នៅថ្ងៃទី២៨ ខែកញ្ញា ឆ្នាំ២០១៨នេះ អាជ្ញាធរខេត្តសៀមរាប សហការជាមួយសង្គមស៊ីវិល រៀបចំកិច្ចប្រជុំតុមូល ស្តីពីការការពារសុវត្ថិភាពកុមារ ពីការកេងប្រវ័ញ្ចផ្លូវភេទ តាមប្រព័ន្ធអ៊ីនធឺណិត ក្នុងគោលបំណងបង្កើនការយល់ដឹងអំពីការកេងប្រវ័ញ្ចផ្លូវភេទលើកុមារតាមប្រព័ន្ធអ៊ីនធឺណិត ជម្រុញឲ្យអ្នកចូលរួមទាំងអស់ តាមដាន រាយការណ៍ និង បង្ការការកេងប្រវ័ញ្ចផ្លូវភេទលើកុមារ ខណៈពេលដែលការកេងប្រវ័ញ្ចផ្លូវភេទលើកុមារតាមប្រព័ន្ធអ៊ីនធឺណិត បានក្លាយជាការព្រួយបារម្ភកាន់តែខ្លាំង ក្នុងចំណោមអ្នកពាក់ព័ន្ធនានា ដែលកំពុងធ្វើការផ្នែកការពារសិទ្ធិកុមារ ។
លោក សំលៀង សីលា នាយកប្រតិបត្តិ អង្គការសកម្មភាពដើម្បីកុមារ ដែលហៅកាត់ថា APLE បានឲ្យដឹងថា បច្ចេកវិទ្យាព័ត៌មាន និង ការទំនាក់ទំនង ដើរតួនាទីយ៉ាងសំខាន់ក្នុងជីវិតរស់របស់មនុស្ស និង មានឥទ្ធិពលយ៉ាងខ្លាំង ទៅលើដំនាក់កាលនៃការអភិវឌ្ឍរបស់កុមារផ្នែកអប់រំនិងផ្នែកសង្គមនីយកម្ម ហើយនៅប្រទេសកម្ពុជា ការកើនឡើងនៃការប្រើប្រាស់ប្រព័ន្ធអ៊ីនធឺណិត បានធ្វើឲ្យការកេងប្រវ័ញ្ចផ្លូវភេទលើកុមារតាមប្រព័ន្ធអ៊ីនធឺណិត បានក្លាយជាការព្រួយបារម្ភកាន់តែខ្លាំង ក្នុងចំណោមអ្នកពាក់ព័ន្ធនានា ដែលកំពុងធ្វើការផ្នែកការពារសិទ្ធិកុមារ ។
លោកស្រីឧត្តមសេនីយ៍ត្រី ដួង ថាវរី ស្នងការរងនគរបាលខេត្តសៀមរាប តំណាងលោកស្រី យូ សុភា អភិបាលរងខេត្តសៀមរាប បានបញ្ជាក់ថា កិច្ចប្រជុំតុមូលនេះ នឹងបង្ហាញឲ្យឃើញអំពីវត្តមានរបស់បណ្តាញរាយការណ៍ពិសេសតាមប្រព័ន្ធអ៊ីនធឺណិតកម្ពុជា ( IHC ) ដើម្បីឲ្យយើងបានដឹងអំពីវិធីរាយការណ៍ ករណីសង្ស័យនៃអំពើរំលោភបំពាន និង កេងប្រវ័ញ្ចផ្លូវភេទ ព្រមទាំងសម្ភារៈរំលោភបំពានផ្លូវភេទ ផ្សេងៗទៀត ដូច្នេះរំពឹងទុកថា អ្នកចូលរួមនឹងមានការយល់ដឹងអំពីហានីភ័យនៃការកេងប្រវ័ញ្ចផ្លូវភេទលើកុមារតាមប្រព័ន្ធអ៊ីនធឺណិតកាន់តែស៊ីជម្រៅ ហើយនឹងមានការចូលរួមការការពារសុវត្ថិភាពកុមារ កាន់តែបានប្រសើឡើង ៕
អត្ថបទ និង រូបថត : លោក ងិន គឹមឡេង និង លោក ស៊ាន សុផាត
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
