លោក ជិន ដា អនុប្រធាននាយកដ្ឋានស្រាវជ្រាវ និងអភិវឌ្ឍន៍វារីវប្បកម្ម នៃអគ្គនាយកដ្ឋានរដ្ឋបាលជលផល ក្រសួងកសិកម្មរុក្ខាប្រមាញ់និងនេសាទ មានប្រសាសន៍ថា រដ្ឋបាលជលផល ជាពិសេសមន្ត្រីនៃនាយកដ្ឋានស្រាវជ្រាវ និងអភិវឌ្ឍន៍វារីវប្បកម្ម បានរួមចំណែកក្នុងការផ្តល់មេរៀនបច្ចេកទេស ការចុះប្រឹក្សាការងារបច្ចេកទេស ជាមួយអង្គការដៃគូអនុវត្តគម្រោង ដើម្បីរួមចំណែកធ្វើឱ្យប្រសើរឡើង នូវជីភាពរបស់ប្រជាជននៅសហគមន៍ជនបទក្នុងខេត្តសៀមរាប ហើយគម្រោងនេះមិនត្រឹមតែធ្វើឱ្យកើនឡើងនូវផលត្រីប៉ុណ្ណោះទេ តែថែមទាំងផ្តល់ចំណេះដឹងផ្នែកអាហារូបត្ថម្ភ និងអនាម័យដល់ប្រជាជនក្នុងសហគមន៍គោលដៅផងដែរ។
លោក ជិន ដា បានជំរុញដល់កសិករក្នុងគោលដៅ ក្រោយគម្រោងនេះបញ្ចប់ សូមបន្តសហការទំនាក់ទំនងជាមួយនឹងមន្ត្រីបច្ចេក ទេស និងកសិករដែលមានបទពិសោធន៍រៀនសូត្រ និង ចែក រំលែក បទពិសោធន៍ល្អៗ ដល់គ្នាទៅវិញទៅមកដើម្បី ឱ្យសហគមន៍រីក ចម្រើន និងត្រូវនាំគ្នារក្សាត្រីពូជ និងចិញ្ចឹមត្រីល្អិតៗឱ្យបានច្រើន ព្រោះថាត្រីល្អិតវាសម្បូរដោយជាតិប្រូតេអ៊ីន ជាតិកាល់ស្យូម និងវីតាមីនផ្សេងៗទៀត ដែលមានប្រសិទ្ធភាពល្អបំផុត សម្រាប់បំប៉នសុខភាពកុមារចាប់តាំងកកើតរហូតដល់មានវ័យ ២៤ ខែ និងសុខភាពស្ត្រីពេលមានគភ៌ គឺវាជួយធ្វើមានសុខភាពមាំមួនល្អ និងមានសាច់ឈាមស្រស់ថ្លា។
លោក ជិន ដា មានប្រសាសន៍យ៉ាងដូច្នេះ នៅក្នុងសិក្ខាសាលាបូកសរុបលទ្ឋផលគម្រោង ស្តីពីការគ្រប់គ្រងប្រព័ន្ឋកសិវារីវប្បកម្ម ដើម្បីបង្កើនអាហារូបត្ថម្ភនិងជីវភាព ដែលរៀបចំឡើងដោយអង្គការ វើលហ្វីស(WorldFish) និង អង្គការអ្នកត្រួសត្រាយកម្ពុជា(TCO) សហការជាមួយរដ្ឋបាលជលផល ក្រោមការគាំទ្រថវិកា ពី សហគមន៍ អ៊ឺរ៉ុប(EU.IFAD) នៅសណ្ឋាគារអប្សរាអង្គរខេត្តសៀមរាបថ្ងៃទី១១ខែកញ្ញាឆ្នាំ២០១៩ ដោយមានសមាសភាពចូលរួមជាអាជ្ញាធរស្រុកគោល ដៅចំនួន៣គឺ ស្រុកក្រឡាញ់ ស្រុកពួក និងស្រុកសូទ្រនិគម និង អាជ្ញា ធរឃុំគោលដៅចំនួន៦ និងមេភូមិគោលដៅចំនួន ១២ភូមិ នៃស្រុកទាំង៣ រួមទាំងកសិករផងសរុបជាង៧០នាក់។
លោក អ៊ុង ច័ន្ទរតនា នាយកអង្គការអ្នកត្រួសត្រាយកម្ពុជា លើកឡើងថា គម្រោងស្តីពីការគ្រប់គ្រងប្រព័ន្ឋកសិវារីវប្បកម្ម ដើម្បីបង្កើន អាហារូបត្ថម្ភនិងជីវភាពនេះ បានចាប់អនុវត្តពីឆ្នាំ២០១៧ និងបញ្ចប់នៅឆ្នាំ២០១៩ តាមរយៈថវិកាអនុវត្តគម្រោងពីអង្គការវើលហ្វីស(WorldFish) ដែលគម្រោងនេះ អនុវត្តដោយអង្គការដៃគូចំនួន៣ខុសៗគ្នា គឺនៅខេត្តពោធិសាត់ , បាត់ដំបង និងខេត្តសៀមរាប អនុវត្តដោយអង្គការអ្នកត្រួសត្រាយកម្ពុជា ហើយគម្រោងនៅខេត្តសៀមរាប បានអនុវត្តនៅស្រុកក្រឡាញ់ចំនួន៣ឃុំ មានស្រះកសិករចំនួន៦៨ស្រះ បន្ទាប់មកអនុវត្ត៣ឃុំនៅស្រុកពួក និងស្រុកសូទ្រនិគម ហើយការអនុវត្តគម្រោង៣ឆ្នាំនេះ បានជួយដល់កសិករគោលដៅចំនួន១២០គ្រួសារ ។
មានប្រសាសន៍ក្នុងឱកាសនោះដែរ លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានសម្ដែងនូវការកោតសរសើរ និងបង្ហាញភាពជឿជាក់ទៅលើធនធានជលផលតាមវាលស្រែ ដែលជាផ្នែកមួយបានគ្របដណ្តប់មួយភាគធំលើដីកសិកម្មក្នុងប្រទេស ខណៈគម្រោងដែលបានអនុវត្តរយៈពេលជិត៣ឆ្នាំមកនេះ បានជួយបង្កើននូវវិធីសាស្ត្រសមស្របនៃអាហារូបត្ថម្ភ តាមរយៈវារីវប្បកម្មទៅដល់គ្រួសារក្រីក្រ ជាពិសេសកុមារអាយុក្រោម៥ឆ្នាំនៅតំបន់បឹងទន្លេសាបខេត្តសៀមរាប បានជួយរៀបចំការគ្រប់គ្រងស្រះក្នុងតំបន់គោលដៅ និងបង្កើនចំណេះដឹងនិងផ្សព្វផ្សាយដល់ស្ត្រីដែលមានកូនក្រោមអាយុ៥ឆ្នាំ អំពីសារៈប្រយោជន៍នៃត្រីសម្បូរជីវជាតិ អាហារូបត្ថម្ភ ការចំអិនអាហារ និងអនាម័យ បង្កើនចំណេះដឹងក្នុងការចងក្រងមេរៀន បទពិសោធន៍ នៃការអភិវឌ្ឍវារីវប្បកម្ម និងចែករំលែកដល់អ្នកពាក់ព័ន្ឋក្នុងការពង្រីកវិសាលភាពនៅក្នុងប្រទេសកម្ពុជា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត