ថ្លែងក្នុងពិធីយុទ្ធការជិះកង់ដើម្បីសៀមរាបគ្មានផ្សែងបារី កាលព្រឹកថ្ងៃទី២៧ ខែកញ្ញា ឆ្នាំ២០១៨នេះ ឯកឧត្តម ហោ សារុន អនុរដ្ឋលេខាធិការក្រសួងទេសចរណ៍ បានមានប្រសាសន៍ថា កម្មវិធីដែលរៀបចំនាពេលនេះ គឺជាការចូលរួមផ្សព្វផ្សាយច្បាប់ស្តីពីការត្រួតពិនិត្យថ្នាំជក់ និងរាល់លិខិតបទដ្ឋានគតិយុទ្ធនានាដល់ម្ចាស់មូលដ្ឋានអាជីវកម្ម សេវាកម្ម ប្រជាពលរដ្ឋ និងអ្នកទេសចរជាតិ អន្តរជាតិទាំងអស់ ដើម្បីចូលរួមអនុវត្តន៍នូវបរិស្ថានក្រុងសៀមរាបគ្មានផ្សែងបារីទាំងអស់គ្នា ។
ឯកឧត្តម ហោ សារុន មានប្រសាសន៍ទៀតថា ពាក្យថា ក្រុងសៀមរាបគ្មានផ្សែងបារីនេះ មិនមែនមានន័យថា លែងឲ្យមានការជក់បារីនៅក្នុងក្រុងសៀមរាបនោះទេ ប៉ុន្តែអ្នកជក់បារីត្រូវគោរពច្បាប់ស្តីពីការត្រួតពិនិត្យផលិតផលថ្នាំជក់ ដែលមានជាអាទិ៍ដូចជា ហាមការជក់បារីក្នុងអគារកន្លែងធ្វើការ ឬកន្លែងសាធារណៈ , ហាមជក់បារីក្នុងមធ្យោបាយធ្វើដំណើរសាធារណៈ , ហាមជក់បារីក្នុងគ្រឹះស្ថានសាសនា សារមន្ទីរ រមណីយដ្ឋានប្រវត្តិសាស្ត្រ កន្លែងហាត់ប្រាណ ស្ថានីយ៍ប្រេងឥន្ធនៈ និងកន្លែងងាយឆាបឆេះ ក៏ប៉ុន្តែ ពួកគាត់អាចជក់បារីបាននៅក្រៅអគារចំងាយ៥ម៉ែត្រ ពីច្រកចេញចូល ។
បើយោងតាមទិន្នន័យរបស់អង្គការសុខភាពពិភពលោក បានបញ្ជាក់ថា ចំនួនអ្នកស្លាប់ដោយសារជំងឺដែលបង្កមកពីការជក់បារីមានប្រមាណជាង១៦ពាន់នាក់ នៅក្នុងពិភពលោកក្នុងមួយឆ្នាំ ពោលគឺច្រើនជាង៣០នាក់ក្នុងមួយថ្ងៃ ហើយកម្ពុជា ក៏បានចំណាយថវិកាចំនួន១៦៣លានដុល្លាអាមេរិកក្នុងមួយឆ្នាំ ទៅលើការព្យាបាលជំងឺចម្បងចំនួន៥មុខដែលបណ្តាលមកពីការជក់បារីរួមមាន៖ ជំងឺមហារីកសួត ជំងឺស្ទះសរសៃបេះដូង ដាច់សរសៃឈាមខួរក្បាល ជំងឺរបេង ត្បៀតទងសួតរ៉ាំរ៉ៃ ហើយពលរដ្ឋកម្ពុជា ក៏បានចំណាយថវិកាលើការទិញបារីប្រមាណ២០០លានដុល្លាក្នុងមួយឆ្នាំ៕
អត្ថបទ និង រូបថត ៖ លោក ជា ស្រស់ និង លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
