លោក ឡេង គឹមហៀង អនុប្រធានការិយាល័យផ្លូវលំ នៃមន្ទីរអភិវឌ្ឍន៍ជនបទខេត្តសៀមរាប មានប្រសាសន៍ថា ក្នុងឆ្នាំ២០១៨នេះ ផ្លូវថ្នល់នៅស្រុកមួយចំនួនមានការខូចខាតដោយជំនន់ទឹកភ្លៀង ក្នុងនោះជីក្រែង , អង្គរជុំ , ស្រីស្នំ , ពួក និង ស្រុកវ៉ារិន ដែលមានចំនួនសរុប២១ខ្សែ ស្មើនឹងប្រវែង ២០០គីឡូម៉ែត្រ ប៉ុន្តែផ្លូវថ្នល់នៅក្នុងស្រុកជីក្រែងបានទទួលរងនូវការលិចលង់ខ្លាំងជាងគេ ។
ដូច្នេះទើបមន្ទីរអភិវឌ្ឍន៍ជនបទខេត្ត គ្រោងនឹងជួសជុលផ្លូវទាំងនោះឡើងវិញបន្ទាប់ពីខាងមន្ត្រីជំនាញបានធ្វើការពិនិត្យ និងបានលើកគម្រោងទៅក្រសួងអភិវឌ្ឍន៍ជនបទកាលពីពេលថ្មីៗនេះ ហើយគម្រោងនៃការជួសជុលផ្លូវថ្នល់នេះ មិនបានគ្រប់ស្រុកឡើយ ជាអាទិភាព គឺអាស្រ័យលើផ្លូវដែលរងការខូចខាតខ្លាំង ។
លោក ឡេង គឹមហៀង បានធ្វើការសំណូមពរដល់ប្រជាពលរដ្ឋទាំងអស់ដែលរស់នៅសងខាងផ្លូវ កុំធ្វើការដាក់ដីលុបលូដែលជាហេតុបង្កឲ្យទឹកលិចផ្លូវ ពេលមានភ្លៀងធ្លាក់ខ្លាំង ។
លោក ឡេង គឹមហៀង បានលើកឡើងបែបនេះ ក្នុងឱកាសអញ្ជើញចូលរួមជាវាគ្មិន ក្នុងកម្មវិធីសន្ទនា របស់វិទ្យុFMជាតិនគរភ្នំកាលពីថ្ងៃទី០៣ ខែតុលា ឆ្នាំ២០១៨ ម្សិលមិញនេះ ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
