ឯកឧត្តម ហាស់ សារ៉េត រដ្ឋលេខាធិការក្រសួងកសិកម្មរុក្ខាប្រមាញ់និងនេសាទ មានប្រសាសន៍ថា បច្ចប្បន្ននេះ វិស័យជលផលទាំងនៅកម្ពុជានិងនៅក្នុងតំបន់ទន្លេមេគង្គ បាននឹងកំពុងជួបប្រទះបញ្ហាប្រឈមជាច្រើន និង ទទួលរងនូវការគំរាមកំហែងទាំងខាងក្នុង និងនិងខាងក្រៅវិស័យ រួមមានការនេសាទខុសច្បាប់ , គ្មានរបាយការណ៍ , គ្មានការអនុញ្ញាត , ការកាប់បំផ្លាញព្រៃលិចទឹក និង ព្រៃកោងកាង ដែលបណ្តាលឱ្យប៉ះពាល់ដល់ជម្រកទឹកសាបនិងតំបន់ឆ្នេរសមុទ្រ , ការរំលោភឆ្នេរធ្វើកម្មសិទ្ឋិ , ការបូមខ្សាច់ក្នុងតំបន់ត្រីពងកូន និងការជះឥទ្ឋិពលនៃបម្រែបម្រួលអាកាសធាតុ ព្រមទាំងកង្វះកិច្ចសហប្រតិបត្តិការឆ្លងដែន និងកង្វះលិខិតបទដ្ឋានពាក់ព័ន្ឋទៅនឹងការធ្វើពាណិជ្ជកម្មឆ្លងដែនជាដើម ។ល។
ឯកឧត្តម ហាស់ សារ៉េត មានប្រសាសន៍យ៉ាងនេះ ក្នុងឱកាសបើកសិក្ខាសាលាចាប់ផ្តើមគម្រោងថ្នាក់តំបន់ ស្តីពីការជំរុញប្រសិទ្ឋភាពយុទ្ឋសាស្ត្រថ្នាក់តំបន់ សម្រាប់ការប្រយុទ្ឋប្រឆាំងនិងលុបបំបាត់ការនេសាទខុសច្បាប់ គ្មានរបាយការណ៍ គ្មានការអនុញ្ញាត ក្នុងបណ្តាប្រទេសនៃតំបន់មេគង្គ ដើម្បីជំរុញនូវនិរន្តរភាពនៃការគ្រប់គ្រងជលផលតំបន់មេគង្គ ដែលសិក្ខាសាលានេះ រៀបចំឡើងនៅសណ្ឋាគារអប្សរាផាលែស ក្នុងក្រុងសៀមរាប ពីថ្ងៃទី០៣ ដល់ថ្ងៃទី០៥ ខែតុលា ឆ្នាំ២០១៨ ដោយមានប្រតិភូជាតិនិងអន្តរជាតិចូលរួម មកពីបណ្ដាប្រទេសទាំង៦ក្នុងតំបន់មេគង្គ រួមមាន ៖ ប្រទេសកម្ពុជា , ឡាវ , វៀតណាម ថៃ, ចិន និងប្រទេសមីយ៉ាន់ម៉ា ។
ឯកឧត្តម ហាស់ សារ៉េត មានប្រសាសន៍ទៀតថា ដោយមានកិច្ចសហការគាំទ្រពីគម្រោងមូលនិធីពិសេស នៃកិច្ចសហប្រតិបត្តិការមេគង្គឡានឆាងនោះ ក្រសួងកសិកម្មរុក្ខាប្រមាញ់និងនេសាទ បានរៀបចំសិក្ខាសាលាចាប់ផ្តើមគម្រោងថ្នាក់តំបន់នេះឡើង ដើម្បីជំរុញនូវនិរន្តរភាពនៃការគ្រប់គ្រងជលផលតំបន់មេគង្គ និងដើម្បីផ្សព្វផ្សាយអំពីគោលដៅនៃគម្រោងនិងលទ្ឋផលរំពឹងទុក ដូច្នេះតាមរយៈនៃការផ្សព្វផ្សាយ និងបញ្ជ្រាបការឯកភាពនូវគំនិត និងការយល់ឃើញនូវអ្វីដែលប្រទេសទាំង៦ត្រូវសម្រេចតាមលទ្ឋផលរំពឹងទុកក្រោយពេលបញ្ចប់នៃគម្រោងនេះ នឹងកំណត់នូវបញ្ហាអាទិភាពនៃការនេសាទខុសច្បាប់ , គ្មានការអនុញ្ញាត និងគ្មានរបាយការណ៍នៅក្នុងតំបន់ ព្រមទាំងបញ្ជាក់នូវការប្តេជ្ញាចិត្តចូលរួមនៃប្រទេសទាំង៦ក្នុងការអនុវត្តបានជោគជ័យនៃគម្រោងនេះ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
