ស្ថានកុងស៊ុល នៃសាធារណរដ្ឋកូរ៉េប្រចាំខេត្តសៀមរាប និង សមាគមជនជាតិកូរ៉េ បានរួមគ្នារៀបចំការប្រកួតកីឡាតេក្វាន់ដូលើកទី២ សម្រាប់កម្មវិធីមហោស្រពវប្បធម៌កូរ៉េលើកដំបូង នៅខេត្តសៀមរាប នៅសាលសន្និសីទ អង្គរកូអ៊ីច ក្នុងក្រុងសៀមរាប មានរយៈពេល៣ថ្ងៃ ចាប់ពីថ្ងៃទី២៩ ខែកញ្ញា ដល់ថ្ងៃទី០២ ខែតុលា ឆ្នាំ២០១៨នេះ ដោយមានកីឡាករ កីឡាការិនីតេក្វាន់ដូ ចំនួនជាង ៣០០ នាក់ មកពីក្លឹបនានានៃខេត្តបាត់ដំបង ខេត្តបន្ទាយមានជ័យ និង ខេត្តសៀមរាប ដើម្បីដណ្តើមពានរង្វាន់ ស្ថានកុងស៊ុលសាធារណរដ្ឋកូរ៉េ ប្រចាំខេត្តសៀមរាប ។
ឯកឧត្តម អូ ណាក់យ៉ង់ ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា មានប្រសាសន៍ថា តេក្វាន់ដូ គឺជាកីឡាជាតិរបស់ប្រទេសកូរ៉េ ហើយក៏ជាកីឡានិមិត្តសញ្ញានាំទំនាក់ទំនងចំណងមិត្តភាពរវាងប្រទេសទាំងពីរ កូរ៉េ និង កម្ពុជា ហើយមកដល់ខួប២១ឆ្នាំ នៃទំនាក់ទំនងប្រទេសទាំង២ បាននឹងកំពុងអភិវឌ្ឍន៍កីឡាតេក្វាន់ដូកម្ពុជាក៏យ៉ាងដូច្នោះដែរ គឺមានការអភិវឌ្ឍយ៉ាងឆាប់រហ័ស បន្ទាប់ពីខេមរសហព័ន្ធកីឡាតេក្វាន់ដូកម្ពុជា ត្រូវបានបង្តើតឡើងកាលក្នុងអំឡុងឆ្នាំ ១៩៩៣ គឺ ២៥ឆ្នាំមុន ហើយនៅប៉ុន្មានថ្ងៃមុននេះ នៅរាជធានីភ្នំពេញ មានកម្មវិធីប្រកួតកីឡាតេក្វាន់ដូផ្តាច់ព្រ័ត្រ ដណ្តើមពានរង្វាន់ ឯកអគ្គរដ្ឋទូតកូរ៉េ ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
