លោក ពិន ប្រាកដ អភិបាលរងខេត្តសៀមរាប បានមានប្រសាសន៍ថា ដើម្បីបណ្តុះបណ្តាលធនធានមនុស្សឱ្យមានសមត្ថភាពគ្រប់គ្រាន់ ការបណ្តុះបណ្តាលកុមារឱ្យមានគ្រឹះរឹងមាំពីតូច គឺជាកត្តាដ៍សំខាន់បំផុត ព្រោះកុមារគឺជាក្រដាសស ដូច្នេះបើយើងបានផ្តល់ចំណេះដឹងជាមូលដ្ឋានគ្រឹះរឹងមាំដល់ពួកគាត់ពីតូចហើយនោះ ការបន្តសិក្សារបស់ពួកគាត់នៅបឋមសិក្សាឬនៅឧត្តមសិក្សា នឹងទទួលបានជោគជ័យ ដោយសារតែក្នុងខួរក្បាលរបស់ពួកគាត់ មានការចង់រៀនចង់ចេះ ចង់ដឹងស្រាប់ហើយ ស្របតាមគោលនយោបាយរបស់រាជរដ្ឋាភិបាលកម្ពុជា ដែលបានយកចិត្តទុកដាក់យ៉ាងខ្លាំងក្នុងការបន្តកសាង និងអភិវឌ្ឍធនធានមនុស្សលើគ្រប់ផ្នែក ប្រកបដោយគុណភាព និងមានគុណធម៌ល្អ ឆ្លើយតបទៅនឹងការអភិវឌ្ឍន៍សង្គម សេដ្ឋកិច្ច ដើម្បីកសាងកម្ពុជាឱ្យក្លាយជាសង្គមរីកចំរើន ជឿនលឿន ដែលផ្អែកលើមូលដ្ឋានចំណេះដឹង លើគ្រប់វិស័យ រួមទាំងវិទ្យាសាស្ត្របច្ចេកទេស និងចំណេះធ្វើ ហើយដើរស្របជាមួយនឹងការរីកចម្រើន នៃបណ្តាប្រទេសនៅក្នុងតំបន់ និងពិភពលោក ។
លោក ពិន ប្រាកដ មានប្រសាសន៍ទៀតថា ក្នុងគោលដៅឱ្យកុមារតូចនៅតាមតំបន់ជនបទទួលបានការបណ្តុះបណ្តាលគ្រឹះឱ្យមានភាពរឹងមាំពីតូចនោះ ក្រសួងអប់រំយុវជននិងកីឡា បានបង្កើតឱ្យមានសាលាមត្តេយ្យសហគមន៍ជាច្រើន នៅតាមមូលដ្ឋានឱ្យនៅកៀកនឹងលំនៅដ្ឋានរបស់ប្រជាពលរដ្ឋ ដែលជាការផ្តល់ឱ្យកាសឱ្យកុមារតូចបានចូលរៀន ហើយក្រៅពីសាលាមត្តេយ្យសហគមន៍នេះ នៅតាមទីប្រជុំជន ក៏មានសាលារៀនឯកជនជាច្រើន បានទទួលកុមារតូចឱ្យចូលរៀន និងមើលការថែទាំ ដូច្នេះ អាជ្ញាធរខេត្តសៀមរាប សូមគាំទ្រចំពោះសាលារៀនឯកជនក្នុងការចូលរួមបណ្តុះបណ្តាលកុមារតូចឱ្យមានគ្រឹះរឹងមាំ សម្រាប់បន្តការសិក្សានៅបឋមសិក្សាឬនៅឧត្តមសិក្សានេះ ជាពិសេសបានជួយដល់មាតាបិតាបានទៅធ្វើការរកស៊ីបានផងដែរ ព្រោះថាមានកន្លែងសម្រាប់កូនតូចៗសម្រាប់រៀន និងថែទាំងមានសុវត្ថិភាពពេញមួយថ្ងៃផងដែរ។
លោក ពិន ប្រាកដ មានប្រសាសន៍យ៉ាងនេះ ក្នុងឱកាសចែកវិញ្ញាបនបត្រ និងលិខិតសរសើរ ជូនដល់សិស្សានុសិស្សរបស់សាលារៀនអន្តរជាតិអង្គរប្រ៊ិដ ខេត្តសៀមរាប សម្រាប់ឆ្នាំសិក្សា២០១៧-២០១៨ ។
លោក ហួត សូនី នាយកសាលារៀនអន្តរជាតិអង្គរប្រ៊ិដ មានប្រសាសន៍ថា សាលារៀនអន្តរជាតិអង្គរប្រ៊ិដ មានគោលដៅចម្បងគឺ ធ្វើយ៉ាងណាដើម្បីឱ្យសិស្សានុសិស្ស ទទួលបានជោគជ័យលើការសិក្សា រួមទាំងអត្តចរិកល្អ ដែលមានការស្វាគមន៍ពីគ្រប់មជ្ឈដ្ឋាន ហើយដើម្បីសម្រេចនូវគោលដៅនេះ សាលាបានពង្រឹងការបង្រៀនរបស់គ្រូ និងការរៀនរបស់សិស្ស ដោយក្នុងនោះត្រូវជ្រើសរើសគ្រូដែលមានគរុកោសល្យ ប្រកបដោយវិជ្ជាជីវៈក្នុងការផ្តល់ចំណេះដឹង និងមានបទពិសោធន៍ខ្ពស់ក្នុងការបង្រៀន ខណៈបច្ចុប្បន្ននេះ សាលាកំពុងបង្រៀនសិស្សថ្នាក់មត្តេយ្យភាសាអង់គ្លេស និងភាសាខ្មែរចំនួន៥៤នាក់ ថ្នាក់អង់គ្លេសពេញម៉ោងសម្រាប់កុមារចំនួន ៤៤នាក់ , ថ្នាក់ភាសាបរទេសក្រៅម៉ោងចំនួន ២២២ នាក់ និងថ្នាក់កំព្យូទ័រចំនួន ២៤នាក់ ។
លោក ហួត សូនី បានបញ្ជាក់ទៀតថា សាលារៀនអន្តរជាតិអង្គរប្រ៊ិដ ប្តេជ្ញាចូលរួមជាមួយរាជរដ្ឋាភិបាលកម្ពុជា ក្នុងការបណ្តុះបណ្តាលមូលដ្ឋានគ្រឹះកុមារតូចឱ្យបានរឹងមាំ សម្រាប់បន្តការសិក្សានៅបឋមសិក្សា ឬនៅឧត្តមសិក្សាប្រកបទៅដោយភាពជោគជ័យ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
