នៅចុងឆ្នាំ២០១៩នេះ ជើងយន្តហោះជប៉ុននឹងធ្វើការហោះហើរត្រង់មកកាន់ខេត្តសៀមរាប ដែលនាំឲ្យមានការរំពឹងថា នឹងមានកំណើរភ្ញៀវទេចរជប៉ុនកើនឡើង នេះបើតាមការលើកឡើងរបស់កញ្ញា Mizuho Kanda ប្រធានផ្នែកទទួលបន្ទុកទេសចរណ៍ និងជាតំណាងមជ្ឈមណ្ឌលអាស៊ានជប៉ុន កាលពីថ្ងៃទី១១ ខែកញ្ញា ឆ្នាំ២០១៩ នៅក្នុងវគ្គបណ្តុះបណ្តាលពង្រឹងសមត្ថភាពជំនាញភាសាជប៉ុនសម្រាប់អ្នកជំនាញទេសចរណ៍ក្នុងខេត្តសៀមរាប។
កញ្ញា Mizuho Kanda បានបន្ថែមថា ជាមួយនឹងការរំពឹងទុកនេះ អ្នកជំនាញទេសចរណ៍មកពីតាមបណ្តាសណ្ឋាគារ ក្រុមហ៊ុនទេសចរណ៍ និងមគ្គុទ្ទេសក៍ទេសចរណ៍នៅក្នុងខេត្តសៀមរាប ក៏នឹងទទួលបានការបណ្ដុះបណ្ដាលមួយថ្ងៃពេញ ដោយឥតគិតថ្លៃ ដើម្បីជាការស្វែងយល់អំពីសមត្ថភាព និងពង្រឹងចំណេះដឹងលើភាសាជប៉ុនរបស់ខ្លួនបន្ថែមទៀត។
ឆ្លៀតក្នុងឱកាសនោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ ក៏បានជម្រុញដល់អ្នកជំនាញទេសចរណ៍ក្នុងខេត្តសៀមរាបទាំងអស់ ខិតខំលើកកម្ពស់សមត្ថភាពជំនាញភាសាជប៉ុនឱ្យកាន់តែមានលក្ខណៈស្ទាត់ជំនាញ ដើម្បីបង្ហាញពីគុណភាពផ្នែកបដិសណ្ឋាកិច្ចទៅដល់ភ្ញៀវទេសចរណ៍ជប៉ុននៅលើកម្ពុជា
សូមបញ្ជាក់ថា នៅក្នុងរយៈពេល ០៧ ខែឆ្នាំ២០១៩នេះ កម្ពុជាទទួលបានភ្ញៀវទេសចរអន្តរជាតិប្រមាណជាង៣.៨លាននាក់កើនឡើង ១១.១% ធៀបនឹងរយៈពេលដូចគ្នាក្នុងឆ្នាំ២០១៨ ដោយក្នុងនោះកម្ពុជាបានទទួលទេសចរជនជាតិជប៉ុនចំនួន១១៣,១៥៩នាក់ កើនឡើងប្រមាណ២.៦% ដោយនៅក្នុងខេត្តសៀមរាបនៅក្នុងរយៈពេល០៧ខែនេះ ទទួលបានអ្នកទេសចរជប៉ុនចំនួន ៦៧,៣១៨នាក់កើនឡើង៤.៨៣%៕
អត្ថបទ និង រូបភាព ៖ លោក ឃុត សៅ
កែសម្រួលអត្ថបទ ៖ លោក សេង ផល្លី
