នៅព្រឹកថ្ងៃទី ១២ ខែកញ្ញា ឆ្នាំ២០១៩នេះ នៅមន្ទីរប្រៃសណីយ៍ខេត្តសៀមរាប មានរៀបចំសិក្ខាសាលាផ្សព្វផ្សាយមួយស្ដីពី ការផ្សព្វផ្សាយ លិខិតបទដ្ឋានគតិយុត្តិនានាក្នុងវិស័យប្រៃណីយ៍ ក្រោមអធិបតីភាព របស់ឯកឧត្តម ឯក វណ្ណឌី រដ្ឋលេខាធិការក្រសួង ប្រៃសណីយ៍ និងទូរគមនាគមន៍ ដោយមានការអញ្ជើញចូលរួមពីសំណាក់លោក លោកស្រី ជាថ្នាក់ដឹកនាំក្រសួង លោកប្រធាន និងអនុប្រធានមន្ទីរ មន្ត្រីរាជ្យការ បុគ្គលិក តំណាងក្រុមហ៊ុន និងនិយោជគក្នុងខេត្តសៀមរាបសរុបប្រមាណ ១០០នាក់។
បើតាមរបាយការណ៍ របស់លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ខេត្តសៀមរាប បានឲ្យដឹងថា ក្នុងខេត្តសៀមរាបគឺមានក្រុមហ៊ុនជាច្រើនដែលកំពុងដំណើរការជារៀងរាល់ថ្ងៃ ក្នុងនោះដែរ មន្ទីរគឺមានកាតព្វកិច្ចច្រើនក្នុងការរៀបចំ និងទទួលរាល់បញ្ហាដែរ ក្រុមហ៊ុន ឬសហគ្រាសជួបប្រទះ ជាពិសេសបញ្ហាដឹកជញ្ជូនផ្សេងៗ ទាំងក្នុង និងក្រៅប្រទេសផងដែរ ។
មានប្រសាសន៍បើកអង្គសិក្ខាសាលា នាឱកាសនោះ ឯកឧត្តម ឯក វណ្ណឌី រដ្ឋលេខាធិការក្រសួង ប្រៃសណីយ៍ និងទូរគមនាគមន៍ បានលើកឡើងថា ការរីកចម្រើននៃបច្ចេកវិទ្យាដ៏លឿន បានធ្វើឱ្យវិស័យទូរគមនាគមន៍ បច្ចេកវិទ្យាគមនាគមន៍ និងព័ត៌មាន កាន់តែមានភាពស្មុគស្មាញ នៅខណៈដែលវិស័យនេះកំពុងមានការអភិវឌ្ឍ និងរីកចម្រើនខ្លាំងនៅប្រទេសកម្ពុជា។ ហើយដើម្បីឲ្យការងារទាំងនេះទទួលបានជោគជ័យ មន្ត្រីក្រោមឱវ៉ាទទាំងអស់ ត្រូវបំពេញនូវតួនាទីភារកិច្ច របស់ខ្លួនន្ថែមទៀត ដើម្បីបង្កើននូវសមត្ថភាពក្នុងការអនុវត្តផ្សេងៗក្នុងវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន និងត្រូវសិក្សាចំណេះដឹងបច្ចេកវិទ្យាថ្មីៗ ស្វែងរកសម្ភារៈបច្ចេកវិទ្យាថ្មីៗ ។
ឯកឧត្តម ឯក វណ្ណឌី បានមានប្រសាសន៍ទៀតថា អង្គសិក្ខាសាលានេះ រៀបចំឡើងក្នុងគោលបំណង ផ្សព្វផ្សាយ នូវរាល់លិខិតបទដ្ឋានគតិយុត្តិនានាក្នុងវិស័យប្រៃណីយ៍ និងបណ្តុះបណ្តាលបន្ថែមដល់មន្ត្រីរាជ្យការ ក៏ដូចជាក្រុមហ៊ុនផ្សេងៗ អំពីបែបបទ និងនីតិវិធីអនុវត្តច្បាប់ ដែលមានសារៈសំខាន់ និងចាំបាច់ជូនដល់មន្ត្រី ទូរគមនាគមន៍ ដែលទទួលបាននូចំនេះដឹងថ្មីៗបន្ថែមទៀត ដើម្បីយកទៅអនុវត្តការងាររបស់ខ្លួនស្របតាមច្បាប់ និងលិខិតបទដ្ឋានគតិយុត្តពាក់ព័ន្ធនានាដោយអនុលោមទៅតាមច្បាប់ស្តីពីទូរគមនាគមន៍ ដែលក្នុងនោះដែររួមមាន ប្រកាសរួមលេខ ២៩៨ សហវ.ប្រក ,ប្រកាសលេខ ៣១៤ បទ.ប្រក និងប្រកាសលេខ ៣១៦ បទ.ប្រក របស់ក្រសួងប្រៃសណីយ៍ និងទូរគមនាគមន៍។
ឯកឧត្តម ឯក វណ្ណឌី សង្ឃឹមជឿរជាក់ថា ក្រោយអង្គសិក្ខាសាលាបានបញ្ចប់ សិក្ខាកាមដែលជាមន្ត្រីរាជការ និងតំណាងក្រុមហ៊ុនទាំងអស់ ដែលបានចូលរួមនៅពេលនេះ នឹងទទួលបាននូវដំណោះស្រាយ និងយកចំណេះដឹងថ្មីៗបន្ថែមទៀត ក្នុងវិស័យប្រៃណីយ៍ និងទូរគមនាគមន៍នេះ ព្រោះវាជាប្រយោជន៍យ៉ាងសំខាន់ ក្នុងការបំពេញភារកិច្ចរបស់ខ្លួន និងក្រុមហ៊ុន ឱ្យកាន់តែមានប្រសិទ្ធភាពជាងមុនថែមទៀត ក្នុងកិច្ចការត្រួតពិនិត្យ តាមដានរាប់បញ្ហាពាក់ព័ន្ធនានា ព្រមទាំងកិច្ចការស្រាវជ្រាវ ទប់ស្កាត់ និងដោះស្រាយនូវរាល់បញ្ហាផ្សេងៗទៀត នៅតាមអង្គភាព និងក្រុមហ៊ុនរបស់ខ្លួនផងដែរ ៕
អត្ថបទ និង រូបភាព ៖ អ៊ុន ណារាជ្យ
