ផ្សែងបារីបានបំផ្លាញសុខភាពអ្នកជក់ និងអ្នកជុំវិញខ្លួនយ៉ាងធ្ងន់ធ្ងរ ហើយវាក៏ជាឧបសគ្គក្នុងការរារាំងការលើកកម្ពស់ជីវភាពគ្រួសារផងដែរ ដោយត្រូវចំណាយលើការទិញបារី និងព្យាបាលជំងឺរ៉ាំរ៉ៃរបស់អ្នកជក់បារី ជាលទ្ធផល ប្រទេសកម្ពុជាបានចំណាយថវិកាជាតិប្រមាណ ៣៦៣លានដុល្លារអាមេរិច ហើយអ្នកជំងឺជាច្រើនផ្សេងទៀត បានស្លាប់ចោលគ្រួសាររបស់ពួកគេ ដោយសារជំងឺមហារីក ។
យោងតាមរបាយការណ៍របស់ក្រសួងផែនការ ថវិកាប្រមាណជាង ២០០ លានដុល្លារ ត្រូវបានចំណាយលើការទិញបារី។ ហើយពលរដ្ឋខ្មែរដែលជក់បារី មានប្រមាណ១លាន៦សែននាក់ ភាគច្រើនជាក្រុមមនុស្ស ដែលរកចំណូលបានទាប នេះបើតាមរបាយការណ៍ របស់ក្រសួងសុខាភិបាលកាលពីឆ្នាំ២០១៧។
តាមរយៈរបាយការណ៍របស់ក្រសួងសុខាភិបាលដដែល បានបង្ហាញថា ជំងឺធ្ងន់ធ្ងរ ដែលបណ្ដាលមកពីការជក់បារី មាន៥ប្រភេទ គឺ ជំងឺមហារីកសួត ជំងឺស្ទះបេះដូង ជំងឺដាច់សរសៃឈាមខួរក្បាល ជំងឺរបេង ត្បៀតទងសួតរ៉ាំរ៉ៃ ហើយប្រទេសកម្ពុជាត្រូវចំណាយថវិកាប្រមាណ ១៦៣ លានដុល្លារ ដើម្បីព្យាបាល និងថែទាំអ្នកជំងឺទាំងអស់នោះ។
តាមរយៈការខិតខំប្រឹងប្រែង របស់ក្រសួងសុខាភិបាល ស្ថាប័ន និងអង្គការពាក់ព័ន្ធ ក្នុងរយៈពេល១០ឆ្នាំចុងក្រោយនេះ ចំនួនអ្នកជក់បារីមានការថយចុះគួរឲ្យកត់សម្គាល់ ចំពោះបុរស អត្រាការជក់បារីមានចំនួន៤៨ភាគរយ ថយមកនៅត្រឹម៣៥ភាគរយ ខណៈស្ដ្រី អត្រាការជក់បារីមានចំនួន២០ភាគរយ ថយមកនៅសល់តែជាង១១ភាគរយប៉ុណ្ណោះ។
នៅក្រុងសៀមរាប ថ្ងៃទី២៧ ខែកញ្ញា ឆ្នាំ២០១៨ ក្រសួងទេសចរណ៍ ក្រុងសៀមរាប អង្គការសុខភាពពិភពលោក និងអង្គការចលនាដើម្បីសុខភាពកម្ពុជា បានបង្កើតកម្មវិធីមួយ ក្រោមប្រធានបទ “ជិះកង់ ដើម្បីក្រុងសៀមរាបគ្មានផ្សែងបារី” ដើម្បីបន្តកាត់បន្ថយចំនួនអ្នករងគ្រោះដោយសារផ្សែងបារីបន្ថែមទៀត ក៏ដូចជាលើកកម្ពស់ជីវភាពរបស់ប្រជាពលរដ្ឋក្នុងខេត្តសៀមរាប យុទ្ធនាការ។ កម្មវិធីជិះកង់នេះមានចូលរួមចំនួនជាង២០០នាក់ ជិះក្នុងចំងាយ ២០គីឡូម៉ែត្រ ដោយជិះចេញពីក្រុងសៀមរាប កាត់តាមប្រាសាទអង្គរវត្ត ឆ្ពោះទៅព្រលានយន្តហោះអន្តរជាតិខេត្តសៀមរាប និងបញ្ចប់នៅកន្លែងចាប់ផ្ដើមវិញ។
ចំពោះយុទ្ធនាការទីក្រុងគ្មានផ្សែងបារីនេះ មិនមានន័យថាហាមឃាត់ មិនឲ្យមានអ្នកជក់បារីនោះទេ ប៉ុន្តែវាគឺជាការជូនដំណឹងពីផលប៉ះពាល់ដល់អ្នកកំពុងជក់បារី និងមនុស្សនៅជុំវិញ ហើយអ្នកជក់បារីត្រូវគោរពច្បាប់ស្ដីពីការត្រួតពិនិត្យផលិតផលថ្នាំជក់ដូចជា៖
– ហាមជក់បារីក្នុងអាគារនៃកន្លែងធ្វើការនិងកន្លែងសាធារណៈ
– ហាមជក់បារីខាងក្នុងមធ្យោបាយធ្វើដំណើរសាធារណៈ
– ហាមជក់បារីក្នុងបរិវេណ នៃគ្រឹះស្ថានសាសនា សារមន្ទីរ រមណីយដ្ឋានវប្បធម៌ ប្រវត្តិសាស្ត្រ កន្លែងហាត់ប្រាណ ស្ថានីយប្រេងឥន្ធនៈ និងកន្លែងងាយឆាបឆេះ
– អាចជក់បារីបាននៅក្រៅអាគារចំងាយ 500 ម៉ែត្រពីច្រកចេញចូល
លើសពីនេះម្ចាស់កន្លែងធ្វើការ ឬកន្លែងសាធារណៈ ភោជនីយដ្ឋាន សណ្ឋាគារ ហាងទំនិញជាដើម ត្រូវបិទសញ្ញាហាមជក់បារី និងណែនាំមិនឲ្យជក់បារីក្នុងអាគារ។
អត្ថបទ៖ លោក ជា ស្រស់ លោក ខេង ឧត្តម និងលោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
