នៅព្រឹកថ្ងៃទី២៩ ខែកញ្ញា ឆ្នាំ២០១៨នេះ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិ ចុះជួយខេត្តសៀមរាប បានប្រគល់ប័ណ្ណសរសើរ និងប្រគល់រង្វាន់ម៉ូតូម្នាក់១គ្រឿង ដែលនឹងធ្វើស្លាក់លេខជូនផងដែរ រួមជាមួយប្រេងសាំង ៥០លីត្រ ថវិកា១០ម៉ឺនរៀល ជូនសិស្សចំនួន៣១នាក់ ដែលជាបេក្ខជនប្រឡងសញ្ញាបត្រមធ្យមសិក្សាទុតិយភូមិ ជាប់និទ្ទេស A ឆ្នាំ២០១៨ នៅទូទាំងខេត្តសៀមរាប។
សម្តេចពិជ័យសេនា ទៀ បាញ់ បានមានប្រសាសន៍ថា រាជរដ្ឋាភិបាលក្រោមការដឹកនាំ របស់សម្តេចតេជោ ហ៊ុន សែន នាយករដ្ឋមន្ត្រី បានចាត់ទុកវិស័យអប់រំ ជាការងារអាទិភាព ព្រោះការអប់រំបានបង្កើតឡើងមូលធនមនុស្ស គំនិតច្នៃប្រឌិត បច្ចេកវិទ្យា ដែលជាកត្តាដ៏សំខាន់មិនអាចខ្វះបាន សម្រាប់ទ្រទ្រង់កំណើនសេដ្ឋកិច្ច និងការអភិវឌ្ឍន៍ប្រកបដោយចីរភាព និងដើម្បីធានាបាននូវសក្តានុពល សម្រាប់ការប្រកួតប្រជែងជាអន្តរជាតិ ការធ្វើពិពិធកម្ម សេដ្ឋកិច្ចជាតិ និងនិរន្តរភាពនៃការអភិវឌ្ឍសេដ្ឋកិច្ច និងសង្គមរបស់យើង ។
សម្តេចពិជ័យសេនា មានជំនឿយ៉ាងមុតមាំថា ក្មួយៗដែលទទួលបាននិទ្ទេស A នាពេលនេះ នឹងខិតខំបន្តការសិក្សាទៅមុខទៀត ដើម្បីទទួលបានចំណេះដឹង ចំណេះធ្វើ សម្រាប់ដឹកនាំនាវាកម្ពុជា ឆ្ពោះទៅរកការអភិវឌ្ឍជាមួយធនធាន របស់ក្មួយៗដែលមាន ប្រកបដោយប្រសិទ្ធភាពខ្ពស់ សម្រាប់បន្តវេន កសាង ការពារ អភិវឌ្ឍន៍សង្គមជាតិ ឲ្យឆ្លើយតបបានទៅនឹងបរិបទ នៃការវិវត្តក្នុងតំបន់ និងពិភពលោក ព្រោះក្មួយៗទាំងអស់ គឺជាមូលដ្ឋានគ្រឹះដ៏សំខាន់នាពេលអនាគតក្នុងការលើកកម្ពស់ ការអភិវឌ្ឍន៍ធនធានមនុស្ស ឲ្យឆ្លើយតប ទៅនឹងតម្រូវការប្រទេសជាតិ ចូលរួមចំណែកដល់ការអនុវត្តយុទ្ធសាស្ត្រ ចតុកោណដំណាក់កាលទី៣ ដើម្បីកំណើនការងារ សមធម៌ និងប្រសិទ្ធភាពនៅកម្ពុជា ៕
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
