កាលល្ងាចវេលាម៉ោង១៧ រសៀលថ្ងៃទី១១ ខែកញ្ញាឆ្នាំ២០១៩ ម្សិលមិញនេះ ឯកឧត្តម ទៀ សីហា អភិបាលខេត្តសៀមរាប បានចុះទៅពិនិត្យនៅទីតាំងកើតមានករណីគ្រោះធម្មជាតិភ្លៀងមួយមេធំ លាយនិងខ្យល់កន្ត្រាក់ បណ្ដាលឲ្យរលំដើមឈើធំ មួយដើម បង្កឲ្យរងបួសមនុស្សចំនួន០២នាក់ និងខូចខាងម៉ូតូមួយគ្រឿង នៅខាងមុខវត្តព្រះឥន្ទកោសា ស្ថិតក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប។
អំឡុងពេលកើតហេតុដើមឈើដែលរលំនោះ បានបង្កឲ្យផ្អាកចរាចរណ៍ ត្រង់ចំណុចកំណាត់ផ្លូវខាងកើតស្ទឹងពីវត្តពោធិ៍លង្កា ដល់វត្តព្រះឥណ្ឌកោសា ជាបណ្តោះអាសន្ន។ ទន្ទឹមនោះ ក្រុមការងារនៃរដ្ឋបាលក្រុង និងខេត្ត និងអាជ្ញាធរមូលដ្ឋាន ដឹកនាំផ្ទាល់ ដោយឯកឧត្តម ទៀ សីហា ធ្វើការកាត់ នឹងដឹកយកចេញទាំងយប់ ដើម្បីសម្រួលចរាចរណ៍ជូនបងប្អូនប្រជាពលរដ្ឋ ឡើងវិញ ចំណែកឯជនរងគ្រោះ ត្រូវបានបញ្ជូនទៅមន្ទីរពេទ្យបង្អែកខេត្តសៀមរាប តាមរយៈរថយន្តសង្គ្រោះរបស់មន្ទីរពេទ្យផងដែរ៕
អត្ថបទ និង រូបភាព ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
