្តជាផ្លូវការ ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី ហើយក៏ជាកម្មវិធីកែទម្រង់ស្នូលមួយ នៃកម្មវិធីកែ ទម្រង់សំខាន់ៗ របស់រាជរដ្ឋាភិបាល ដើម្បីពង្រឹងអភិបាលកិច្ច និង ទ្រទ្រង់ការអភិវឌ្ឍសេដ្ឋកិច្ច ប្រកបដោយបរិយាប័ន្ន និង សមធម៌ ដែលបានកំណត់ក្នុងយុទ្ធសាស្ត្រចតុកោណ និង ផែនការយុទ្ធសាស្ត្រអភិវឌ្ឍន៍ជាតិ ។
លោកជំទាវក៏បានលើកផងដែរថា កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ គឺមានគោលដៅកែលម្អប្រព័ន្ធគ្រប់គ្រងហិរញ្ញវត្ថុ សាធា រណៈកម្ពុជា ឆ្ពោះទៅកាន់ប្រព័ន្ធហិរញ្ញវត្ថុសាធារណៈ ដែលផ្តោតលើលទ្ធផល និងវិមជ្ឈការ ស្របតាមស្តង់ដារអន្តរជាតិ។ ជាសមទ្ធិផលនៃជំហានទី១ ទី២ នៃការងារកែទម្រង់ការគ្រប់គ្រងហិរញ្ញ វត្ថុសាធារណៈ ដែលជាមូលដ្ឋានគ្រឹះដ៏ចាំបាច់ សម្រាប់ឆ្ពោះទៅកាន់ជំហានទី៣ ដែលជាការផ្សាភ្ជាប់ថវិកាទៅនឹងគោល នយោបាយ នៃការកែទម្រង់ការគ្រប់គ្រងហិរញ្ញវត្ថុសាធារណៈ គឺជាកិច្ចដំណើរការផ្លាស់ប្តូរជាបណ្តើរៗ ពីប្រព័ន្ធគ្រប់គ្រងថវិកា ផ្អែកលើធាតុចូល និង មជ្ឈការ ឆ្ពោះទៅ ប្រព័ន្ធគ្រប់គ្រងថវិកា ផ្អែកលើលទ្ធផល ឬ សមិទ្ធិកម្ម និង វិមជ្ឈការ ដែលទាមទារឲ្យគ្រប់ក្រសួង ស្ថាប័នទាំងអស់បំពេញ ការងារប្រទាក់ក្រឡាគ្នា ប្រកបដោយស្មារតីនៃភាពជាម្ចាស់ និង ការទទួលខុសត្រូវខ្ពស់ ។
លោកជំទាវបានបន្តទៀតថា ថ្វី ត្បិតនៅក្នុងកម្រិតម៉ាក្រូ យើងមានគោលនយោបាយយុទ្ធសាស្ត្រ និង ផែនការសកម្មភាពរួមច្បាស់លាស់ ដែលត្រូវបាន ឆ្លុះបញ្ចាំងនៅនៅក្នុង យុទ្ធសាស្ត្រចតុកោណ របស់រាជរដ្ឋាភិបាល នៅក្នុងផែនការយុទ្ធសាស្ត្រអភិវឌ្ឍជាតិ ។ យើងត្រូវ បន្តកែលម្អ ពង្រឹង ធ្វើឲ្យកាន់តែស៊ីជម្រៅ បង្កើននិងពង្រីកសមត្ថភាព លទ្ធភាពរបស់យើង សំដៅប្រើប្រាស់ឲ្យបានកាន់តែ ប្រសើរបំផុត នូវសក្តានុពល កាលានុវត្តភាពទាំងឡាយដែលយើងមាន ក្នុងគោលដៅតាមឲ្យទាន់ និង ដំណើរវិវត្តន៍នៃ សង្គម សេដ្ឋកិច្ច នយោបាយ ទាំងនៅក្នុងក្របខ័ណ្ឌប្រទេស តំបន់ ក៏ដូចពិភពលោក ។ អង្គសិក្ខាសាលាយុទ្ធសាស្ត្រ នៃការកែទម្រង់ប្រព័ន្ធថវិកាឆ្នាំ២០១៨.២០២៥ បានកំណត់គោលបំណង និង គូសវាស ផ្លូវនៃការកែទម្រង់ប្រព័ន្ធថវិការបស់កម្ពុជា ឈានឆ្ពោះទៅលើកកម្ពស់ប្រសិទ្ធភាពនៃការវិភាជថវិកា តាមរយៈការប្រើប្រាស់សូចនាករសមិទ្ធិកម្ម និង ប្រសិទ្ធ ភាពនៃការអនុវត្តថវិកា តាមរយៈការកាត់បន្ថយនីតិវិធីចំណាយ និង ការផ្តល់សិទ្ធអំណាច ការទទួលខុសត្រូវកាន់តែច្បាស់ លាស់ ដល់ក្រសួង ស្ថាប័ន សំខាន់អង្គភាពប្រតិបត្តិផ្ទាល់ និង ការប្រើប្រាស់ប្រព័ន្ធវិទ្យាព័ត៌មាន សម្រាប់គ្រប់គ្រងថវិកា ។
លោកជំទាវមានសង្ឃឹមជឿជាក់ថា អង្គសិក្ខាសាលាទាំងមូល និងយកចិត្តទុកដាក់ ស្តាប់ការឧទ្ទេសរបស់វាគ្មិន ព្រមទាំងលើកជាសំនួរឲ្យបានផុលផុស ជុំវិញការរៀបចំសូចនាករ ឲ្យបានល្អជាលំដាប់ និង ត្រងត្រាប់ស្តាប់នូវយុទ្ធសាស្ត្រ នៃការកឬទម្រង់ប្រព័ន្ធថវិកាឆ្នាំ២០១៨ ២០២៥ ដែលជាស្នូលនៃកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈ ៕
អត្ថបទ និង រូបភាព ៖ម៉ី សុខារិទ្ធ
កែសម្រួល ៖អ៊ុន ណារាជ្យ
