ការបើកសម្ពោធសាខាលក់គ្រឿងចក្រខ្នាតធំៗ ដែលបម្រើវិស័យកសិកម្ម និងហេដ្ឋារចនាសម្ព័ន្ធរបស់ក្រុមហ៊ុន UMG Cambodia ស្ថិតនៅក្នុងឃុំកណ្តែក ស្រុកប្រាសាទបាគង ខេត្តសៀមរាប នៅព្រឹកថ្ងៃទី១២ខែកញ្ញាឆ្នាំ២០១៩នេះ វាបានបង្ហាញពីសក្ដានុពលរបស់ខេត្តសៀមរាប ក្នុងការធ្វើទំនើបកម្មលើវិស័យកសិកម្ម បន្ថែមពីលើពីវិស័យទេសចរណ៍។
ថ្លែងនៅក្នុងពិធីសម្ពោធនោះ លោក សូ ប្លាតុង អភិបាលស្រុកប្រាសាទបាគង ខេត្តសៀមរាប បានលើកឡើងថា បច្ចុប្បន្ននេះ ដោយសារប្រទេសកម្ពុជា មានសុខសន្តិភាព ចាំបាច់ណាស់ គ្រប់ទីកន្លែងពោរពេញទៅដោយការអភិវឌ្ឍន៍ ជាក់ស្ដែងវត្តមានថ្មីរបស់ក្រុមហ៊ុន UMG Cambodia នៅខេត្តសៀមរាបនេះ គឺពិតជាមានសារៈសំខាន់ សម្រាប់បំម្រើឲ្យវិស័យកសិកម្ម និងហេដ្ឋារចនាសម្ព័ន្ធ ដែលវិស័យទាំងពីរនេះ កំពុងតែមានត្រូវការគ្រឿងចក្រទំនើបៗ បែបនេះ មកប្រើប្រាស់។
លោក Alfred Kasuma Aliwaga នាយកគ្រប់គ្រងប្រចាំប្រទេសកម្ពុជារបស់ក្រុមហ៊ុន UMG Cambodia បានថ្លែងថា មូលហេតុដែលក្រុមហ៊ុនរបស់លោកមកបើកសាខានៅខេត្តសៀមរាបនេះ គឺដោយមើលឃើញ ពីតម្រូវការចាំបាច់របស់ខេត្តសៀមរាប ក្នុងការអភិវឌ្ឍន៍ទាំងផ្នែកហេដ្ឋារចនាសម្ព័ន្ធ និងផ្នែកកសិកម្ម និងកាត់បន្ថយការចំណាយថវិកា និងពេលវេលា ទៅរាជធានីភ្នំពេញ ឬបញ្ជាទិញ ដើម្បីទិញគ្រឿងចក្រឬគ្រឿងបន្លាស់នៅក្រៅប្រទេស។ ហើយលោកសន្យាថា ក្រុមហ៊ុនរបស់លោកនឹងផ្តល់នូវគ្រឿងចក្រប្រកបដោយគុណភាព ដែលប្រើប្រាស់បច្ចេកវិទ្យាទំនើបៗ បន្ថែមទៀត៕
អត្ថបទ និង រូបភាព ៖ លោក ឃុត សៅ
កែសម្រួលអត្ថបទ ៖ លោក សេង ផល្លី
