នារសៀលថ្ងៃទី២៧ ខែកញ្ញា ឆ្នាំ២០១៨នេះ លោក ទៀ សីហា អភិបាលរងខេត្តសៀមរាប បានដឹកនាំកិច្ចប្រជុំមួយ ដើម្បីពិភាក្សា លើការពង្រឹងសន្តិសុខ សណ្តាប់ធ្នាប់ និង របៀបរៀបរយសាធារណៈ នៅក្នុងតំបន់់ផាប់ស្ទ្រីត ដោយមានការចូលរួមពីសំណាក់ថ្នាក់ដឹកនាំមន្ទីរ អង្គភាពពាក់ព័ន្ធនានាក្នុងខេត្ត និង អាជ្ញាធរក្រុងសៀមរាប ។
លោក ទៀ សីហា មានប្រសាសន៍ថា តំបន់ផាប់ស្ទ្រីត គឺជាទីណាត់ជួបគ្នាកំសាន្តពេលរាត្រីក្នុងក្រុងសៀមរាប នៃបណ្តាភ្ញៀវទេសចរអន្តរជាតិ ដែលជាគោលដៅមួយត្រូវយកចិត្តទុកដាក់ ដើម្បីឆ្លើយតបទៅនឹងតំបន់ដែលកំពុងមានការទាក់ទាញខ្លាំង ចំពោះវត្តមាននៃភ្ញៀវទេសចរបរទេសចម្រុះជាតិសាសន៍ ទៅកំសាន្តពេលយប់នៅទីនោះ ។
សូមបញ្ជាក់ថា សម្រាប់កិច្ចប្រជុំនេះ នឹងធ្វើការពិភាក្សាលើបញ្ហាមួយចំនួន ដូចជា បញ្ហាសំឡេងរំខាន , ការចតយានយន្ត ពិសេសម៉ូតូរ៉ឺម៉កដឹកភ្ញៀវ , បញ្ហាសំរាម , បញ្ហាប្រព័ន្ធលូបង្ហូរទឹក , ការរៀបចំសណ្តាប់ធ្នាប់នៃការលក់ដូរ , ការរៀបចំស្លាកសញ្ញាចរាចរណ៍ និង ការត្រួតពិនិត្យលើការសាងសង់សំណង់ផ្សេង ជាដើម ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
#ផាប់ស្ទ្រីត
