នាព្រឹកថ្ងៃទី១១ ខែកញ្ញា ឆ្នាំ២០១៩ ដោយមានការគាំទ្រពីរដ្ឋបាលខេត្តសៀមរាប ក្រុមប្រឹក្សាជាតិកម្ពុជាដើម្បីស្ត្រី រៀបចំកិច្ចប្រជុំមួយនៅសាលាខេត្តសៀមរាប ដើម្បីបានបង្ហាញអំពីគោលបំណងនៃការប្រមូលព័ត៌មាន និងលទ្ធផលនៃការអនុវត្តច្បាប់ គោលនយោបាយជាតិ លទ្ធផលនៃការអនុវត្តអនុសាសន៍ដ៏ខ្ពង់ខ្ពស់សម្តេចតេជោនាយករដ្ឋមន្ត្រី និងការអនុវត្តអនុសញ្ញាស្តីពីការការលុបបំបាត់ រាល់ទម្រង់នៃការរើសអើងប្រឆាំងនឹងនារីភេទ ស៊ី-ដ / CEDEW ដើម្បីរៀបចំរបាយការណ៍បូកសរុប សម្រាប់កិច្ចប្រជុំប្រចាំឆ្នាំរបស់ក្រុមប្រឹក្សាជាតិដើម្បីស្ត្រី និងរៀបចំរបាយការណ៍ជាតិ តាមកាលកំណត់របស់អង្គការសហប្រជាជាតិ ដោយផ្តោតទៅលើការស្វែងយល់ អំពីបញ្ហាប្រឈម និងដំណោះស្រាយពាក់ព័ន្ធទៅនឹងការលើកកម្ពស់ស្ថានភាពជីវភាព ឋានៈ តួនាទី និងសុខុមាលភាពរបស់ស្ត្រី ។
កិច្ចប្រជុំនេះ មានរយៈពេល២ថ្ងៃ ហើយបានប្រព្រឹត្តទៅក្រោមការដឹកនាំរបស់លោកជំទាវ ចម និម្មល រដ្ឋលេខាធិការក្រសួងពាណិជ្ជ កម្ម និងជាសមាជិកាក្រុមប្រឹក្សាជាតិកម្ពុជាដើម្បីស្ត្រី ដោយមានការចូលរួមពីសំណាក់លោក លោកស្រី ជាថ្នាក់ដឹកនាំ និង មន្ត្រីជំនាញនៃមន្ទីរ អង្គភាពនានាក្នុងខេត្តសៀមរាប ។
លោកជំទាវ ចម និម្មល បានបញ្ជាក់ឲ្យដឹងថា ខ្លឹមសារអនុសាសន៍ ទី៣ ឆ្នាំ២០១៩ របស់សម្តេចតេជោនាយករដ្ឋមន្ត្រី ហ៊ុន សែន បានបង្ហាញឲ្យក្រុមប្រឹក្សាជាតិដើម្បីស្ត្រី ជំរុញឲ្យក្រសួង និងស្ថាប័នពាក់ព័ន្ធនៅថ្នាក់ជាតិ និងថ្នាក់ក្រោមជាតិ បន្តអនុវត្តមាត្រា១៤ នៃអនុសញ្ញាស្តីពីការលុបបំបាត់ រាល់ទម្រង់នៃការរើសអើងប្រឆាំងនឹងនារី ភេទ ស៊ី-ដ ឲ្យមានប្រសិទ្ធភាព ដោយផ្តោតជាសំខាន់លើការចូលរួមក្នុងការអភិវឌ្ឍ និងការទទួលបានអត្ថប្រយោជន៍របស់ស្ត្រី តាមរយៈនៃការអនុវត្តច្បាប់ និងគោលនយោបាយ ។
គួរំលឹកថា កិច្ចប្រជុំនេះត្រូវបានពិភាក្សាលើ៥ចំណុចសំខាន់ៗ រួមមាន ៖ទី១- អំពីស្ត្រីក្នុងមុខងារសាធារណៈ ដែលនិយាយអំពីស្ថានភាពមន្ត្រីរាជការជាស្ត្រីនិងការបំពេញតួនាទីភារកិច្ច ក្នុងនោះមានការលើកឡើងអំពីបញ្ហាជាឧបស័គ្គ ជម្រុញការយកចិត្តទុកដាក់តែងតាំងមុខតំណែង ការយកចិត្តទុកដាក់ចំពោះស្ត្រីជាមន្ត្រីរាជការមុនចូលនិវត្តន៍ ជាដើម , ទី២- អំពីស្ថានភាពសេដ្ឋកិច្ចស្ត្រី , ទី៣- ករណីអំពើហិង្សានិងបទល្មើសពាក់ព័ន្ធស្ត្រីនិងក្មេងស្រី ដែលជាចំណុចទី៤និងទី៥របស់សម្តេចតេជោ , ទី៤- ស្ថានភាពសិក្សានិងអប់រំសម្រាប់ស្ត្រី និងក្មេងស្រី ជាចំណុចអនុសាសន៍ទី១០ ដែលក្នុងប្រការនេះ ជំរុញឲ្យមានការពិនិត្យ ស្រាវជ្រាវស្ថានភាពសិស្ស និស្សិតនារី ដើម្បីមានវិធានការដោះស្រាយ ពិសេសលើករណីបោះបង់ការរៀនសូត្រ ដើម្បីរិះរកគំនិតផ្តួចផ្តើមនានា ធ្វើឲ្យប្រសើរឡើងសេវាអប់រំ ឆ្លើយតបតម្រូវការទីផ្សារការងារ ពង្រីកការផ្តល់អាហារូបករណ៍ដល់សិស្ស-និស្សិតក្រីក្រ និង ទី៥- ជាចំណុចអនុសាសន៍ទី១១ របស់ប្រមុខរាជរដ្ឋាភិបាលកម្ពុជា ដោយសង្កត់ធ្ងន់ទៅលើការចូលរួមរបស់ស្ត្រី និងជនពិការ ក្នុងការផ្តល់ និងទទួលបានផលប្រយោជន៍ប្រកបដោយសមធម៌ ពីសេវាគ្រប់ប្រភេទ ទាំងថ្នាក់ជាតិ និងថ្នាក់ក្រោមជាតិ តាមការអនុវត្តគោលនយោបាលវិមជ្ឈការ និងវិសហមជ្ឈការ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្
