នៅព្រឹកថ្ងៃទី១២ ខែកញ្ញាឆ្នាំ២០១៩ ប្រតិភូសមាគមនាវាយុវជនអាស៊ីអាគ្នេយ៍កម្ពុជាចំនួន៣២រូប បានទទួលការអនុញ្ញាតចូលជួបស្នើសុំផ្តល់អនុសាសន៍លើចំណុចសំខាន់ៗពាក់ព័ន្ឋ ទៅនឹងដំណើរការអភិវឌ្ឍន៍ពី ឯកឧត្តម ទៀ សីហា អភិបាលខេត្តសៀមរាប នៅសាលាខេត្តសៀមរាប ដើម្បីប្រមូលជាគំនិតយោបល់សម្រាប់បង្ហាញដល់ក្រុមប្រតិភូនាវាយុវជនអាស៊ីអាគ្នេយ៍ និងជប៉ុន ដែលគ្រោងធ្វើឡើងនៅទីក្រុងតូក្យូប្រទេសជប៉ុនលើកទី៤៦ នាពេលខាងមុខនេះ។
ក្នុងដំណើរការអភិវឌ្ឃន៍ ទីក្រុងប្រវត្តិសាស្ត្រ និងសំបូរទៅដោយតំបន់រមណីយដ្ឋានធម្មជាតិរបស់កម្ពុជាមួយនេះ ឯកឧត្តម ទៀ សីហា មានប្រសាសន៍ថា ដើម្បីអភិវឌ្ឍន៍ទីក្រុង និងការរស់នៅប្រកបដោយចីរភាព អាជ្ញាធរខេត្តបាននឹងកំពុងអនុវត្ត លើការអភិវឌ្ឍន៍ និងកែលម្អ នូវបណ្តាប្រព័ន្ឋហេដ្ឋរចនាសម្ព័ន្ឋនានានៅទូទាំងខេត្ត ជាពិសេសក្នុងក្រុងសៀមរាប។
ជាមួយនោះ រដ្ឋបាលខេត្តសៀមរាប ក៏បានឈានជើងចូលទៅក្នុងការរៀបចំក្រុងសៀមរាប ឲ្យក្លាយទៅជាទីក្រុងវៃឆ្លាត និងមានបរិស្ថានល្អផងដែរ តាមរយៈការដាក់បង្គោលភ្លើងបំភ្លឺផ្លូវ និងស្លាកសញ្ញាចរាចរណ៍មួយចំនួន ក្នុងក្រុងដោយប្រើថាមពលពន្លឺព្រះអាទិត្យ រួមនិងការថែរក្សាសួនសាធារណ និងដើមឈើ នៅតាមដងផ្លូវប្រកបដោយភាពស្រស់បំព្រង។
ឯកឧត្តមអភិបាលខេត្ត ក៏បានថ្លែងអំណរគុណ ចំពោះសមាគមនាវាយុវជនអាស៊ីអាគ្នេយ៍កម្ពុជា ដែលបានចូលរួមជម្រុញឲ្យចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រជាជាតិអាស៊ីអាគ្នេយ៍ រួមនិងប្រជាជនជប៉ុន កាន់តែល្អប្រសើរ។ ក្នុងនោះដែរឯកឧត្តម ទៀ សីហា ក៏បានផ្តាំផ្ញើដល់សមាគមនាវាយុវជនកម្ពុជា ពេលស្នាក់នៅ និងចូលរួមក្នុងវេទិកាកម្មវិធីនាវាយុវជនអាស៊ីអាគ្នេយ៍ និងជប៉ុន ត្រូវបង្ហាញដល់ពួកគេនូវ អរិយធម៌ វប្បធម៌ ប្រវត្តិសាស្ត្រ សាសនា ប្រពៃណីទំនៀមទំលាប់ និង ការរស់នៅរបស់ប្រជាជនកម្ពុជា ព្រមជាមួយស្នាមញញឹមរាក់ទាក់រួសរាយផងដែរ ។
អត្ថបទ និង រូបភាព ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
