នាព្រឹកថ្ងៃពីថ្ងៃទី១២ ខែកញ្ញា ឆ្នាំ២០១៩ នៅសណ្ឋាគារសោមាទេវីខេត្តសៀមរាប មានរៀបចំសន្និសីទអន្តរជាតិស្តីពីការអភិរក្សជីវចម្រុះ និងនិរន្តរភាពនៃការប្រើប្រាស់សេវាកម្មប្រព័ន្ឋអេកូឡូស៊ី និងបង្ហាញពីសារៈសំខាន់នៃការស្រាវជ្រាវវិទ្យាសាស្ត្រ សម្រាប់គោលដៅអភិវឌ្ឍប្រកបដោយចីរភាព ក្នុងក្របខ័ណ្ឌគម្រោងសហភាពអឺរ៉ុប Consea ដែលមានប្រទេសចំនួន៦ រួមទាំងកម្ពុជា និងមានការសម្របសម្រួលដោយសាកលវិទ្យាល័យបាត់ដំបង។
តាមការលើកឡើងរបស់ លោកបណ្ឌិត ជា រដ្ឋា នាយកសាលាក្រោយបរិញ្ញាបត្រនៃសាកលវិទ្យាល័យបាត់ដំបង សន្និសីទមានការចូលរួមពីសាកលវិទ្យាល័យមកពីប្រទេសបារាំង បែលហ្សិក អូទ្រីស អូស្ត្រាលី វៀតណាម និងកម្ពុជា ដែលប្រារព្ធឡើង ដើម្បីបង្ហាញពីសមិទ្ឋផល នៃការអនុវត្តគម្រោងរយៈពេល៣ឆ្នាំកន្លងមក ដែលបានចូលរួមយ៉ាងសំខាន់ក្នុងការកសាងសមត្ថភាពរៀន និងបង្រៀនរបស់បុគ្គលិក សាស្ត្រាចារ្យ និងនិស្សិតនៃសាកលវិទ្យាល័យតំបន់អាងទន្លេមេគង្គទៅលើការស្រាវជ្រាវ លើការអភិរក្សជីវចម្រុះដែលធានាបាននូវនិរន្តរភាពសេវាកម្មប្រព័ន្ឋអេកូឡូស៊ីក្នុងតំបន់អាងទន្លេមេគង្គទាំងមូល ។
មានវត្តមានជាអធិបតីក្នុងសន្និសីទនោះ ឯកឧត្តម យ៉ក់ ង៉ុយ រដ្ឋលេខាធិការ និងជាតំណាង ឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា មានប្រសាសន៍ថា តាមរយៈយុទ្ធសាស្ត្រចតុកោណ ដំណាក់កាលទី៤ ក្នុងអាណត្តិទី៦ រាជរដ្ឋាភិបាលកម្ពុជា របស់សម្ដេចតេជោ នាយករដ្ឋមន្ត្រី វិស័យអប់រំនៅតែជាវិស័យអាទិភាព និងជាឆ្អឺងខ្នងសេដ្ឋកិច្ចសង្គម វប្បធម៌ ដែលធានានូវការអភិវឌ្ឍន៍ប្រកបដោយចីរភាពនៃខឿនសេដ្ឋកិច្ចជាតិក្នុងគោលបំណងឱ្យប្រទេសកម្ពុជាក្លាយពីប្រទេសដែលមានប្រាក់ចំណុលមធ្យមកម្រិតទាប ទៅជាប្រទេសដែលមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០។ ជាមួយគ្នានេះក្រសួងអប់រំយុវជននិងកីឡាក៍បានដាក់ចេញនូវគោលនយោបាយឧត្តមសិក្សាឆ្នាំ២០៣០ក្នុងការកសាងគុណភាពប្រព័ន្ឋអប់រំ អភិវឌ្ឍធនធានមនុស្សប្រកបដោយចំណេះដឹងល្អ ជំនាញនិងសិលធម៌ក្នុងការងារនិងការរស់នៅស្របតាមបរិបទសាកលភាវូបនីយកម្ម និង សង្គមចំណេះដឹងជាមូលដ្ឋាន ។
ឯកឧត្តម យ៉ក់ ង៉ុយ មោទនភាព ចំពោះសន្និសីទនាពេលនេះ ដែលវាជាសកម្មភាពរួមចំណែក ក្នុងការលើកកម្ពស់វិទ្យាសាស្ត្រ និងការអប់រំផ្នែកអភិរក្សជីវចម្រុះនិងការគ្រប់គ្រងប្រព័ន្ឋអេកូឡូស៊ីឆ្លើយតបបានទៅនឹងការប្រែប្រួលយ៉ាងឆាប់រហ័សនៃបរិស្ថាន។
សូមជម្រាបថា សន្និសីទនេះមានរយៈពេល៣ថ្ងៃពីថ្ងៃទី១២ដល់ថ្ងៃទី១៤ខែកញ្ញាឆ្នាំ២០១៩ នៅសណ្ឋាគារសោមាទេវីខេត្តសៀមរាប មានសមាសភាពចូលរួមចំនួនជាង៤០រូប ក្នុងនោះកម្ពុជា២០រូប កំពុងសិក្សាថ្នាក់បរិញ្ញាបត្រជាន់ខ្ពស់ជំនាន់ទី១ ជំនាន់ទី២ជំនាន់ទី៣ និស្សិតជាអនុបណ្ឌិត វៀតណាមមាន២០រូប ផ្សេងពីនេះ ជាសាស្ត្រាចារ្យមកពីសាកលវិទ្យាល័យដៃគូចំនួន៤នៅអាស៊ី ដូចជាសាកលវិទ្យាល័យក័នធឺ និង អានយ៉ាងប្រទេសវៀតណាម សាកលវិទ្យាល័យបាត់ដំបងនិងភូមិន្ទភ្នំពេញ ប្រទេសកម្ពុជា និង៤ទៀតនៅសហគមន៍អឺរ៉ុប ដូជាសាកលវិទ្យាល័យទូលូ បី ប៉ូលសាបាត់ចេ ប្រទេសបារាំង សាកលវិទ្យាល័យ ហ្គិន ប្រទេសប៊ែលហ្សិក សាកលវិទ្យាល័ជីរ៉ូណា ប្រទេសអេស្ប៉ាញ សាកលវិទ្យាល័យប៉ូគុ ប្រទេសអូទ្រីស។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
