ថ្លែងក្នុងសន្និសីទ មេគង្គ ឡានឆាង ស្តីពីសហគ្រាសវប្បធម៌ធុនតូច និង មធ្យម ដែលបានប្រារព្ធឡើងនៅខេត្តសៀមរាប នាព្រឹកថ្ងៃទី២៧ ខែកញ្ញា ឆ្នាំ២០១៨នេះ ឯកឧត្តម សំរាំង កំសាន្ត រដ្ឋលេខាធិការក្រសួងវប្បធម៌និងវិចត្រសិល្បៈ បានបញ្ជាក់ថា ឧស្សាហកម្មវប្បធម៌ គឺជាឆ្អឹងខ្នងសេដ្ឋកិច្ច សម្រាប់ការទ្រទ្រង់ លើកស្ទួយជីវភាពរស់នៅរបស់ប្រជាជន តាមរយៈនៃការផលិតវត្ថុសិល្បៈ ហើយមានសារសំខាន់ខ្លាំងណាស់សម្រាប់យុវជន មានតួនាទីជាអ្នកត្រូវបន្តវេន ដែលមិនត្រឹមតែលើការងារសហគ្រាសវប្បធម៌ប៉ុណ្ណោះទេ តែត្រូវដើរតួនាទីជាគន្លឺះ ជាជនសកម្ម ជាកម្លាំងស្នូល សម្រាប់ការអភិវឌ្ឍប្រទេសជាតិ ។
ឯកឧត្តម សំរាំង កំសាន្ត បានបញ្ជាក់ទៀតថា តាមរយៈអង្គសន្និសីទ មេគង្គ-ឡានឆាន ស្ដីពី សហគ្រាសវប្បធម៌ធុនតូច និង មធ្យម ក្រោមប្រធានបទ តួនាទីយុវជនក្នុងការអភិវឌ្ឍសហគ្រាសវប្បធម៌ធុនតូច និងមធ្យម ប្រកបដោយចីរភាព នេះ ដែលអាចនិយាយបានថា អង្គសន្និសីទកំពុងបានផ្តល់ឱកាសសម្រាប់យុវជន ដែលជាសមាជិកនៃបណ្តាប្រទេសមេគង្គ-ឡានឆាង បានចូលរួមស៊ីជម្រៅក្នុងសកម្មភាពវប្បធម៌ ។
សូមបញ្ជាក់ថា ផ្អែកលើផែនការសកម្មភាពនេះ សមភាគីចិន និងយុវជន នៃប្រទេសកម្ពុជា , ឡាវ , មីយ៉ានម៉ា , ថៃ និង ប្រទេសវៀតណាម នឹងបានរៀនសូត្រ ជួបប្រជុំ និងស្វែងរកនូវយន្ដការក្នុងការសិក្សាស្រាវជ្រាវ ស្ដីពី សហគ្រាសវប្បធម៌ធុនតូច និង មធ្យម ជាមួយនឹងការផ្លាស់ប្ដូរនូវចំណេះដឹង បទពិសោធន៍ រួមនិងការប្រតិបត្តិ ដើម្បីអភិវឌ្ឍប្រកបដោយចីរភាព សម្រាប់សហគ្រាសវប្បធម៌ធុនតូច និង មធ្យម នាពេលអនាគត ដោយរាប់បញ្ចូលនូវការរៀបចំគោលដៅ/គោលបំណងជាយុទ្ធសាស្ត្រ និងផែនការសកម្មភាពច្បាស់លាស់ផងដែរ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
